ਕਾਠਮੰਡੂ, 11 ਮਈ (ਪੋਸਟ ਬਿਊਰੋ)- ਨੇਪਾਲ ਵਿੱਚ ਆਕਸੀਜਨ ਦੇ ਸਿਲੰਡਰਾਂ ਦੀ ਏਨੀ ਕਮੀ ਹੋ ਗਈ ਹੈ ਕਿ ਮਾਊਂਟ ਐਵਰੈਸਟ ਦੇ ਪਰਬਤਾਰੋਹੀਆਂ ਨੂੰ ਵਾਪਸੀ ਵੇਲੇ ਖਾਲੀ ਸਿਲੰਡਰ ਲਿਆਉਣ ਲਈ ਕਿਹਾ ਜਾ ਰਿਹਾ ਹੈ।
ਕੋਰੋਨਾ ਦੀ ਦੂਜੀ ਲਹਿਰ ਤੋਂ ਪ੍ਰੇਸ਼ਾਨ ਨੇਪਾਲ ਨੇ ਕੱਲ੍ਹ ਇਹ ਅਪੀਲ ਜਾਰੀ ਕੀਤੀ ਹੈ। ਨੇਪਾਲ ਨੇ ਅਪ੍ਰੈਲ-ਮਈ ਦੇ ਸੀਜ਼ਨ ਲਈ ਸੱਤ ਸੌ ਤੋਂ ਵੱਧ ਪਰਬਤਾਰੋਹੀਆਂ ਨੂੰ 16 ਚੋਟੀਆਂ ਦੇ ਲਈ ਪਰਮਿਟ ਜਾਰੀ ਕੀਤੇ ਹਨ। ਇਨ੍ਹਾਂ ਵਿੱਚੋਂ 408 ਪਰਬਤਾਰੋਹੀਆਂ ਨੂੰ ਮਾਊਂਟ ਐਵਰੈਸਟ ਲਈ ਪਰਮਿਟ ਦਿੱਤਾ ਸੀ, ਤਾਂ ਜੋ ਨੇਪਾਲ ਵਿੱਚ ਪਰਬਤਾਰੋਹੀ ਅਤੇ ਸੈਰ ਸਪਾਟਾ ਇੰਡਸਟਰੀ ਇੱਕ ਵਾਰੀ ਫਿਰਵਧੇ ਫੁੱਲੇ। ਨੇਪਾਲ ਦੇ ਪਰਬਤਾਰੋਹੀ ਸੰਗਠਨ (ਐਨ ਐਮ ਓ) ਨੇ ਪਰਬਤਾਰੋਹੀਆਂ ਨੂੰ ਕੋਵਿਡ-19 ਦੇ ਇਨਫੈਕਸ਼ਨ ਦੌਰ ਵਿੱਚ ਉਨ੍ਹਾਂ ਦੀ ਮਦਦ ਕਰਨ ਦੀ ਅਪੀਲ ਕੀਤੀ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਕੋਵਿਡ ਦੀ ਦੂਜੀ ਲਹਿਰ ਵਿੱਚ ਨੇਪਾਲ ਦਾ ਪਹਿਲਾਂ ਹੀ ਕਮਜ਼ੋਰ ਸਿਹਤ ਮਹਿਕਮਾ ਹੋਰ ਬਦਹਾਲ ਹੋ ਗਿਆ ਹੈ। ਐਨ ਐਮ ਏ ਦੇ ਇੱਕ ਸੀਨੀਅਰ ਅਧਿਕਾਰੀ ਕੁਲ ਬਹਾਦਰ ਗੁਰੰਗ ਦਾ ਕਹਿਣਾ ਹੈ ਕਿ ਇਸ ਸੀਜ਼ਨ ਵਿੱਚ ਪਰਬਤਾਰੋਹੀਆਂ ਤੇ ਉਨ੍ਹਾਂ ਦੇ ਸ਼ੇਰਪਾ ਗਾਈਡਾਂ ਕੋਲ 3500 ਆਕਸੀਜਨ ਦੀਆਂ ਬੋਤਲਾਂ ਹਨ। ਮੁਹਿੰਮ ਦੇ ਅੰਤ ਵਿੱਚ ਇਹ ਖਾਲੀ ਬੋਤਲਾਂ ਜਾਂ ਤਾਂ ਤੂਫਾਨ ਵਿੱਚ ਕਿਤੇ ਦੱਬ ਜਾਂਦੀਆਂ ਹਨ ਜਾਂ ਪਰਬਤਾਰੋਹੀ ਇਨ੍ਹਾਂ ਨੂੰ ਰਸਤੇ ਵਿੱਚ ਛੱਡ ਆਉਂਦੇ ਹਨ। ਗੁਰੰਗ ਨੇ ਇਨ੍ਹਾਂ ਪਰਬਤਾਰੋਹੀਆਂ ਨੂੰ ਅਪੀਲ ਕੀਤੀ ਹੈ ਕਿ ਉਹ ਵਾਪਸੀ ਵਿੱਚ ਆਕਸੀਜਨ ਦੀਆਂ ਖਾਲੀ ਬੋਤਲਾਂ ਨੂੰ ਵਾਪਸ ਲੈ ਲੈਣ ਤਾਂ ਜੋ ਉਨ੍ਹਾਂ ਦੀ ਦੁਬਾਰਾ ਵਰਤੋਂ ਕਰ ਕੇ ਆਕਸੀਜਨ ਦੀ ਘਾਟ ਨਾਲ ਮਰ ਰਹੇ ਲੋਕਾਂ ਦੀ ਜਾਨ ਬਚਾਈ ਜਾ ਸਕੇ।