ਬੀਜਿੰਗ, 19 ਅਪ੍ਰੈਲ (ਪੋਸਟ ਬਿਊਰੋ)- ਦੁਨੀਆ ਦੀ ਸਭ ਤੋਂ ਵੱਡੀ ਆਬਾਦੀ ਵਾਲੇ ਦੇਸ਼ ਚੀਨ ਵਿੱਚ ਜਨ ਸੰਖਿਆ ਦੀ ਸਥਿਤੀ ਵਿੱਚ ਵੱਡਾ ਬਦਲਾਅ ਆ ਸਕਦਾ ਹੈ। ਸਾਲ 2025 ਦੇ ਬਾਅਦ ਇਥੇ ਜਨ ਸੰਖਿਆ ਵਿੱਚ ਗਿਰਾਵਟ ਆਉਣੀ ਸ਼ੁਰੂ ਹੋ ਜਾਏਗੀ। ਚੀਨ ਦੇ ਇੱਕ ਅਰਥਸ਼ਾਸਤਰੀ ਨੇ ਇਹ ਅਨੁਮਾਨ ਲਾਉਂਦੇ ਹੋਏ ਕਿਹਾ ਹੈ ਕਿ ਆਬਾਦੀ ਘਟਣ ਨਾਲ ਖਪਤਕਾਰੀ ਮੰਗ ਘੱਟ ਹੋਵੇਗੀ ਅਤੇ ਸਥਿਤੀ ਵਿੱਚ ਸੁਧਾਰ ਆਵੇਗਾ।
ਚੀਨ ਦੇ ਕੇਂਦਰੀ ਬੈਂਕ ਪੀਪੁਲਸ ਬੈਂਕ ਆਫ ਚਾਈਨਾ ਦੀ ਕਰੰਸੀ ਨੀਤੀ ਕਮੇਟੀ ਦੇ ਮੈਂਬਰ ਚਾਈ ਫਾਂਗ ਨੇ ਕਿਹਾ ਕਿ ਚੀਨ ਦੀ ਆਬਾਦੀ ਅਗਲੇ ਚਾਰ ਸਾਲ ਵਿੱਚ ਸਿਖਰ ਉਤੇ ਪਹੁੰਚ ਜਾਏਗੀ ਤੇ ਉਸ ਦੇ ਬਾਅਦ ਇਸ ਵਿੱਚ ਗਿਰਾਵਟ ਆਏਗੀ। ਇਸ ਕਾਰਨ ਖਪਤਕਾਰੀ ਮੰਗ ਵਿੱਚ ਵੀ ਕਮੀ ਆਏਗੀ। ਚਾਈ ਦੇ ਹਵਾਲੇ ਨਾਲ ਅੰਗਰੇਜ਼ੀ ਅਖਬਾਰ ਸਾਊਥ ਚਾਈਨਾ ਮਾਰਨਿੰਗ ਪੋਸਟ ਨੇ ਕੱਲ੍ਹ ਲਿਖਿਆ ਹੈ ਕਿ ‘2025 ਦੇ ਬਾਅਦ ਜਦ ਕੁੱਲ ਆਬਾਦੀ ਵਿੱਚ ਗਿਰਾਵਟ ਸ਼ੁਰੂ ਹੋਵੇਗੀ, ਮੰਗ ਵਿੱਚ ਕਮੀ ਆਏਗੀ।' ਉਨ੍ਹਾਂ ਨੇ ਕਿਹਾ ਕਿ ਜਨ ਸੰਖਿਆ ਦੀ ਸਥਿਤੀ ਵਿੱਚ ਬਦਲਾਅ ਦੇ ਕਾਰਨ ਭਵਿੱਖ ਵਿੱਚ ਖਪਤਕਾਰੀ ਮੰਗ ਵਿੱਚ ਕਮੀ 'ਤੇ ਧਿਆਨ ਦੇਣ ਦੀ ਲੋੜ ਹੈ। ਚੀਨ ਇਸੇ ਮਹੀਨੇ ਜਨ ਗਣਨਾ ਦੀ ਤਾਜ਼ਾ ਰਿਪੋਰਟ ਜਾਰੀ ਕਰਨ ਵਾਲਾ ਹੈ। ਇਸ ਲਿਹਾਜ਼ ਨਾਲ ਚਾਈ ਦੀਆਂ ਇਹ ਗੱਲਾਂ ਮਹੱਤਵਪੂਰਨ ਹਨ। ਕੁਝ ਦਿਨ ਪਹਿਲਾਂ ਜਾਰੀ ਕੇਂਦਰੀ ਬੈਂਕ ਦੇ ਸਰਵੇ ਦੇ ਅਨੁਸਾਰ ਚੀਨ ਨੂੰ ਆਪਣੀ ਜਨ ਸੰਖਿਆ ਨੀਤੀ ਨੂੰ ਲਚਕੀਲਾ ਬਣਾਉਣਾ ਚਾਹੀਦਾ ਹੈ। ਅਜਿਹਾ ਨਾ ਕਰਨ 'ਤੇ ਉਸ ਨੂੰ ਅਜਿਹੀ ਸਥਿਤੀ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ ਜਿੱਥੇ 2050 ਤੱਕ ਕਾਮਿਆਂ ਦੀ ਹਿੱਸੇਦਾਰੀ ਘੱਟ ਹੋਵੇਗੀ ਅਤੇ ਬਜ਼ੁਰਗਾਂ ਦੀ ਦੇਖਭਾਲ 'ਤੇ ਖਰਚ ਅਮਰੀਕਾ ਤੋਂ ਵੀ ਜ਼ਿਆਦਾ ਹੋਵੇਗਾ।