ਬਰੈਂਪਟਨ ਪੋਸਟ ਬਿਉਰੋ-, ਬਰੈਂਪਟਨ ਵੈਸਟ ਤੋਂ ਮੈਂਬਰ ਪਾਰਲੀਮੈਂਟ ਕਮਲ ਖੈ੍ਹਰਾ ਨੇ ਇੱਕ ਬਿਆਨ ਵਿੱਚ ਕਿਹਾ ਹੈ ਕਿ ਫੈਡਰਲ ਸਰਕਾਰ ਨੇ ਸਿਟੀ ਆਫ ਬਰੈਂਪਟਨ ਨੂੰ ਡਾਊਨ ਟਾਊਨ ਵਿੱਚ ਹੜ ਸੁਰੱਖਿਆ ਪ੍ਰੋਜੈਕਟ ਵਾਸਤੇ 1.5 ਮਿਲੀਅਨ ਡਾਲਰ ਦਿੱਤੇ ਹਨ। ਇਸ ਫੰਡ ਨੂੰ ਹੜ ਸੁਰੱਖਿਆ ਵਾਸਤੇ ਬਦਲਵੀਂ ਤਜ਼ਵੀਜ ਸੁਝਾਉਣ ਲਈ ਵਾਤਾਵਰਣ ਦਾ ਮੁਲਾਂਕਣ ਕਰਨ ਅਤੇ ਬਰੈਂਪਟਨ ਡਾਊਨ ਟਾਊਨ ਦੇ ਅੰਦਰੂਨੀ ਹਿੱਸੇ ਨੂੰ ਈਟੋਬੀਕੋ ਕਰੀਕ ਤੋਂ ਹੜ ਦੇ ਜੋਖ਼ਮ ਤੋਂ ਬਚਾਅ ਕਰਨ ਲਈ ਵਰਤਿਆ ਜਾਵੇਗਾ। ਹੜ ਦੇ ਜੋਖ਼ਮ ਨੂੰ ਬਚਾਅ ਕਰਨ ਨਾਲ ਜਿੱਥੇ ਨਿਵਾਸੀਆਂ ਨੂੰ ਸੁਰੱਖਿਅਤ ਰੱਖਣ ਵਿੱਚ ਮਦਦ ਮਿਲੇਗੀ, ਨਾਲ ਹੀ ਕਿਸੇ ਵੱਡੇ ਹੜ ਦੀ ਸੂਰਤ ਵਿੱਚ ਆਫ਼ਤ ਤੋਂ ਰਾਹਤ ਦੇ ਖਰਚੇ ਨੂੰ ਘੱਟ ਹੋਣਗੇ।
ਇਸ ਫੰਡ ਬਾਰੇ ਕਮਲ ਖੈਰ੍ਹਾ ਨੇ ਕਿਹਾ, “ਡਾਊਨ ਟਾਊਨ ਬਰੈਂਪਟਨ ਹੜ ਵਾਲਾ ਖੇਤਰ ਹੈ, ਜਿਸ ਦੇ ਸਿੱਟੇ ਵਜੋਂ ਆਉਣ ਵਾਲਾ ਕੋਈ ਵੱਡਾ ਹੜ ਨਿਵਾਸੀਆਂ ਦੀ ਸੁਰੱਖਿਆ ਲਈ ਜੋਖ਼ਮ ਬਣਨ ਤੋਂ ਇਲਾਵਾ ਸਰਕਾਰੀ ਅਤੇ ਨਿੱਜੀ ਸੰਪਤੀ ਨੂੰ ਭਾਰੀ ਨੁਕਸਾਨ ਕਰੇਗਾ। ਇਹ ਤੱਥ ਡਾਊਨ ਟਾਊਨ ਬਰੈਂਪਟਨ ਵਿੱਚ ਵੱਸੋਂ ਦੇ ਸੰਘਣਾ ਹੋਣ ਵਿੱਚ ਰੁਕਾਵਟ ਬਣਦੇ ਹਨ, ਜੋ ਕਿ ਬਰੈਂਪਟਨ ਦਾ ਇੱਕ ਅਹਿਮ ਆਰਥਕ ਹੱਬ ਅਤੇ ਅਰਬਨ ਸੈਂਟਰ ਹੈ। ਸਾਡੀ ਟਰੂਡੋ ਸਰਕਾਰ ਦਾ ਇਹ ਨਿਵੇਸ਼ ਜਿੱਥੇ ਡਾਊਨ ਟਾਊਨ ਵਿੱਚ ਕਿਸੇ ਵੱਡੇ ਹੜ ਦੇ ਖਤਰੇ ਨੂੰ ਰੋਕੇਗਾ, ਉੱਥੇ ਆਰਥਕ ਵਿਕਾਸ ਅਤੇ ਰੁਜ਼ਗਾਰ ਪੈਦਾ ਕਰਨ ਵਿੱਚ ਸਹਾਈ ਹੋਵੇਗਾ।