ਨਵੀਂ ਦਿੱਲੀ, 25 ਮਈ (ਪੋਸਟ ਬਿਊਰੋ)- ਭਾਰਤੀ ਫ਼ੌਜ ਨੇ ਕੱਲ੍ਹ ਇੱਕ ਬਿਆਨ ਜਾਰੀ ਕਰਕੇ ਚੀਨੀ ਫ਼ੌਜ ਵੱਲੋਂ ਭਾਰਤੀ ਸੈਨਿਕਾਂ ਨੂੰ ਹਿਰਾਸਤ 'ਚ ਲਏ ਜਾਣ ਦੀਆਂ ਖ਼ਬਰਾਂ ਦਾ ਖੰਡਨ ਕੀਤਾ ਅਤੇ ਇੱਕ ਭਾਰਤੀ ਟੁਕੜੀ ਨੂੰ ਹਿਰਾਸਤ ਵਿੱਚ ਲਏ ਜਾਣ ਬਾਰੇ ਮੀਡੀਆ ਰਿਪੋਰਟਾਂ ਨੂੰ ਗ਼ਲਤ ਕਰਾਰ ਦਿੱਤਾ ਹੈ।
ਲਾਈਨ ਆਫ਼ ਐਕਚੂਅਲ ਕੰਟਰੋਲ (ਐਲ ਏ ਸੀ) ਉੱਤੇ ਲੱਦਾਖ਼ ਦੀਆਂ ਚਾਰ ਥਾਵਾਂ ਉੱਤੇ ਵੱਧਦੇ ਤਣਾਅ ਦੌਰਾਨ ਭਾਰਤੀ ਫ਼ੌਜ ਦੇ ਇੱਕ ਬੁਲਾਰੇ ਨੇ ਕਿਹਾ ਕਿ ਸਰਹੱਦ ਉਤੇ ਕਿਸੇ ਵੀ ਭਾਰਤੀ ਫ਼ੌਜੀ ਨੂੰ ਹਿਰਾਸਤ 'ਚ ਨਹੀਂ ਲਿਆ ਗਿਆ। ਅਸੀਂ ਇਸ ਨੂੰ ਮੂਲ ਰੂਪ 'ਚ ਰੱਦ ਕਰਦੇ ਹਾਂ। ਉਨ੍ਹਾਂ ਕਿਹਾ ਕਿ ਮੀਡੀਆ 'ਚ ਛਪਦੀਆਂ ਅਜਿਹੀਆਂ ਖ਼ਬਰਾਂ ਦੇਸ਼ ਦੇ ਹਿੱਤਾਂ ਨੂੰ ਨੁਕਸਾਨ ਪੁਚਾ ਸਕਦੀਆਂ ਹਨ। ਇਸ ਤੋਂ ਬਾਅਦ ਇਹ ਖ਼ਬਰ ਆਈ ਕਿ ਐਲ ਏ ਸੀ ਉਤੇ ਪੂਰਬੀ ਲੱਦਾਖ਼ ਖੇਤਰ ਦੀ ਇੱਕ ਝੀਲ ਪੈਗੋਗ ਤਸੋ ਵਿੱਚ ਚੀਨੀ ਫ਼ੌਜ ਨੇ ਭਾਰਤੀ ਸੈਨਿਕਾਂ ਨੂੰ ਜ਼ਬਤ ਕੀਤੇ ਹਥਿਆਰਾਂ ਨਾਲ ਵਾਪਸ ਛੱਡ ਦਿੱਤਾ ਹੈ, ਜਿੱਥੇ 5 ਅਤੇ 6 ਮਈ ਨੂੰ ਹੱਥੋਪਾਈ ਹੋਈ ਸੀ।
ਇਹ ਕਿਹਾ ਗਿਆ ਸੀ ਕਿ ਗਲਵਾਨ ਘਾਟੀ ਵਿੱਚ ਚੀਨ ਨੇ ਪਿਛਲੇ 2 ਹਫ਼ਤਿਆਂ ਅੰਦਰ ਕਰੀਬ 100 ਟੈਂਟ ਗੱਡ ਦਿੱਤੇ ਹਨ। ਉਹ ਹੋਰ ਮਸ਼ੀਨਰੀ ਵੀ ਇਥੇ ਲਿਆ ਰਿਹਾ ਹੈ, ਜੋ ਸ਼ਾਇਦ ਬੰਕਰ ਬਣਾਉਣ 'ਚ ਇਸਤੇਮਾਲ ਹੋਵੇ। ਭਾਰਤ ਵੀ ਪੈਂਗੋਂਗ ਝੀਲ ਤੇ ਇਸਤੇਮਾਲ ਹੋਵੇ। ਭਾਰਤ ਵੀ ਪੈਂਗੋਂਗ ਝੀਲ ਤੇ ਗਲਵਾਨ ਘਾਟੀ 'ਚ ਸੈਨਿਕਾਂ ਦੀ ਤਾਇਨਾਤੀ ਲਗਾਤਾਰ ਵਧਾ ਰਿਹਾ ਹੈ। ਕਈ ਇਲਾਕਿਆਂ 'ਚ ਭਾਰਤ ਦੀ ਸਥਿਤੀ ਚੀਨ ਤੋਂ ਬਿਹਤਰ ਹੈ।