ਪੈਰਿਸ, 7 ਮਈ (ਪੋਸਟ ਬਿਊਰੋ): ਚੀਨ ਦੇ ਰਾਸ਼ਟਰਪਤੀ ਸ਼ੀ ਜਿਨਪਿੰਗ ਫਰਾਂਸ ਦੇ 2 ਦਿਨਾਂ ਦੌਰੇ 'ਤੇ ਹਨ। ਇਸ ਦੌਰਾਨ ਤਿੱਬਤੀਆਂ ਨੇ ਸੋਮਵਾਰ ਨੂੰ ਪੈਰਿਸ 'ਚ ਉਨ੍ਹਾਂ ਖਿਲਾਫ ਪ੍ਰਦਰਸ਼ਨ ਕੀਤਾ। ਤਿੱਬਤ ਦੀ ਆਜ਼ਾਦੀ ਦੀ ਮੰਗ ਕਰਦੇ ਹੋਏ ਪ੍ਰਦਰਸ਼ਨਕਾਰੀਆਂ ਨੇ ਰਾਸ਼ਟਰਪਤੀ ਸ਼ੀ ਜਿਨਪਿੰਗ ਦੇ ਕਾਫਲੇ ਨੂੰ 'ਫ੍ਰੀ ਤਿੱਬਤ' ਝੰਡੇ ਦਿਖਾਏ। ਇਸ ਤੋਂ ਇਲਾਵਾ ਉਈਗਰ ਮੁਸਲਿਮ ਭਾਈਚਾਰੇ ਨੇ ਵੀ ਜਿਨਪਿੰਗ ਦੇ ਫਰਾਂਸ ਦੌਰੇ 'ਤੇ ਮਨੁੱਖੀ ਅਧਿਕਾਰਾਂ ਦੀ ਉਲੰਘਣਾ ਦਾ ਦੋਸ਼ ਲਗਾ ਕੇ ਵਿਰੋਧ ਕੀਤਾ।
ਦਰਅਸਲ 23 ਮਈ 1951 ਨੂੰ ਚੀਨ ਨੇ ਤਿੱਬਤ 'ਤੇ ਜ਼ਬਰਦਸਤੀ ਕਬਜ਼ਾ ਕਰ ਲਿਆ ਸੀ। ਉਦੋਂ ਤੋਂ ਤਿੱਬਤ ਦੇ ਲੋਕ ਵੱਖ-ਵੱਖ ਮੰਚਾਂ ਤੋਂ ਲਗਾਤਾਰ ਇਸ ਦਾ ਵਿਰੋਧ ਕਰ ਰਹੇ ਹਨ। ਜਿਨਪਿੰਗ 2019 ਤੋਂ ਬਾਅਦ ਪਹਿਲੀ ਵਾਰ ਯੂਰਪ ਦਾ ਦੌਰਾ ਕਰ ਰਹੇ ਹਨ। ਇਸ ਫੇਰੀ ਦੇ ਵਿਰੋਧ ਵਿੱਚ ਸਟੂਡੈਂਟਸ ਫਾਰ ਏ ਫ੍ਰੀ ਤਿੱਬਤ (ਐਸਐਫਟੀ) ਨਾਮਕ ਸੰਗਠਨ ਨੇ ਚੀਨ ਖਿਲਾਫ ਬੈਨਰ ਅਤੇ ਝੰਡੇ ਲਹਿਰਾਏ। ਇਸ ਮਗਰੋਂ ਪੁਲਿਸ ਨੇ ਦੋ ਵਰਕਰਾਂ ਨੂੰ ਹਿਰਾਸਤ ਵਿੱਚ ਲੈ ਲਿਆ।