ਵਾਸ਼ਿੰਗਟਨ, 9 ਦਸੰਬਰ (ਪੋਸਟ ਬਿਊਰੋ)- ਇਸ ਸਾਲ ਵਿਦੇਸ਼ ਤੋਂ ਪੈਸਾ ਪ੍ਰਾਪਤ ਕਰਨ ਵਾਲੇ ਦੇਸ਼ਾਂ ਵਿੱਚ ਭਾਰਤ ਚੋਟੀ 'ਤੇ ਰਿਹਾ ਹੈ। ਸਾਲ 2018 ਵਿੱਚ ਪਰਵਾਸੀ ਭਾਰਤੀਆਂ ਨੇ ਅੱਸੀ ਅਰਬ ਡਾਲਰ ਭਾਰਤ ਵਿੱਚ ਭੇਜ ਹਨ।
ਵਿਸ਼ਵ ਬੈਂਕ ਨੇ ਸ਼ਨੀਵਾਰ ਨੂੰ ਜਾਰੀ ਆਪਣੀ ਰਿਪੋਰਟ ਵਿੱਚ ਦੱਸਿਆ ਕਿ ਇਸ ਕੰਮ ਵਿੱਚ ਭਾਰਤ ਮਗਰੋਂ ਚੀਨ (67 ਅਰਬ ਡਾਲਰ), ਮੈਕਸੀਕੋ (34 ਅਰਬ ਡਾਲਰ), ਫਿਲਪੀਨ (34 ਅਰਬ ਡਾਲਰ) ਤੇ ਮਿਸਰ (26 ਅਰਬ ਡਾਲਰ) ਦਾ ਸਥਾਨ ਆਉਂਦਾ ਹੈ। ਬੈਂਕ ਨੇ ਇਸ ਅਨੁਮਾਨ ਵਿੱਚ ਕਿਹਾ ਹੈ ਕਿ ਵਿਕਾਸਸ਼ੀਲ ਦੇਸ਼ਾਂ ਨੂੰ ਅਧਿਕਾਰਕ ਰੂਪ ਤੋਂ ਭੇਜਿਆ ਗਿਆ ਧਨ 2018 ਵਿੱਚ 10.8 ਫੀਸਦੀ ਵੱਧ ਕੇ 528 ਅਰਬ ਡਾਲਰ ਦੇ ਰਿਕਾਰਡ ਪੱਧਰ 'ਤੇ ਪੁੱਜ ਗਿਆ ਹੈ। ਪਿਛਲੇ ਸਾਲ ਇਸ ਵਿੱਚ 7.8 ਫੀਸਦੀ ਵਾਧਾ ਦਰਜ ਕੀਤਾ ਗਿਆ ਸੀ। ਦੁਨੀਆ ਭਰ ਦੇ ਦੇਸ਼ਾਂ ਨੂੰ ਭੇਜਿਆ ਜਾਣ ਵਾਲਾ ਧਨ ਇਸ ਦੌਰਾਨ 10.3 ਫੀਸਦੀ ਵੱਧ ਕੇ 689 ਅਰਬ ਡਾਲਰ ਹੋਣ ਦੀ ਆਸ ਹੈ। ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਪਿਛਲੇ ਤਿੰਨ ਸਾਲਾਂ ਵਿੱਚ ਵਿਦੇਸ਼ ਤੋਂ ਭਾਰਤ ਨੂੰ ਭੇਜੇ ਗਏ ਧਨ ਵਿੱਚ ਮਹੱਤਵ ਪੂਰਨ ਵਾਧਾ ਹੋਇਆ ਹੈ। 2016 ਵਿੱਚ ਇਹ 62.7 ਅਰਬ ਡਾਲਰ ਸੀ। 2017 ਵਿੱਚ ਇਹ ਵੱਧ ਕੇ 65.3 ਅਰਬ ਡਾਲਰ ਹੋ ਗਿਆ। 2017 ਵਿੱਚ ਵਿਦੇਸ਼ ਤੋਂ ਭੇਜੇ ਗਏ ਧਨ ਦੀ ਜੀ ਡੀ ਪੀ ਵਿੱਚ 2.7 ਫੀਸਦੀ ਹਿੱਸੇਦਾਰੀ ਸੀ। ਬੈਂਕ ਨੇ ਕਿਹਾ ਹੈ ਕਿ ਬੰਗਲਾ ਦੇਸ਼ ਤੇ ਪਾਕਿ ਵਿੱਚ ਉਨ੍ਹਾਂ ਦੇ ਪਰਵਾਸੀ ਨਾਗਰਿਕਾਂ ਵੱਲੋਂ ਭੇਜੇ ਜਾਣ ਵਾਲੇ ਧਨ ਵਿੱਚ 17.9 ਅਤੇ 6.2 ਫੀਸਦੀ ਦਾ ਵਾਧਾ ਦਰਜ ਕੀਤਾ ਗਿਆ ਹੈ। ਵਿਸ਼ਵ ਬੈਂਕ ਨੇ ਕਿਹਾ ਹੈ ਕਿ ਵਿਕਸਿਤ ਦੇਸ਼ਾਂ ਖਾਸ ਕਰ ਕੇ ਅਮਰੀਕਾ ਵਿੱਚ ਆਰਥਿਕ ਪ੍ਰਸਥਿਤੀਆਂ ਵਿੱਚ ਮਜ਼ਬੂਤੀ ਅਤੇ ਤੇਲ ਦੀਆਂ ਕੀਮਤਾਂ ਵਿੱਚ ਵਾਧੇ ਦਾ ਸੰਯੁਕਤ ਅਰਬ ਅਮੀਰਾਤ ਵਰਗੇ ਜੀ ਸੀ ਸੀ ਦੇਸ਼ਾਂ ਤੋਂ ਨਿਕਾਸੀ 'ਤੇ ਸਕਾਰਾਤਮਕ ਪ੍ਰਭਾਵ ਨਾਲ ਧਨ ਲੈਣ-ਦੇਣ ਵਿੱਚ ਵਾਧਾ ਹੋਇਆ ਹੈ।