ਲੁਧਿਆਣਾ, 6 ਦਸੰਬਰ (ਪੋਸਟ ਬਿਊਰੋ)- ਸ਼੍ਰੋਮਣੀ ਅਕਾਲੀ ਦਲ ਦੇ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਦੇ ਅਤਿ ਨਜ਼ਦੀਕੀ ਅਤੇ ਦਿੱਲੀ ਗੁਰਦੁਆਰਾ ਮੈਨੇਜਮੈਂਟ ਕਮੇਟੀ ਦੇ ਪ੍ਰਧਾਨ ਮਨਜਿੰਦਰ ਸਿੰਘ ਸਿਰਸਾ ਨੇ ਅਕਾਲੀ ਦਲ ਛੱਡ ਕੇ ਭਾਜਪਾ ਵਿੱਚ ਜਾਣ ਤੋਂ ਬਾਅਦ ਪਹਿਲੀ ਵਾਰ ਅਕਾਲੀ ਦਲ ਉੱਤੇ ਚੋਟ ਕਰਦਿਆਂ ਜੋ ਅਕਾਲੀ ਦਲ ਨੂੰ ਨਸੀਹਤਾਂ ਦਿੱਤੀਆਂ ਹਨ, ਉਸ ਤੋਂ ਲੱਗਦਾ ਹੈ ਅਕਾਲੀ ਦਲ ਵਿੱਚ ਰਹਿੰਦੇ ਹੋਏ ਉਨ੍ਹਾਂ ਦੀਆਂ ਨਸੀਹਤਾਂ ਉੱਤੇ ਅਕਾਲੀਆਂ ਨੇ ਅਮਲ ਨਹੀਂ ਕੀਤਾ, ਜਿਸ ਕਰ ਕੇ ਸਿਰਸਾ ਨੇ ਅਕਾਲੀ ਦਲ ਉੱਤੇ ਬਿਜਲੀ ਸੁੱਟਣ ਵਰਗੀ ਕਾਰਵਾਈ ਕੀਤੀ ਹੈ।
ਸਿਰਸਾ ਨੇ ਕਿਹਾ ਕਿ ਮੈਨੂੰ ਭਾਜਪਾ ਧੱਕੇ ਨਾਲ ਜਾਂ ਡਰਾ-ਧਮਕਾ ਕੇ ਨਹੀਂ ਲੈ ਗਈ, ਮੈਂ ਇੱਛਾ ਅਨੁਸਾਰ ਸ਼ਾਮਲ ਹੋਇਆ ਹਾਂ।ਜੇ ਭਾਜਪਾ ਧੱਕੇ ਨਾਲ ਲੈ ਕੇ ਜਾਣਾ ਚਾਹੁੰਦੀ ਤਾਂ ਉਹ ਦਿੱਲੀ ਦੀ ਕਮੇਟੀ ਵੀ ਲਿਜਾ ਸਕਦੀ ਸੀ। ਉਨ੍ਹਾਂ ਕਿਹਾ ਕਿ ਅਕਾਲੀ ਦਲ ਨੂੰ ਪਹਿਲਾਂ ਵੀ ਟਕਸਾਲੀ ਆਗੂ ਛੱਡ ਕੇ ਜਾ ਚੁੱਕੇ ਹਨ, ਜਿਨ੍ਹਾਂ ਨੇ ਬੇਅਦਬੀ, ਨਸ਼ਾ, ਇੱਕ ਪਰਵਾਰ ਉੱਤੇ ਕੇਂਦਰਤ ਅਕਾਲੀ ਦਲ ਅਤੇ ਹੋਰ ਕਈ ਦੋਸ਼ ਲਾਏ ਹਨ, ਪਰ ਮੈਂ ਦੋਸ਼ ਨਹੀਂ ਲਾ ਕੇ ਗਿਆ।ਉਨ੍ਹਾਂ ਨਾਲ ਹੀ ਕਿਹਾ ਕਿ ਅਕਾਲੀ ਦਲ ਹੁਣ ਮਸਲੇ ਹੱਲ ਕਰਾਉਣ ਦੇ ਸਮਰੱਥ ਨਹੀਂ, ਇਸ ਲਈ ਮੈਂ ਵੱਡੀ ਪਾਰਟੀ ਵਿੱਚ ਜਾ ਕੇ ਸਿੱਖ ਮਸਲੇ ਹੱਲ ਕਰਨ ਲਈ ਇਹ ਉਡਾਰੀ ਮਾਰੀ ਹੈ। ਸਿਰਸਾ ਦੀ ਇਸ ਨਸੀਹਤ ਨੂੰ ਲੈ ਕੇ ਵਿਆਹਾਂ-ਸ਼ਾਦੀਆਂ ਅਤੇ ਭੋਗਾਂ-ਸੋਗਾਂ ਉੱਤੇ ਹਰ ਜ਼ੁਬਾਨ ਉੱਤੇ ਚਰਚਾਵਾਂ ਲਗਾਤਾਰ ਹੋ ਰਹੀਆਂ ਹਨ।