ਅਟਾਰੀ, 6 ਦਸੰਬਰ (ਪੋਸਟ ਬਿਊਰੋ)- ਅਟਾਰੀ ਸਰਹੱਦ ਦੇ ਬਾਹਰ 72 ਦਿਨਾਂ ਤੋਂ ਬੇਘਰੇ ਬੈਠੇ 99 ਪਾਕਿਸਤਾਨੀ ਹਿੰਦੂ ਪਰਵਾਰ ਵਤਨ ਪਰਤਣਾ ਚਾਹੁੰਦੇ ਹਨ, ਪਰ ਹਾਲੇ ਉਨ੍ਹਾਂ ਦੀ ਸੁਣਵਾਈ ਨਹੀਂ ਹੋਈ। ਇਹ ਪਾਕਿਸਤਾਨੀ ਹਿੰਦੂ ਨਾਗਰਿਕ ਅਟਾਰੀ ਸਰਹੱਦ ਦੇ ਬਾਹਰ ਆਪਣਾ ਰੈਣਬਸੇਰਾ ਬਣਾਈ ਬੈਠੇ ਹਨ, ਜਿਨ੍ਹਾਂ ਵਿੱਚ 48 ਬੱਚੇੇ ਵੀ ਹਨ। ਬੀਤੇ ਦਿਨ ਇਨ੍ਹਾਂ ਪਰਵਾਰਾਂ ਵਿੱਚ ਸ਼ਾਮਲ ਨਿੰਬੂ ਬਾਈ ਨਾਂਅ ਦੀ ਔਰਤ ਨੇ ਇੱਕ ਬੱਚੇ ਨੂੰ ਜਨਮ ਦਿੱਤਾ ਹੈ।
ਨਵਜੰਮੇ ਬੱਚੇ ਦੇ ਪਿਤਾ ਬਾਲਮ ਰਾਮ ਪਿੰਡ ਰਾਜਨਪੁਰ, ਜ਼ਿਲ੍ਹਾ ਰਹਿਮੀਆ, ਪੰਜਾਬ (ਪਾਕਿਸਤਾਨ) ਨੇ ਦੱਸਿਆ ਕਿ ਉਸ ਦੇ ਘਰ ਦੋ ਦਸੰਬਰ ਨੂੰ ਇੱਕ ਲੜਕੇ ਨੇ ਜਨਮ ਲਿਆ ਹੈ। ਅਟਾਰੀ ਬਾਰਡਰ ਉੱਤੇ ਜਨਮੇ ਇਸ ਬੱਚੇ ਦਾ ਨਾਂਅ ਉਨ੍ਹਾਂ ‘ਬਾਰਡਰ’ ਰੱਖਿਆ ਹੈ। ਉਸ ਨੇ ਦੱਸਿਆ ਕਿ ਜਦੋਂ ਬੱਚਾ ਵੱਡਾ ਹੋਵੇਗਾ ਤਾਂ ਉਸ ਨੂੰ ਦੱਸਿਆ ਜਾਵੇਗਾ ਕਿ ਉਸ ਦਾ ਜਨਮ ਬਾਰਡਰ ਉੱਤੇ ਹੋਣ ਕਰ ਕੇ ਬਾਰਡਰ ਨਾਂਅ ਰੱਖਿਆ ਸੀ। ਪਾਕਿਸਤਾਨੀ ਸੂਬਾ ਸਿੰਧ ਤੇ ਪੰਜਾਬ ਦੇ ਇਹ ਹਿੰਦੂ ਯਾਤਰੀ 21 ਸਤੰਬਰ ਨੂੰ ਵਤਨ ਪਰਤਣ ਲਈ ਅਟਾਰੀ ਸਰਹੱਦ ਉੱਤੇ ਪਹੁੰਚੇ ਸਨ, ਪਰ ਪਾਕਿਸਤਾਨ ਜਾਣ ਲਈ ਆਗਿਆ ਤੇ ਜੋਧਪੁਰ (ਰਾਜਸਥਾਨ) ਤੋਂ ਪੁਲਸ ਕਲੀਅਰੈਂਸ ਸਰਟੀਫਿਕੇਟ ਨਾ ਹੋਣ ਕਾਰਨ ਇਨ੍ਹਾਂ ਨੂੰ ਜਾਣ ਤੋਂ ਰੋਕ ਦਿੱਤਾ ਗਿਆ ਸੀ। ਵਰਨਣ ਯੋਗ ਹੈ ਕਿ ਇਨ੍ਹਾਂ ਯਾਤਰੀਆਂ ਵਿੱਚ ਉਹ ਹਿੰਦੂ ਯਾਤਰੀ ਵੀ ਹਨ, ਜੋ 2017 ਵਿੱਚ ਹਰਿਦੁਆਰ ਵਿੱਚ ਤੀਰਥਾਂ ਦੇ ਦਰਸ਼ਨ ਕਰਨ ਲਈ ਪਰਵਾਰਾਂ ਸਮੇਤ ਭਾਰਤ ਆਏ ਸਨ ਤੇ ਕੁਝ ਲਾਕਡਾਊਨ ਲੱਗਣ ਤੋਂ ਪਹਿਲਾਂ ਆਏ ਸਨ, ਪਰ ਵਾਪਸ ਨਹੀਂ ਸਨ ਜਾ ਸਕੇ। ਇਹ ਪਾਕਿਸਤਾਨੀ ਯਾਤਰੀ ਅਟਾਰੀ ਆਉਣ ਤੋਂ ਪਹਿਲਾਂ ਜੋਧਪੁਰ, ਰਾਜਸਥਾਨ ਵਿੱਚ ਰਹਿ ਰਹੇ ਸਨ।