ਚੰਡੀਗੜ੍ਹ, 6 ਦਸੰਬਰ (ਪੋਸਟ ਬਿਊਰੋ)- ਪੰਜਾਬ ਦੀਆਂ ਕਿਸਾਨ ਬੀਬੀਆਂ ਜਰਨੈਲ ਕੌਰ ਤੇ ਬਲਵੀਰ ਕੌਰ ਅਤੇ ਹੋਰਨਾਂ ਨੇ ਅਦਾਕਾਰਾ ਕੰਗਣਾ ਰਣੌਤ ਨੂੰ ਚੁਣੌਤੀ ਦਿੱਤੀ ਹੈ ਕਿ ਉਹ ਅਗਲੀ ਵਾਰ ਪੰਜਾਬ ਵਿੱਚ ਪੈਰ ਧਰ ਕੇ ਦਿਖਾਵੇ।
ਇਨ੍ਹਾਂ ਦੋਵਾਂ ਬੀਬੀਆਂ ਨੇ ਬੀਬੀ ਤਿੰਨ ਦਸੰਬਰ ਨੂੰ ਕੰਗਣਾ ਰਣੌਤ ਦੀ ਘੇਰਾਬੰਦੀ ਕੀਤੀ ਤੇ ਉਸ ਨੂੰ ਸਿੱਧੇ ਸੁਆਲ ਕੀਤੇ ਸਨ। ਓਦੋਂ ਕੰਗਣਾ ਨੇ ਇਨ੍ਹਾਂ ਬੀਬੀਆਂ ਤੋਂ ਮੁਆਫੀ ਮੰਗੀ ਸੀ, ਪਰ ਪਿੱਛੋਂ ਆਖ ਦਿੱਤਾ ਕਿ ਉਸ ਨੇ ਕਿਸੇ ਤੋਂ ਕੋਈ ਮੁਆਫੀ ਨਹੀਂ ਮੰਗੀ ਅਤੇ ਨਾ ਉਸ ਨੂੰ ਮੁਆਫੀ ਮੰਗਣ ਲਈ ਕਿਹਾ ਗਿਆ ਸੀ। ਕੰਗਣਾ ਦੇ ਬਿਆਨ ਪਿੱਛੋਂ ਦੋਵਾਂ ਬੀਬੀਆਂ ਨੂੰ ਗੁੱਸਾ ਚੜ੍ਹ ਗਿਆ ਅਤੇ ਰੋਪੜ ਜ਼ਿਲ੍ਹੇ ਦੇ ਪਿੰਡ ਬੜਵਾ ਦੀਆਂ ਵਸਨੀਕਇਨ੍ਹਾਂ ਬੀਬੀਆਂ ਨੇ ਕੰਗਣਾ ਨੂੰ ਚੁਣੌਤੀ ਦੇ ਦਿੱਤੀ ਹੈ ਕਿ ਉਹ ਅਗਲੀ ਵਾਰ ਪੰਜਾਬ ਵੜ ਕੇ ਵਿਖਾਵੇ। ਵਰਨਣ ਯੋਗ ਹੈ ਕਿ ਇਨ੍ਹਾਂ ਹੀ ਬੀਬੀਆਂ ਨੇ ਗੁਪਤ ਅਪਰੇਸ਼ਨ ਚਲਾ ਕੇ ਪਿਛਲੀ ਵਾਰ ਕੰਗਣਾ ਨੂੰ ਘੇਰਿਆ ਸੀ। ਇਨ੍ਹਾਂ ਬੀਬੀਆਂ ਨੇ ਕਿਹਾ ਕਿ ਕੰਗਣਾ ਸਾਡੀ ਸ਼ਰਾਫਤ ਦਾ ਫਾਇਦਾ ਉਠਾ ਗਈ ਅਤੇ ਅਗਲੀ ਵਾਰੀ ਉਸ ਤੋਂ ਲਿਖਤੀ ਮੁਆਫੀ ਮੰਗਵਾਈ ਜਾਵੇਗੀ। ਉਹ ਕੰਗਣਾ ਦੇ ਘਿਰਾਓ ਲਈ ਮੁਹਾਲੀ ਹਵਾਈ ਅੱਡੇ ਤਕ ਵੀ ਜਾਣਗੀਆਂ। ਜਰਨੈਲ ਕੌਰ ਵਿਧਵਾ ਕਿਸਾਨ ਔਰਤ ਹੈ ਜਿਸ ਦਾ ਪਤੀ ਉਦੋਂ ਗੁਜ਼ਰ ਗਿਆ ਸੀ, ਜਦੋਂ ਉਸ ਦੇ ਬੱਚੇ ਛੋਟੇ ਸਨ। ਇਸ ਔਰਤ ਨੇ ਖੁਦ ਖੇਤੀ ਵਿੱਚ ਪਸੀਨਾ ਵਹਾਇਆ। ਉਸ ਦੀ ਇੱਕ ਲੜਕੀ ਦੀ ਮੌਤ ਹੋ ਚੁੱਕੀ ਹੈ ਅਤੇ ਇੱਕ ਲੜਕਾ ਹੈ, ਜੋ ਖੇਤੀ ਕਰਦਾ ਹੈ। ਜਰਨੈਲ ਕੌਰ ਨੇ ਕਿਹਾ ਕਿ ਮਰੇ-ਮੁੱਕਰੇ ਦਾ ਕੋਈ ਇਲਾਜ ਨਹੀਂ, ਪਰ ਕੰਗਣਾ ਇਹ ਚੇਤੇ ਰੱਖੇ ਕਿ ਉਹ ਪੰਜਾਬ ਵਿੱਚ ਆਉਣ ਦਾ ਸੁਫਨਾ ਵੀ ਨਾ ਲਵੇ। ਉਨ੍ਹਾਂ ਕਿਹਾ ਕਿ ਕੰਗਣਾ ਨੇ ਖੁਦ ਮੁਆਫੀ ਮੰਗ ਕੇ ਜੈਕਾਰਾ ਛੱਡਿਆ ਸੀ, ਬਾਅਦ ਵਿੱਚ ਮੁੱਕਰ ਗਈ ਤਾਂ ਐਤਕੀਂ ਕੰਗਣਾ ਨੂੰ ਮੁਆਫੀਨਾਮਾ ਲਿਖਤੀ ਦੇਣਾ ਪੈਣਾ ਹੈ।
ਬਲਵੀਰ ਕੌਰ ਦਾ ਕਹਿਣਾ ਸੀ ਕਿ ਜਦੋਂ ਕੰਗਣਾ ਘੇਰੀ ਸੀ ਤਾਂ ਕਹਿੰਦੀ ਸੀ ਕਿ ‘ਤੁਸੀਂ ਮੇਰੀ ਮਾ ਵਰਗੀਆਂ ਹੋ।' ਉਨ੍ਹਾਂ ਤਿੰਨ ਦਸੰਬਰ ਨੂੰ ਕੰਗਣਾ ਨੂੰ ਪੇਸ਼ਕਸ਼ ਕੀਤੀ ਸੀ ਕਿ ਉਹ ਸਾਡੇ ਖੇਤਾਂ ਵਿੱਚ ਇੱਕ ਘੰਟਾ ਕੰਮ ਕਰ ਕੇ ਦਿਖਾਵੇ ਅਤੇ ਉਸ ਨੂੰ ਭਾੜੇ ਵਜੋਂ ਘੰਟੇ ਦੇ 2500 ਰੁਪਏ ਦਿੱਤੇ ਜਾਣਗੇ। ਬਲਵੀਰ ਕੌਰ ਨੇ ਕਿਹਾ: ਕੰਗਣਾ ਪੰਜਾਬ ਆ ਕੇ ਦਿਖਾਵੇ, ਉਹ ਜਨਤਕ ਤੌਰ ਉੱਤੇ ਲਿਖਤੀ ਮੁਆਫੀ ਮੰਗਵਾਉਣਗੀਆਂ।