ਨਵੀਂ ਦਿੱਲੀ, 5 ਦਸੰਬਰ (ਪੋਸਟ ਬਿਊਰੋ)- ਦਿੱਲੀ ਵਿੱਚ ਟਰਾਂਸਪੋਰਟ ਵਿਭਾਗ ਨੇ ਵਾਹਨਾਂ ਦੀ ਰਜਿਸਟ੍ਰੇਸ਼ਨ ਲਈ ‘ਐਸ ਈ ਐਕਸ’ ਅੱਖਰਾਂ ਵਾਲੀ ਸੀਰੀਜ਼ ਉੱਤੇ ਰੋਕ ਲਾ ਦਿੱਤੀ ਹੈ ਅਤੇ ਇਸ ਦੇ ਨੰਬਰ ਜਾਰੀ ਨਹੀਂ ਹੋਣਗੇ। ਵਿਭਾਗ ਨੇ ਹਾਲੇ ਤਕ ਇਸ ਸੀਰੀਜ਼ ਦੇ ਜਾਰੀ ਹੋ ਚੁੱਕੇ ਨੰਬਰਾਂ ਵਾਲੇ ਲੋਕਾਂ ਨੂੰ ਵਾਹਨਾਂ ਦੇ ਨੰਬਰ ਬਦਲਣ ਦੀ ਆਫਰ ਦਿੱਤੀ ਹੈ।
ਇਸ ਬਾਰੇਇੱਕ ਮਾਮਲਾ ਸਾਹਮਣੇ ਆਉਣ ਉੱਤੇਇਹ ਫੈਸਲਾ ਹੋਇਆ ਹੈ। ਦਿੱਲੀ ਮਹਿਲਾ ਕਮਿਸ਼ਨ ਨੇ ਇੱਕ ਵਿਦਿਆਰਥਣ ਦੀ ਸ਼ਿਕਾਇਤ ਉੱਤੇ ਟਰਾਂਸਪੋਰਟ ਵਿਭਾਗ ਨੂੰ ਨੋਟਿਸ ਭੇਜਿਆ ਸੀ।ਮਿਲੀ ਜਾਣਕਾਰੀ ਅਨੁਸਾਰ ਦਿੱਲੀ ਦੀ ਇੱਕ ਵਿਦਿਆਰਥਣ ਨੇ ਪਿੱਛੇ ਜਿਹੇ ਸਕੂਟਰੀ ਖਰੀਦੀ ਤਾਂ ਉਸ ਨੂੰ ਮਿਲਿਆ ਸਕੂਟਰੀ ਦਾ ਨੰਬਰ ਦੇਖ ਕੇ ਸ਼ਰਮ ਆਉਣ ਲੱਗੀ। ਉਹ ਨਵੀਂ ਸਕੂਟਰੀ ਲੈ ਕੇ ਬਾਹਰ ਜਾਣ ਤੋਂ ਪ੍ਰਹੇਜ਼ ਕਰਨ ਲੱਗੀ।ਇਹ ਸਕੂਟਰੀ ਉਸ ਦੇ ਪਿਤਾ ਨੇ ਉਸ ਲੜਕੀ ਨੂੰ ਉਸ ਦੇ ਜਨਮ ਦਿਨ ਉੱਤੇ ਦਿੱਤੀ ਸੀ। ਇਸ ਨੰਬਰ ਦੀ ਸੀਰੀਜ਼ ਵਿੱਚ ਐਸ ਈ ਐਕਸ ਸੀ, ਜਿਹੜਾ (ਸੈਕਸ) ਜਾਪਦਾ ਸੀ ਤੇ ਇਸ ਕਾਰਨ ਹਰ ਕੋਈ ਪ੍ਰੇਸ਼ਾਨ ਸੀ। ਇਹ ਨੰਬਰ ਦੇਖ ਕੇ ਕੁਝ ਲੋਕ ਕੁਮੈਂਟ ਕਰਨ ਲੱਗੇ ਤਾਂ ਪਰਵਾਰ ਨੂੰ ਪ੍ਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪੈ ਰਿਹਾ ਸੀ।ਇਸ ਬਾਰੇ ਜਦੋਂ ਸ਼ਿਕਾਇਤ ਦਿੱਲੀ ਮਹਿਲਾ ਕਮਿਸ਼ਨ ਕੋਲ ਪਹੁੰਚੀ ਤਾਂ ਮਹਿਲਾ ਕਮਿਸ਼ਨ ਨੇ ਇਸ ਬਾਰੇ ਰੀਜਨਲ ਟਰਾਂਸਪੋਰਟ ਅਥਾਰਟੀ ਤੋਂ ਸਪੱਸ਼ਟੀਕਰਨ ਮੰਗਿਆ। ਇਸ ਤੋਂ ਬਾਅਦ ਸਰਕਾਰ ਵੀ ਚੌਕਸ ਹੋਈ ਅਤੇ ਪਹਿਲ ਕਰਦਿਆਂ ਇਸ ਪੂਰੀ ਲੜੀ ਉੱਤੇ ਪਾਬੰਦੀ ਲਗਵਾ ਦਿੱਤੀ ਹੈ।