ਲੰਡਨ, 5 ਦਸੰਬਰ (ਪੋਸਟ ਬਿਊਰੋ)- ਬ੍ਰਿਟੇਨ ਵਿੱਚ ਇੱਕ ਵਿਅਕਤੀ ਦੂਸਰੇ ਵਿਸ਼ਵ ਯੁੱਧ ਦੇ ਦੌਰ ਦੇ ਟੈਂਕ ਤਬਾਹ ਕਰਨ ਵਾਲੀ ਇੱਕ ਗੋਲੀ ਉੱਤੇ ਜਾ ਡਿੱਗਾ ਤਾਂ ਗੋਲੀ ਦਾ ਨੁਕੀਲਾ ਸਿਰਾ ਉਸ ਦੇ ਸਰੀਰ ਵਿੱਚ ਧਸ ਗਿਆ। ਜ਼ਖਮੀ ਹਾਲਤ ਵਿੱਚ ਹਸਪਤਾਲ ਪਹੁੰਚੇ ਇਸ ਮਰੀਜ਼ ਲਈ ਡਾਕਟਰਾਂ ਨੇ ਬ੍ਰਿਟਿਸ਼ ਆਰਮੀ ਦਾ ਬੰਬ ਡਿਸਪੋਜ਼ਲ ਸਕੁਐਡ ਬੁਲਾਇਆ।
ਅਸਲ ਵਿੱਚ ਡਾਕਟਰ ਉਸ ਗੋਲੀ ਨੂੰ ਛੂਹਣ ਤੋਂ ਡਰਦੇ ਸਨ, ਜੋ ਲਗਭਗ 56 ਮਿਲੀਮੀਟਰ ਤਕ ਸਰੀਰ ਵਿੱਚ ਖੁਭ ਗਈ ਸੀ। ਘਟਨਾ ਗਲੋਸਟਰਸ਼ਾਇਰ ਰਾਇਲ ਹਸਪਤਾਲ ਦੀ ਹੈ। ਹਸਪਤਾਲ ਦੀ ਦੁਰਘਟਨਾ ਤੇ ਐਮਰਜੈਂਸੀ ਯੂਨਿਟ ਨੇ ਸਥਿਤੀ ਦਾ ਜਾਇਜ਼ਾ ਲੈਣ ਪਿੱਛੋਂ ਫੌਜ ਦਾ ਬੰਬ ਨਕਾਰਾ ਕਰਨ ਵਾਲਾ ਦਸਤਾ ਸੱਦਿਆ। ਜ਼ਖਮੀ ਵਿਅਕਤੀ ਨੇ ਦੱਸਿਆ ਕਿ ਉਹ ਪੁਰਾਣੇ ਜ਼ਮਾਨੇ ਦੇ ਜੰਗੀ ਹਥਿਆਰ ਇਕੱਠੇ ਕਰਨ ਦਾ ਸ਼ੌਕੀਨ ਹੈ। ਇਹ ਗੋਲੀ ਉਸ ਦੇ ਨਿੱਜੀ ਅਸਲੇ ਦਾ ਹਿੱਸਾ ਸੀ। ਉਸ ਨੇ ਇਸ ਅੱਸੀ ਸਾਲ ਪੁਰਾਣੇ ਅਸਲੇ ਨੂੰ ਸਾਫ ਕਰਨ ਲਈ ਕੱਢਿਆ ਸੀ। ਅਚਾਨਕ ਉਸ ਦੀ ਲੱਤ ਫਸ ਗਈ ਤੇ ਉਹ ਬੇਹੋਸ਼ ਹੋ ਕੇ ਗੋਲੇ ਉੱਤੇ ਡਿੱਗ ਪਿਆ। ਡਾਕਟਰਾਂ ਨੇ ਅਪਰੇਸ਼ਨ ਕਰ ਕੇ ਉਸ ਗੋਲੀ ਬਾਹਰ ਕੱਢ ਦਿੱਤੀ ਹੈ।