ਟੋਰਾਂਟੋ, 2 ਦਸੰਬਰ (ਪੋਸਟ ਬਿਊਰੋ) : ਟੋਰਾਂਟੋ ਪਬਲਿਕ ਹੈਲਥ ( ਟੀਪੀਐਚ ) ਵੱਲੋਂ ਓਮਾਈਕ੍ਰੌਨ ਵੇਰੀਐਂਟ ਦੇ ਇੱਕ ਮਾਮਲੇ ਦੀ ਪੁਸ਼ਟੀ ਤੋਂ ਬਾਅਦ ਸਕਾਰਬਰੋ ਸਥਿਤ ਟੋਰਾਂਟੋ ਈਸਟ ਡਿਟੈਂਸ਼ਨ ਸੈਂਟਰ ਵਿੱਚ ਕੋਵਿਡ-19 ਆਊਟਬ੍ਰੇਕ ਐਲਾਨ ਦਿੱਤੀ ਗਈ।
ਪ੍ਰੋਵਿੰਸ ਵੱਲੋਂ ਚਲਾਈ ਜਾਂਦੀ ਇਸ ਫੈਸਿਲਿਟੀ ਉੱਤੇ ਸੱਭ ਤੋਂ ਪਹਿਲਾਂ ਇੱਕ ਸਟਾਫ ਮੈਂਬਰ ਵਿੱਚ ਕੋਵਿਡ-19 ਦੇ ਲੱਛਣ ਪਾਏ ਗਏ ਤੇ ਵੀਰਵਾਰ ਨੂੰ ਇਸ ਦੀ ਹੋਰ ਜਾਂਚ ਕਰਨ ਤੋਂ ਬਾਅਦ ਇਸ ਦੇ ਨਵਾਂ ਕੋਵਿਡ-19 ਵੇਰੀਐਂਟ ਹੋਣ ਦੀ ਪੁਸ਼ਟੀ ਕੀਤੀ ਗਈ। ਵੀਰਵਾਰ ਦੁਪਹਿਰ ਤੱਕ ਜੇਲ੍ਹ ਦੇ ਚਾਰ ਇਨਮੇਟਸ ਵੀ ਕੋਵਿਡ-19 ਪਾਜ਼ੀਟਿਵ ਆ ਗਏ ਪਰ ਅਜੇ ਤੱਕ ਇਹ ਪਤਾ ਨਹੀਂ ਲੱਗ ਸਕਿਆ ਹੈ ਕਿ ਇਹ ਚਾਰੇ ਨਵੇਂ ਵੇਰੀਐਂਟ ਕਾਰਨ ਬਿਮਾਰ ਹੋਏ ਹਨ ਜਾਂ ਪੁਰਾਣੇ ਵੇਰੀਐਂਟ ਕਾਰਨ ਬਿਮਾਰ ਹੋਏ ਹਨ।
ਟੀਪੀਐਚ ਨੇ ਆਖਿਆ ਕਿ ਦਰਹਾਮ ਰੀਜਨ ਹੈਲਥ ਡਿਪਾਰਟਮੈਂਟ ਵੱਲੋਂ ਸਟਾਫ ਮੈਂਬਰ ਦੀ ਜਾਂਚ ਕੀਤੀ ਜਾ ਰਹੀ ਹੈ ਤੇ ਅਜੇ ਤੱਕ ਇਹ ਪਤਾ ਨਹੀਂ ਲੱਗ ਸਕਿਆ ਕਿ ਕੀ ਇਹ ਉਹੀ ਸ਼ਖਸ ਹੈ ਜਿਹੜਾ ਜੀਟੀਏ ਦਾ ਪਹਿਲਾ ਓਮਾਈਕ੍ਰੌਨ ਵੇਰੀਐਂਟ ਵਾਲਾ ਮਾਮਲਾ ਹੈ। ਦਰਹਾਮ ਰੀਜਨ ਦੀ ਪਬਲਿਕ ਹੈਲਥ ਯੂਨਿਟ ਨੇ ਆਖਿਆ ਕਿ ਇਹ ਵਿਅਕਤੀ ਸਾਊਥ ਅਫਰੀਕਨ ਦੇਸ਼ਾਂ ਵਿੱਚੋਂ ਇੱਕ ਤੋਂ ਪਰਤੇ ਸ਼ਖਸ ਦੇ ਨੇੜਲੇ ਸੰਪਰਕ ਵਿੱਚ ਆਇਆ ਸੀ।