ਭੋਪਾਲ, 2 ਦਸੰਬਰ (ਪੋਸਟ ਬਿਊਰੋ)- ਮੱਧ ਪ੍ਰਦੇਸ਼ ਵਿੱਚ ਆਪਣੀ ਤਰ੍ਹਾਂ ਦੇ ਵਿਰਲੇ ਕੇਸ ਵਿੱਚ ਕੱਲ੍ਹ ਇੱਕ ਮਹਿਲਾ ਪੁਲਸ ਕਾਂਸਟੇਬਲ ਨੂੰ ਗ੍ਰਹਿ ਵਿਭਾਗ ਨੇ ਆਪਣਾ ਲਿੰਗ ਪਰਿਵਰਤਨ ਦੀ ਕਾਨੂੰਨੀ ਮਨਜ਼ੂਰੀ ਦੇ ਦਿੱਤੀ ਹੈ। ਲਿੰਗ ਪਰਿਵਰਤਨ ਦੀ ਪ੍ਰਕਿਰਿਆ ਪੂਰੀ ਹੋਣ ਪਿੱਛੋਂ ਇਹ ਮਹਿਲਾ ਪੁਰਸ਼ ਕਾਂਸਟੇਬਲ ਵਜੋਂ ਆਪਣੀ ਪਛਾਣ ਦਰਜ ਕਰਵਾਏਗੀ।
ਇਸ ਰਾਜ ਦੇ ਗ੍ਰਹਿ ਵਿਭਾਗ ਦੇ ਚੀਫ ਸੈਕਟਰੀ ਡਾਕਟਰ ਰਾਜੇਸ਼ ਰਾਜੌਰਾ ਨੇ ਦੱਸਿਆ ਕਿ ਇਹ ਮੱਧ ਪ੍ਰਦੇਸ਼ ਦਾ ਪਹਿਲਾ ਕੇਸ ਹੈ, ਜਿਸ ਵਿੱਚ ਰਾਜ ਸਰਕਾਰ ਨੇ ਕਿਸੇ ਨੂੰ ਲਿੰਗ ਪਰਿਵਰਤਨ ਦੀ ਇਜਾਜ਼ਤ ਦਿੱਤੀ ਹੈ। ਉਨ੍ਹਾਂ ਦੱਸਿਆ ਕਿ ਮਹਿਲਾ ਕਾਂਸਟੇਬਲ ਨੂੰ ਕਾਨੂੰਨੀ ਤੌਰ ਉੱਤੇ ਲਿੰਗ ਪਰਿਵਰਤਨ ਦੀ ਇਜਾਜ਼ਤ ਦਾ ਹੁਕਮ ਕੱਲ੍ਹ ਗ੍ਰਹਿ ਵਿਭਾਗ ਵੱਲੋਂ ਪੁਲਸ ਹੈਡਕੁਆਰਟਰ ਨੂੰ ਭੇਜ ਦਿੱਤਾ ਗਿਆ। ਡਾਕਟਰ ਰਾਜੌਰਾ ਨੇ ਦੱਸਿਆ ਕਿ ਮਹਿਲਾ ਕਾਂਸਟੇਬਲ ਅਮਿਤਾ (ਨਕਲੀ ਨਾਂਅ) ਨੂੰ ਬਚਪਨ ਤੋਂ ‘ਜੈਂਡਰ ਆਈਡੈਂਟਿਟੀ ਡਿਸਆਰਡਰ' ਦੀ ਸਮੱਸਿਆ ਸੀ ਤੇ ਇਸ ਦੀ ਪੁਸ਼ਟੀ ਰਾਸ਼ਟਰੀ ਪੱਧਰ ਦੇ ਮਾਨਸਿਕ ਰੋਗਾਂ ਦੇ ਮਾਹਰ ਨੇ ਕੀਤੀ ਸੀ। ਰਾਜ ਦੇ ਇੱਕ ਜ਼ਿਲ੍ਹਾ ਪੁਲਸ ਬਲ ਵਿੱਚ ਤੈਨਾਤ ਇਹ ਮਹਿਲਾ ਕਾਂਸਟੇਬਲ ਆਪਣੇ ਸਾਰੇ ਕੰਮ ਪੁਰਸ਼ਾਂ ਵਾਂਗ ਹੀ ਕਰਦੀ ਆ ਰਹੀ ਹੈ।