ਸਿੰਗਾਪੁਰ, 1 ਦਸੰਬਰ (ਪੋਸਟ ਬਿਊਰੋ)- ਸਿੰਗਾਪੁਰ ਵਿੱਚ ਇੱਕ 32 ਸਾਲਾ ਭਾਰਤੀ ਟਰੇਨਰ ਦੇ ਖਿਲਾਫ ਇੱਕ ਸਟੂਡੀਓ ਵਿੱਚ ਯੋਗਾ ਸਿਖਾਉਂਦੇ ਹੋਏ ਪੰਜ ਔਰਤਾਂ ਨਾਲ ਛੇੜਛਾੜ ਕਰਨ ਦੇ ਦੋਸ਼ ਹੇਠ ਕੇਸ ਦਰਜ ਕੀਤਾ ਗਿਆ ਹੈ।
ਮਿਲੀ ਖਬਰ ਅਨੁਸਾਰ ਪੀੜਤ ਔਰਤਾਂ ਦੀ ਪਛਾਣ ਇੱਕ ‘ਗੈਗ ਆਰਡਰ’ਵਜੋਂ ਜ਼ਾਹਰ ਨਹੀਂ ਕੀਤੀ ਜਾ ਸਕਦੀ। ਦੋਸ਼ੀ ਦੇ ਖਿਲਾਫ ਜੂਨ 2019 ਅਤੇ ਜੁਲਾਈ 2020 ਵਿਚਾਲੇ ਇੱਕ ਯੋਗਾ ਸਟੂਡੀਓ ਵਿੱਚ 24 ਤੋਂ 29 ਸਾਲ ਉਮਰ ਦੀਆਂ ਔਰਤਾਂ ਨੂੰ ਅਣਉਚਿਤ ਢੰਗ ਨਾਲ ਛੂਹਣ ਦਾ ਦੋਸ਼ ਹੈ। ਪੁਲਸ ਦੇ ਇੱਕ ਪੁਰਾਣੇ ਬਿਆਨ ਅਨੁਸਾਰ ਇਸ ਵਿਅਕਤੀ ਨੇ ਯੋਗਾ ਸਿਖਾਉਂਦੇ ਸਮੇਂ ਇਨ੍ਹਾਂ ਪੀੜਤ ਔਰਤਾਂ ਨਾਲ ਬਦਸਲੂਕੀ ਕੀਤੀ ਸੀ। ਦੋਸ਼ੀ ਨੇ ਜ਼ਿਲ੍ਹਾ ਅਦਾਲਤ ਨੂੰ ਦੱਸਿਆ ਕਿ ਸਿੰਗਾਪੁਰ ਦਾ ਇੱਕ ਦੋਸਤ ਉਸ ਦੀ ਜ਼ਮਾਨਤ ਦੇਵੇਗਾ ਤੇ ਇੱਕ ਵਕੀਲ ਰਾਹੀਂ ਉਹ ਕੇਸ ਦਾਇਰ ਕਰੇਗਾ। ਦੋਸ਼ੀ ਵੀਡੀਓ ਲਿੰਕ ਰਾਹੀਂ ਅਦਾਲਤ ਵਿੱਚ ਪੇਸ਼ ਹੋਇਆ ਤੇ ਉਸ ਨੂੰ 15000 ਸਿੰਗਾਪੁਰ ਡਾਲਰ ਉੱਤੇ ਜ਼ਮਾਨਤ ਮਿਲੀ ਹੈ। ਸਿੰਗਾਪੁਰ ਵਿੱਚ ਛੇੜਛਾੜ ਲਈ ਦੋ ਸਾਲ ਤਕ ਜੇਲ੍ਹ, ਜੁਰਮਾਨਾ, ਬੈਂਤ ਨਾਲ ਮਾਰਨ ਜਾਂ ਕੋਈ ਦੋ ਦੰਡ ਦੇਣ ਦਾ ਪ੍ਰਬੰਧ ਹੈ। ਕੇਸ ਦੀ ਸੁਣਵਾਈ 14 ਦਸੰਬਰ ਤਕ ਮੁਲਤਵੀ ਕੀਤੀ ਗਈ ਹੈ।ਪੁਲਸ ਨੇ ਕਿਹਾ, ‘ਜਿਨਸੀ ਸ਼ੋਸ਼ਣ ਵਾਲੀ ਪ੍ਰਵਿਰਤੀ, ਜਿਸ ਕਾਰਨ ਸਮਾਜ ਦੀ ਨਿੱਜੀ ਸੁਰੱਖਿਆ ਖਤਰੇ ਵਿੱਚ ਹੋਵੇ, ਬਰਦਾਸ਼ਤ ਨਹੀਂ ਕੀਤੀ ਜਾਵੇਗੀ।’