ਓਨਟਾਰੀਓ, 30 ਨਵੰਬਰ (ਪੋਸਟ ਬਿਊਰੋ) : ਓਮਾਈਨੋਕ੍ਰੌਨ ਵੇਰੀਐਂਟ ਦੇ ਹੋਰਨਾਂ ਦੇਸ਼ਾਂ ਵਿੱਚ ਵੀ ਸਾਹਮਣੇ ਆਉਣ ਤੋਂ ਬਾਅਦ ਦ ਸੈਂਟਰਜ਼ ਫੌਰ ਡਜ਼ੀਜ਼ ਕੰਟਰੋਲ ਐਂਡ ਪ੍ਰਿਵੈਂਸ਼ਨ (ਸੀਡੀਸੀ) ਵੱਲੋਂ ਕੋਵਿਡ-19 ਦਾ ਬੂਸਟਰ ਸ਼ੌਟ ਹੁਣ 18 ਪਲੱਸ ਲੋਕਾਂ ਨੂੰ ਲਾਉਣ ਦੀ ਸਿਫਾਰਿਸ਼ ਵੀ ਕੀਤੀ ਜਾ ਰਹੀ ਹੈ।
ਪਹਿਲਾਂ ਏਜੰਸੀ ਵੱਲੋਂ ਬੂਸਟਰ ਸ਼ੌਟ ਸਾਰੇ ਬਾਲਗਾਂ ਲਈ ਮਨਜੂ਼ਰ ਕੀਤਾ ਗਿਆ ਸੀ ਪਰ ਇਸ ਦੀ ਸਿਫਾਰਿਸ਼ 50 ਸਾਲ ਤੋਂ ਉੱਪਰ ਉਮਰ ਦੇ ਲੋਕਾਂ ਜਾਂ ਅਜਿਹੇ ਲੋਕਾਂ ਨੂੰ ਦੇਣ ਦੀ ਸਿਫਾਰਿਸ਼ ਕੀਤੀ ਗਈ ਸੀ ਜਿਹੜੇ ਲਾਂਗ ਟਰਮ ਕੇਅਰ ਸੈਟਿੰਗ ਵਿੱਚ ਰਹਿੰਦੇ ਹਨ। ਸੀਡੀਸੀ ਦੀ ਡਾਇਰੈਕਟਰ ਡਾ· ਰੋਸੇ਼ਲ ਵਾਲੈਂਸਕੀ ਨੇ ਆਖਿਆ ਕਿ ਇਸ ਤੱਥ-ਪੜੱਥੀ ਦਾ ਕਾਰਨ ਓਮਾਈਨਕ੍ਰੌਨ ਵੇਰੀਐਂਟ ਦਾ ਅਚਾਨਕ ਸਾਹਮਣੇ ਆਉਣਾ ਹੈ। ਉਨ੍ਹਾਂ ਆਖਿਆ ਕਿ ਭਾਵੇਂ ਅਜੇ ਅਮਰੀਕਾ ਵਿੱਚ ਇਹ ਸਾਹਮਣੇ ਨਹੀਂ ਆਇਆ ਹੈ ਪਰ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਹੌਲੀ ਹੌਲੀ ਉੱਥੇ ਵੀ ਇਹ ਪਹੁੰਚ ਜਾਵੇਗਾ।
ਉਨ੍ਹਾਂ ਆਖਿਆ ਕਿ 18 ਸਾਲ ਤੇ ਇਸ ਤੋਂ ਵੱਧ ਉਮਰ ਦੇ ਲੋਕਾਂ ਨੂੰ ਫਾਈਜ਼ਰ ਤੇ ਮੌਡਰਨਾ ਦੀਆਂ ਦੋਵੇਂ ਡੋਜ਼ਾਂ ਲਵਾਉਣ ਤੋਂ ਛੇ ਮਹੀਨੇ ਬਾਅਦ ਤੇ ਜੇ ਐਂਡ ਜੇ ਵੈਕਸੀਨ ਲੈਣ ਤੋਂ ਦੋ ਮਹੀਨੇ ਬਾਅਦ ਇਹ ਬੂਸਟਰ ਸ਼ੌਟ ਲਵਾਉਣਾ ਚਾਹੀਦਾ ਹੈ।