ਟੋਰਾਂਟੋ, 29 ਨਵੰਬਰ (ਪੋਸਟ ਬਿਊਰੋ) : ਵਾਅਨ ਵਿੱਚ ਨਸਿ਼ਆਂ ਦੀ ਸਮਗਲਿੰਗ ਦੇ ਮਾਮਲੇ ਦੀ ਚੱਲ ਰਹੀ ਜਾਂਚ ਦੇ ਸਬੰਧ ਵਿੱਚ ਟੋਰਾਂਟੋ ਦੇ 24 ਸਾਲਾ ਵਿਅਕਤੀ ਨੂੰ ਕਈ ਚਾਰਜਿਜ਼ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।
ਸੋਮਵਾਰ ਨੂੰ ਜਾਰੀ ਕੀਤੀ ਗਈ ਨਵੀਂ ਰਲੀਜ਼ ਵਿੱਚ ਯੌਰਕ ਰੀਜਨਲ ਪੁਲਿਸ ਵੱਲੋਂ ਆਖਿਆ ਗਿਆ ਕਿ ਉਨ੍ਹਾਂ ਵੱਲੋਂ ਮਸ਼ਕੂਕ ਡਰੱਗ ਡੀਲਰ ਦੀ ਜਾਣਕਾਰੀ ਹਾਸਲ ਹੋਣ ਤੋਂ ਬਾਅਦ 2021 ਦੀਆਂ ਗਰਮੀਆਂ ਦੇ ਅਖੀਰ ਵਿੱਚ ਜਾਂਚ ਸੁ਼ਰੂ ਕੀਤੀ ਗਈ ਸੀ। ਇਸ ਜਾਂਚ ਤੋਂ ਬਾਅਦ ਮਸ਼ਕੂਕ ਦੀ ਪਛਾਣ ਕਰ ਲਈ ਗਈ ਤੇ 25 ਨਵੰਬਰ ਨੂੰ ਟੋਰਾਂਟੋ ਦੇ ਵਸਨੀਕ ਦੇ ਘਰ ਸਰਚ ਵਾਰੰਟ ਲਿਜਾ ਕੇ ਤਲਾਸ਼ੀ ਲਈ ਗਈ।
ਐਂਥਨੀ ਗਿਆਲੋ ਨਾਰਡੋ ਨੂੰ ਗ੍ਰਿਫਤਾਰ ਕਰਕੇ ਉਸ ਉੱਤੇ ਨਸਿ਼ਆਂ ਦੀ ਸਮਗਲਿੰਗ ਕਰਨ, ਸਮਗਲਿੰਗ ਲਈ ਨਸੇ਼ ਕੋਲ ਰੱਖਣ, ਕੋਕੀਨ ਸਮਗਲ ਕਰਨ ਤੇ ਵੰਡਣ ਲਈ ਆਪਣੇ ਕੋਲ ਮੈਰੀਯੁਆਨਾ ਰੱਖਣ ਦੇ ਦੋਸ਼ ਲਾਏ ਗਏ ਹਨ। ਇਸ ਤੋਂ ਇਲਾਵਾ ਇਸ ਵਿਅਕਤੀ ਦੀ ਲਗਜ਼ਰੀ ਗੱਡੀ ਦਾ ਸਰਚ ਵਾਰੰਟ ਵੀ ਕਢਵਾਇਆ ਗਿਆ। ਇਸ ਵਿਅਕਤੀ ਨਾਲ ਸਬੰਧਤ ਜੈਗੁਆਰ ਵਿੱਚੋਂ ਪੁਲਿਸ ਨੂੰ ਪੰਜ ਗ੍ਰਾਮ ਕੋਕੀਨ, 10 ਐਕਸੈੱਕਸ ਪਿੱਲਜ਼਼, 19 ਪਰਕੋਸੈੱਟ ਪਿੱਲਜ਼ ਤੇ ਪੈਕੇਜਿੰਗ ਵਾਲੀ ਸਮੱਗਰੀ ਵੀ ਮਿਲੀ ਹੈ।