ਕਾਠਮੰਡੂ, 28 ਨਵੰਬਰ (ਪੋਸਟ ਬਿਊਰੋ)- ਨੇਪਾਲ ਦੇ ਸਾਬਕਾ ਪ੍ਰਧਾਨ ਮੰਤਰੀ ਤੇ ਮੁੱਖ ਵਿਰੋਧੀ ਪਾਰਟੀ ਸੀ ਪੀ ਐਨ (ਯੂ ਐਮ ਐਲ) ਦੇ ਚੇਅਰਮੈਨ ਕੇ ਪੀ ਸ਼ਰਮਾ ਓਲੀ ਨੇ ਸ਼ੁੱਕਰਵਾਰ ਨੂੰ ਪ੍ਰਣ ਲਿਆ ਕਿ ਜੇ ਉਨ੍ਹਾਂ ਦੀ ਪਾਰਟੀ ਸੱਤਾ ਵਿੱਚ ਵਾਪਸ ਆਈ ਤਾਂ ਉਹ ਗੱਲਬਾਤ ਰਾਹੀਂ ਕਾਲਾਪਾਣੀ, ਲਿੰਪੀਆਧੁਰਾ ਤੇ ਲਿਪੁਲੇਖ ਨੂੰ ਭਾਰਤ ਤੋਂ ਵਾਪਸ ਲੈ ਲੈਣਗੇ।
ਕਮਿਊਨਿਸਟ ਪਾਰਟੀ ਆਫ ਨੇਪਾਲ (ਯੂਨਾਈਟਿਡ ਮਾਰਕਸਿਟਸ-ਲੈਨੀਨਿਸਟ) ਦੀ 10ਵੀਂ ਜਨਰਲ ਬੈਠਕ ਦਾ ਉਦਘਾਟਨ ਕਰਦੇ ਹੋਏ ਓਲੀ ਨੇ ਕਿਹਾ, ‘‘ਅਸੀਂ ਗੱਲਬਾਤ ਨਾਲ ਸਮੱਸਿਆਵਾਂ ਦੇ ਹੱਲ ਦੇ ਪੱਖ ਵਿੱਚ ਹਾਂ, ਗੁਆਂਢੀ ਦੇਸ਼ਾਂ ਦੇ ਨਾਲ ਦੁਸ਼ਮਣੀ ਦੇ ਪੱਖ ਵਿੱਚ ਨਹੀਂ।'' ਉਨ੍ਹਾਂ ਭਰੋਸਾ ਪ੍ਰਗਟਾਇਆ ਕਿ ਅਗਲੇ ਸਾਲ ਦੀਆਂ ਆਮ ਚੋਣਾਂ ਵਿੱਚ ਸੀ ਪੀ ਐਨ (ਯੂ ਐਮ ਐਲ) ਸਭ ਤੋਂ ਵੱਡੀ ਰਾਜਸੀ ਤਾਕਤ ਵਜੋਂ ਉਭਰੇਗੀ। ਖਾਸ ਮਹਿਮਾਨ ਵਜੋਂ ਪ੍ਰਧਾਨ ਮੰਤਰੀ ਸ਼ੇਰ ਬਹਾਦੁਰ ਦੇਓਬਾ ਨੇ ਦੇਸ਼ ਦੇ ਵਿਕਾਸ ਲਈ ਸਾਰੀਆਂ ਰਾਜਨੀਤਕ ਪਾਰਟੀਆਂ ਨੂੰ ਇੱਕ ਮੰਚ ਉਤੇ ਆਉਣ ਦੀ ਅਪੀਲ ਕੀਤੀ। ਬੈਠਕ ਦੇ ਉਦਘਾਟਨੀ ਪ੍ਰੋਗਰਾਮ ਵਿੱਚ ਨੇਪਾਲ ਦੀਆਂ ਵੱਡੀਆਂ ਰਾਜਸੀ ਪਾਰਟੀਆਂ ਦੇ ਨੇਤਾ, ਬੰਗਲਾ ਦੇਸ਼, ਭਾਰਤ, ਕੰਬੋਡੀਆ ਤੇ ਸ੍ਰੀਲੰਕਾ ਸਮੇਤ ਵੱਖ-ਵੱਖ ਦੇਸ਼ਾਂ ਦੀਆਂ ਸਿਆਸੀ ਪਾਰਟੀਆਂ ਦੇ ਨੁਮਾਇੰਦੇੇ ਵੀ ਸ਼ਾਮਲ ਹੋਏ।