ਓਟਵਾ, 25 ਨਵੰਬਰ (ਪੋਸਟ ਬਿਊਰੋ) : ਮਹਾਂਮਾਰੀ ਦੌਰਾਨ ਜੌਬਲੈੱਸ ਬੈਨੇਫਿਟ ਹਾਸਲ ਕਰਨ ਵਾਲੇ ਕੁੱਝ ਕੈਨੇਡੀਅਨਜ਼ ਨੂੰ ਇਹ ਨੋਟਿਸ ਹਾਸਲ ਹੋਣ ਵਾਲੇ ਹਨ ਕਿ ਪਿਛਲੇ ਸਾਲ ਉਨ੍ਹਾਂ ਨੂੰ ਹਾਸਲ ਹੋਈ ਆਰਥਿਕ ਮਦਦ ਵਿੱਚੋਂ ਉਨ੍ਹਾਂ ਨੂੰ ਸਰਕਾਰ ਨੂੰ ਥੋੜ੍ਹੀ ਰਕਮ ਮੋੜਨੀ ਹੋਵੇਗੀ।
ਦ ਕੈਨੇਡੀਅਨ ਐਮਰਜੰਸੀ ਰਿਸਪਾਂਸ ਬੈਨੇਫਿਟ ਮਹਾਂਮਾਰੀ ਦੌਰਾਨ ਲੇਬਰ ਮਾਰਕਿਟ ਵਿੱਚ ਆਈ ਗਿਰਾਵਟ, ਜਿਸ ਕਾਰਨ ਤਿੰਨ ਮਿਲੀਅਨ ਨੌਕਰੀਆਂ ਖੁੱਸ ਗਈਆਂ ਤੇ ਦੋ ਮਿਲੀਅਨ ਲੋਕਾਂ ਦੇ ਕੰਮ ਵਾਲੇ ਘੰਟਿਆਂ ਵਿੱਚ ਕਟੌਤੀ ਹੋਈ, ਤੋਂ ਬਾਅਦ ਮਦਦ ਲਈ ਕਾਇਮ ਕੀਤਾ ਗਿਆ। ਆਪਣੀ ਕਮਾਈ ਅਚਾਨਕ ਖੁੱਸਣ ਤੋਂ ਬਾਅਦ ਸਰਵਿਸ ਕੈਨੇਡਾ ਰਾਹੀਂ ਅਪਲਾਈ ਕਰਨ ਵਾਲੇ ਕੁੱਝ ਲੋਕਾਂ ਨੂੰ ਸਰਕਾਰ ਨੇ 2000 ਡਾਲਰ ਦੀ ਮਦਦ ਭੇਜੀ।
ਹੁਣ ਸਰਕਾਰ ਦਾ ਕਹਿਣਾ ਹੈ ਕਿ ਅਜੇ ਵੀ ਕੁੱਝ ਲੋਕ ਅਜਿਹੇ ਹਨ ਜਿਨ੍ਹਾਂ ਨੇ ਸਰਕਾਰ ਨੂੰ ਸਾਰੀ ਰਕਮ ਜਾਂ ਰਕਮ ਦਾ ਕੁੱਝ ਹਿੱਸਾ ਮੋੜਨਾ ਹੈ, ਖਾਸਤੌਰ ਉੱਤੇ ਉਹ ਜਿਹੜੇ ਇਸ ਮਦਦ ਦੇ ਯੋਗ ਨਹੀਂ ਸਨ।ਇੰਪਲੌਇਮੈਂਟ ਮੰਤਰੀ ਕਾਰਲਾ ਕੁਆਲਤਰੋ ਦਾ ਕਹਿਣਾ ਹੈ ਕਿ ਜੇ ਕਿਸੇ ਨੂੰ ਚਾਹੀਦਾ ਹੋਵੇਗਾ ਤਾਂ ਰਕਮ ਮੋੜਨ ਲਈ ਉਸ ਨੂੰ ਫਲੈਕਸੀਬਲ ਰੀਪੇਅਮੈਂਟ ਸ਼ਡਿਊਲ ਦਿੱਤਾ ਜਾਵੇਗਾ ਤੇ ਕਿਸੇ ਨੂੰ ਇਸ ਸਬੰਧ ਵਿੱਚ ਕੋਈ ਜੁਰਮਾਨਾ ਨਹੀਂ ਲਾਇਆ ਜਾਵੇਗਾ ਤੇ ਨਾ ਹੀ ਕਿਸੇ ਤੋਂ ਕੋਈ ਵਿਆਜ ਵਸੂਲਿਆ ਜਾਵੇਗਾ।
ਜਿਨ੍ਹਾਂ ਨੇ ਸਰਕਾਰ ਨੂੰ ਬਕਾਇਆ ਰਕਮ ਮੋੜਨੀ ਹੋਵੇਗੀ ਉਨ੍ਹਾਂ ਨੂੰ ਇਸ ਸਬੰਧ ਵਿੱਚ ਸਰਵਿਸ ਕੈਨੇਡਾ ਵੱਲੋਂ ਜਲਦ ਹੀ ਨੋਟਿਸ ਮਿਲ ਜਾਵੇਗਾ ਤੇ ਇਹ ਦੱਸਿਆ ਜਾਵੇਗਾ ਕਿ ਉਨ੍ਹਾਂ ਨੂੰ ਕਿੰਨੀ ਰਕਮ ਮੋੜਨੀ ਹੈ। ਇਹ ਵੀ ਦੱਸਿਆ ਜਾਵੇਗਾ ਕਿ ਇਹ ਰਕਮ ਮੋੜਨ ਦੀ ਕੀ ਪ੍ਰਕਿਰਿਆ ਹੈ ਤੇ ਉਹ ਇਸ ਫੈਸਲੇ ਬਾਰੇ ਕਿਵੇਂ ਅਪੀਲ ਕਰ ਸਕਦੇ ਹਨ।