ਸਿਓਲ, 20 ਅਕਤੂਬਰ (ਪੋਸਟ ਬਿਊਰੋ)- ਉਤਰੀ ਕੋਰੀਆ ਨੇ ਬੀਤੇ ਦਿਨੀਂ ਸਮੁੰਦਰ ਵਿੱਚ ਘੱਟੋ-ਘੱਟ ਇੱਕ ਵਾਰ ਹੋਰ ਬੈਲਿਸਟਿਕ ਮਿਜ਼ਾਈਲ ਦਾ ਤਜਰਬਾ ਕੀਤਾ ਹੈ। ਦੱਖਣੀ ਕੋਰੀਆ ਦੀ ਫੌਜ ਦਾ ਕਹਿਣਾ ਹੈ ਕਿ ਮਿਜ਼ਾਈਲ ਨੂੰ ਪਣਡੁੱਬੀ ਤੋਂ ਦਾਗਣ ਲਈ ਡਿਜ਼ਾਈਨ ਕੀਤਾ ਗਿਆ ਹੈ। ਜੋਅ ਬਾਇਡੇਨ ਵੱਲੋਂ ਅਮਰੀਕੀ ਰਾਸ਼ਟਰਪਤੀ ਦਾ ਅਹੁਦਾ ਸੰਭਾਲਣ ਦੇ ਬਾਅਦ ਉਤਰੀ ਕੋਰੀਆ ਦਾ ਇਹ ਸਭ ਤੋਂ ਅਹਿਮ ਤਜਰਬਾ ਮੰਨਿਆ ਗਿਆ ਹੈ। ਇਸ ਤੋਂ ਪਹਿਲਾਂ ਉਤਰੀ ਕੋਰੀਆ ਨੇ ਅਕਤੂਬਰ 2019 ਵਿੱਚ ਐਸ ਐਲ ਬੀ ਐਮ ਦਾ ਤਜਰਬਾ ਕੀਤਾ ਸੀ।
ਵਰਨਣ ਯੋਗ ਹੈ ਕਿ ਉਤਰੀ ਕੋਰੀਆ ਨੇ ਇਹ ਤਜਰਬਾ ਉਸ ਸਮੇਂ ਕੀਤਾ ਹੈ ਜਦੋਂ ਅਮਰੀਕਾ ਨੇ ਕੁਝ ਹੀ ਘੰਟੇ ਪਹਿਲਾਂ ਉਸ ਦੇ ਐਟਮੀ ਪ੍ਰੋਗਰਾਮ ਉੱਤੇ ਕੂਟਨੀਤੀ ਬਹਾਲ ਕਰਨ ਦੀ ਆਪਣੀ ਪੇਸ਼ਕਸ਼ ਦੁਹਰਾਈ ਸੀ। ਦੱਖਣੀ ਕੋਰੀਆ ਦੇ ਜੁਆਇੰਟ ਚੀਫ ਆਫ ਸਟਾਫ ਨੇ ਕਿਹਾ ਕਿ ਉਨ੍ਹਾਂ ਨੂੰ ਉਤਰੀ ਕੋਰੀਆ ਦੀ ਘੱਟ ਦੂਰੀ ਵਾਲੀ ਬੈਲਿਸਟਿਕ ਮਿਜ਼ਾਈਲ ਦੇ ਤਜਰਬੇ ਦਾ ਪਤਾ ਲੱਗਾ ਹੈ। ਇਹ ਮਰੀਨ-ਲਾਂਚਡ ਬੈਲਿਸਟਿਕ ਮਿਜ਼ਾਈਲ (ਐਸ ਐਲ ਬੀ ਐਮ) ਹੋ ਸਕਦੀ ਹੈ, ਜਿਸ ਨੂੰ ਦੇਸ਼ ਦੇ ਪੂਰਬ ਵਿੱਚ ਸਿੰਪੋ ਬੰਦਰਗਾਹ ਤੋਂ ਦਾਗਿਆ ਗਿਆ। ਦੱਖਣੀ ਕੋਰੀਆ ਅਤੇ ਅਮਰੀਕਾ ਦੀਆਂ ਫੌਜਾਂ ਇਸ ਤਜਰਬੇ ਦੀ ਸਮੀਖਿਆ ਕਰ ਰਹੀਆਂ ਹਨ। ਏ ਐਨ ਆਈ ਦੇ ਮੁਤਾਬਕ ਦੱਖਣੀ ਕੋਰੀਆ ਨੇ ਮਿਜ਼ਾਈਲ ਦੀ ਰੇਂਜ ਦਾ ਅੰਦਾਜ਼ਾ 590 ਕਿਲੋਮੀਟਰ ਲਗਾਇਆ ਹੈ।ਦੂਜੇ ਪਾਸੇ ਜਾਪਾਨ ਦੀ ਫੌਜ ਮੁਤਾਬਕ ਸ਼ੁਰੂ ਦੀ ਜਾਂਚ ਦੱਸਦੀ ਹੈ ਕਿ ਉਤਰੀ ਕੋਰੀਆ ਨੇ ਦੋ ਬੈਲਿਸਟਿਕ ਮਿਜ਼ਾਈਲਾਂ ਦਾਗੀਆਂ ਹਨ। ਜਾਪਾਨ ਵਿੱਚ ਅਗਲੇ ਮਹੀਨੇ ਹੋਣ ਵਾਲੀਆਂ ਚੋਣਾਂ ਲਈ ਪ੍ਰਚਾਰ ਕਰ ਰਹੇ ਪ੍ਰਧਾਨ ਮੰਤਰੀ ਫੂਮੀਓ ਕਿਸ਼ਿਦਾ ਆਪਣੀ ਯਾਤਰਾ ਮੁਲਤਵੀ ਕਰ ਕੇ ਟੋਕੀਓ ਪਰਤ ਆਏ ਤੇ ਉਤਰੀ ਕੋਰੀਆ ਦੇ ਖਤਰੇ ਦੇ ਮੱਦੇਨਜ਼ਰ ਜਾਪਾਨ ਦੀ ਸੁਰੱਖਿਆ ਰਣਨੀਤੀ ਦੀ ਨਵੇਂ ਸਿਰੇ ਤੋਂ ਸਮੀਖਿਆ ਦੇ ਨਿਰਦੇਸ਼ ਦਿੱਤੇ।