ਵਾਸ਼ਿੰਗਟਨ, 20 ਅਕਤੂਬਰ (ਪੋਸਟ ਬਿਊਰੋ)- ਭਾਰਤ ਦੇ ਭਗੌੜੇ ਹੀਰਾ ਕਾਰੋਬਾਰੀ ਨੀਰਵ ਮੋਦੀ ਨੂੰ ਅਮਰੀਕਾ ਵਿਚਲੀ ਅਦਾਲਤ ਵਿੱਚ ਝਟਕਾ ਲੱਗਾ ਹੈ। ਉਸ ਨੂੰ ਰਾਹਤ ਨਾ ਦਿੰਦੇ ਹੋਏ ਅਦਾਲਤ ਨੇ ਹੀਰਾ ਕਾਰੋਬਾਰੀ ਅਤੇ ਉਸ ਦੇ ਦੋ ਸਾਥੀਆਂ ਦੀ ਉਸ ਪਟੀਸ਼ਨ ਨੂੰ ਠੁਕਰਾ ਦਿੱਤਾ, ਜਿਸ ਵਿੱਚ ਉਨ੍ਹਾਂ ਤਿੰਨ ਕੰਪਨੀਆਂ ਦੇ ਟਰੱਸਟੀਆਂ ਵੱਲੋਂ ਉਨ੍ਹਾਂ ਉੱਤੇ ਲਾਏ ਧੋਖਾਧੜੀ ਦੇ ਦੋਸ਼ਾਂ ਨੂੰ ਰੱਦ ਕਰਨ ਦੀ ਅਪੀਲ ਕੀਤੀ ਸੀ।ਤਿੰਨ ਅਮਰੀਕੀ ਕੰਪਨੀਆਂ ਫਾਇਰ ਸਟਾਰ ਡਾਇਮੰਡ, ਫੈਂਟੇਸੀ ਇੰਕ ਤੇ ਏ ਜੈਫ ਦੇ ਅਦਾਲਤ ਵੱਲੋਂ ਨਿਯੁਕਤ ਕੀਤੇ ਟਰੱਸਟੀ ਰਿਚਰਡ ਲੈਵਿਨ ਨੇ ਨਿਊ ਯਾਰਕ ਦੀ ਇੱਕ ਅਦਾਲਤ ਵਿੱਚ ਇਹ ਦੋਸ਼ ਲਾਏ ਹਨ। ਪਹਿਲਾਂ ਇਨ੍ਹਾਂ ਤਿੰਨਾਂ ਕੰਪਨੀਆਂ ਦੀ ਮਾਲਕੀ ਅਸਿੱਧੇ ਤੌਰ ਉੱਤੇ ਪੰਜਾਹ ਸਾਲਾ ਨੀਰਵ ਮੋਦੀ ਦੇ ਕੋਲ ਸੀ। ਲੈਵਿਨ ਨੇ ਮੋਦੀ ਤੇ ਉਸ ਦੇ ਸਾਥੀਆਂ ਮਿਹਿਰ ਭੰਸਾਲੀ ਅਤੇ ਅਜੈ ਗਾਂਧੀ ਨੂੰ ਕਰਜ਼ਾ ਦੇਣ ਵਾਲਿਆਂ ਨੂੰ ਹੋਏ ਨੁਕਸਾਨ ਲਈ 1.5 ਕਰੋੜ ਡਾਲਰ ਦਾ ਘੱਟੋ-ਘੱਟ ਮੁਆਵਜ਼ਾ ਵੀ ਮੰਗਿਆ ਹੈ।
ਦੀਵਾਲੀਆ ਹੋਣ ਦੇ ਕੇਸਾਂ ਦੀ ਸੁਣਵਾਈ ਕਰਦੀ ਨਿਊ ਯਾਰਕ ਦੀ ਅਦਾਲਤ ਦੇ ਜੱਜ ਸੀਨ ਐਚ ਲੇਨ ਨੇ ਪਿਛਲੇ ਸ਼ੁੱਕਰਵਾਰ ਇਹ ਹੁਕਮ ਜਾਰੀ ਕੀਤਾ, ਜੋ ਭਾਰਤ ਦੇ ਭਗੌੜੇ ਹੀਰਾ ਕਾਰੋਬਾਰੀ ਤੇ ਉਸ ਦੇ ਸਾਥੀਆਂ ਲਈ ਇੱਕ ਝਟਕਾ ਹੈ। ਭਾਰਤੀ ਅਮਰੀਕੀ ਵਕੀਲ ਰਵੀ ਬੱਤਰਾ ਨੇ ਕਿਹਾ, ‘ਕੋਰਟ ਨੇ ਸਪੱਸ਼ਟ ਫੈਸਲੇ ਵਿੱਚ ਅਮਰੀਕੀ ਟਰੱਸਟੀ ਰਿਚਰਡ ਲੈਵਿਨ ਦੀ ਸੋਧੀ ਸ਼ਿਕਾਇਤ ਰੱਦ ਕਰਨ ਦੀ ਅਪੀਲ, ਦੋਸ਼ੀ ਨੀਰਵ ਮੋਦੀ, ਮਿਹਿਰ ਭੰਸਾਲੀ ਅਤੇ ਅਜੈ ਗਾਂਧੀ ਦੀ ਪਟੀਸ਼ਨ ਠੁਕਰਾ ਦਿੱਤੀ ਹੈ।’ ਕੋਰਟ ਦੇ ਹੁਕਮ ਬਾਰੇ ਬੱਤਰਾ ਨੇ ਕਿਹਾ ਕਿ ਨੀਰਵ ਮੋਦੀ ਨੇ ਪੰਜਾਬ ਨੈਸ਼ਨਲ ਬੈਂਕ ਤੇ ਹੋਰਨਾਂ ਤੋਂ ਇੱਕ ਅਰਬ ਡਾਲਰ ਦੀ ਧੋਖਾਧੜੀ ਦੀ ਯੋਜਨਾ ਬਣਾ ਕੇ ਕੰਪਨੀ ਦੇ ਸ਼ੇਅਰ ਮੁੱਲ ਨੂੰ ਗਲਤ ਤਰੀਕੇ ਨਾਲ ਵਧਾਉਣ ਲਈ ਹੋਰ ਵਿਕਰੀ ਦੇ ਤੌਰ ਉੱਤੇ ਮੁਨਾਫਾ ਮੁੜ ਤੋਂ ਆਪਣੀ ਕੰਪਨੀ ਵਿੱਚ ਹੀ ਲਾਇਆ, ਪਰ ਉਹ ਬੈਂਕ ਧੋਖਾਧੜੀ ਦੇ ਰਾਹੀਂ ਆਪਣੀ ਕੰਪਨੀਆਂ ਤੋਂ ਗਲਤ ਤਰੀਕੇ ਨਾਲ ਪ੍ਰਾਪਤ ਧਨ ਨੂੰ ਹਾਸਲ ਕਰਨ ਲਈ ਤੇ ਆਪਣੇ ਨਿੱਜੀ ਫਾਇਦੇ ਲਈ ਇੱਕ ਹੋਰ ਧੋਖਾਧੜੀ ਵਿੱਚ ਸ਼ਾਮਲ ਹੋ ਗਏ ਤੇ ਉਨ੍ਹਾਂ ਨੇ ਇਸੇ ਤਰ੍ਹਾਂ ਦਿਖਾਇਆ ਜਿਵੇਂ ਇਹ ਸਾਧਰਨ ਵਪਾਰਕ ਲੈਣ-ਦੇਣ ਹੋਵੇ।ਅਦਾਲਤ ਦੇ ਹੁਕਮ ਮੁਤਾਬਕ ਲੈਵਿਨ ਦੀ ਪਟੀਸ਼ਨ ਵਿੱਚ ਨੀਰਵ ਮੋਦੀ ਦੀ ਛੇ ਸਾਲ ਦੀ ਅੰਤਰਰਾਸ਼ਟਰੀ ਧੋਖਾਧੜੀ, ਮਨੀ ਲਾਂਡਰਿੰਗ ਤੇ ਗਬਨ ਦੀ ਸਾਜ਼ਿਸ਼ ਦੇ ਸਿੱਟੇ ਵਜੋਂ ਕਰਜ਼ਦਾਰਾਂ ਤੇ ਉਨ੍ਹਾਂ ਦੀ ਜਾਇਦਾਦ ਨੂੰ ਨੀਰਵ ਮੋਦੀ ਤੇ ਉਸ ਦੇ ਸਾਥੀਆਂ ਤੋਂ ਪਹੁੰਚੇ ਨੁਕਸਾਨ ਲਈ 1.5 ਕਰੋੜ ਡਾਲਰ ਦਾ ਘੱਟੋ-ਘੱਟ ਮੁਆਵਜ਼ਾ ਵੀ ਮੰਗਿਆ।