ਬਰੈਂਪਟਨ, 20 ਅਕਤੂਬਰ (ਪੋਸਟ ਬਿਊਰੋ) : ਪੀ ਸੀ ਪਾਰਟੀ ਵੱਲੋਂ 2022 ਦੀਆਂ ਪ੍ਰੋਵਿੰਸ਼ੀਅਲ ਚੋਣਾਂ ਲਈ ਬਰੈਂਪਟਨ ਈਸਟ ਹਲਕੇ ਤੋਂ ਹਰਦੀਪ ਗਰੇਵਾਲ ਨੂੰ ਨਾਮਜਦ ਕੀਤਾ ਗਿਆ ਹੈ।
ਹਰਦੀਪ ਪਿਛਲੇ ਇੱਕ ਦਹਾਕੇ ਤੋਂ ਬਰੈਂਪਟਨ ਵਿੱਚ ਸਰਗਰਮ ਕਮਿਊਨਿਟੀ ਮੈਂਬਰ ਦੀ ਭੂਮਿਕਾ ਨਿਭਾਅ ਰਹੇ ਹਨ। ਉਨ੍ਹਾਂ ਵੱਲੋਂ ਗੁਰੂ ਗੋਬਿੰਦ ਸਿੰਘ ਚਿਲਡਰਨ ਫਾਊਂਡੇਸ਼ਨ ਤੇ ਕੈਨੇਡੀਅਨ ਸਾਊਥ ਏਸ਼ੀਅਨਜ਼ ਸਪੋਰਟਿੰਗ ਇੰਡੀਪੈਂਡੈਂਟ ਲਿਵਿੰਗ (ਸੀ-ਸੈਸਿਲ) ਨਾਲ ਵੀ ਨਿੱਠ ਕੇ ਕੰਮ ਕੀਤਾ ਜਾ ਰਿਹਾ ਹੈ।
ਪ੍ਰੋਵਿੰਸ਼ੀਅਲ ਸਿਆਸਤ ਵਿੱਚ ਉਨ੍ਹਾਂ 18 ਸਾਲ ਦੀ ਉਮਰ ਤੋਂ ਹੀ ਸ਼ਮੂਲੀਅਤ ਕਰ ਲਈ ਸੀ।ਇਟੋਬੀਕੋ ਨੌਰਥ ਲਈ ਉਹ ਪਾਰਟੀ ਦੇ ਇਤਿਹਾਸ ਵਿੱਚ ਚੁਣੇ ਗਏ ਨਿੱਕੀ ਉਮਰ ਦੇ ਹਲਕਾ ਪ੍ਰੈਜ਼ੀਡੈਂਟਸ ਵਿੱਚੋਂ ਇੱਕ ਰਹੇ। ਬਾਅਦ ਵਿੱਚ ਉਨ੍ਹਾਂ ਓਨਟਾਰੀਓ ਪੀ ਸੀ ਫੰਡ ਦੇ ਰੀਜਨਲ ਡਾਇਰੈਕਟਰ ਵਜੋਂ ਸੇਵਾ ਨਿਭਾਈ।
ਇਸ ਮੌਕੇ ਹਰਦੀਪ ਗਰੇਵਾਲ ਨੇ ਆਖਿਆ ਕਿ ਬਰੈਂਪਟਨ ਈਸਟ ਤੋਂ ਪੀ ਸੀ ਪਾਰਟੀ ਦਾ ਉਮੀਦਵਾਰ ਨਾਮਜਦ ਹੋਣ ਉੱਤੇ ਉਹ ਬਹੁਤ ਸਨਮਾਨਿਤ ਮਹਿਸੂਸ ਕਰ ਰਹੇ ਹਨ। ਉਨ੍ਹਾਂ ਆਖਿਆ ਕਿ ਅਜਿਹੀ ਟੀਮ ਦਾ ਹਿੱਸਾ ਬਣ ਕੇ ਉਨ੍ਹਾਂ ਨੂੰ ਬਹੁਤ ਮਾਣ ਹੋ ਰਿਹਾ ਹੈ ਜਿਹੜੀ ਟੀਮ ਨੇ ਆਪਣੇ ਵੱਲੋਂ ਕੀਤਾ ਹਰ ਵਾਅਦਾ ਨਿਭਾਇਆ ਤੇ ਬਰੈਂਪਟਨ ਦੇ ਲੋਕਾਂ ਦੀ ਮਦਦ ਲਈ ਅੱਗੇ ਤੋਂ ਵੀ ਸਾਡੀ ਪਾਰਟੀ ਨਿਵੇਸ਼ ਕਰਦੀ ਰਹੇਗੀ।
ਹਰਦੀਪ ਨੇ ਕਈ ਮਿਊਂਸੀਪਲ, ਪ੍ਰੋਵਿੰਸ਼ੀਅਲ ਅਤੇ ਫੈਡਰਲ ਕੈਂਪੇਨਜ਼ ਵਿੱਚ ਕੈਂਪੇਨ ਮੈਨੇਜਰ, ਫੰਡਰੇਜਿ਼ੰਗ ਚੇਅਰ ਤੇ ਵਾਲੰਟੀਅਰ ਕੋਆਰਡੀਨੇਟਰ ਵਜੋਂ ਅਹਿਮ ਭੂਮੀਕਾਵਾਂ ਨਿਭਾਈਆਂ। ਕਮਿਊਨਿਟੀ ਨਾਲ ਅਣਥੱਕ ਕੰਮ ਕਰਦਿਆਂ ਹਰਦੀਪ ਦੀ ਜਾਣਪਛਾਣ ਕਈ ਚੈਰੀਟੇਬਲ ਆਰਗੇਨਾਈਜੇ਼ਸ਼ਨਜ਼ ਤੇ ਸਰਕਾਰੀ ਅਧਿਕਾਰੀਆਂ ਨਾਲ ਹੋਈ। ਪੇਸ਼ੇਵਰਾਨਾ ਤੌਰ ਉੱਤੇ ਹਰਦੀਪ ਇੱਕ ਸਫਲ ਰੀਅਲ ਅਸਟੇਟ ਬ੍ਰੋਕਰ ਹਨ ਤੇ ਉਹ ਓਨਟਾਰੀਓ ਭਰ ਵਿੱਚ 200 ਮਿਲੀਅਨ ਡਾਲਰ ਦੀ ਕੀਮਤ ਦੀ ਸੰਪਤੀ ਸਫਲਤਾਪੂਰਵਕ ਵੇਚ ਚੁੱਕੇ ਹਨ।ਇਸ ਸਮੇਂ ਹਰਦੀਪ ਨਾਇਗਰਾ ਰੀਜਨ ਵਿੱਚ ਲੋਕਲ ਹੋਮ ਬਿਲਡਰ ਆਪਰੇਸ਼ਨਜ਼ ਫੌਰ ਮਿਡਲੈਂਡ ਹੋਮਜ਼ ਦੇ ਡਾਇਰੈਕਟਰ ਵਜੋਂ ਕੰਮ ਕਰ ਰਹੇ ਹਨ।
ਓਨਟਾਰੀਓ ਦੀ ਪੀ ਸੀ ਪਾਰਟੀ ਦੇ ਪ੍ਰੈਜ਼ੀਡੈਂਟ ਬ੍ਰਾਇਨ ਪੈਟਰਸਨ ਨੇ ਆਖਿਆ ਕਿ ਸਾਡੇ ਕੋਲ ਬਰੈਂਪਟਨ ਵਿੱਚ ਉਮੀਦਵਾਰਾਂ ਦੀ ਕਮਾਲ ਦੀ ਟੀਮ ਹੈ ਜਿਹੜੀ ਸਖ਼ਤ ਮਿਹਨਤ ਕਰਨ, ਲੋਕਾਂ ਦੀਆਂ ਬਰੂਹਾਂ ਉੱਤੇ ਜਾਣ ਤੇ ਲੋਕਾਂ ਦਾ ਵਿਸ਼ਵਾਸ ਜਿੱਤਣ ਦੇ ਨਾਲ ਨਾਲ ਅਗਲੀਆਂ ਚੋਣਾਂ ਤੋਂ ਪਹਿਲਾਂ ਸਮਰਥਨ ਹਾਸਲ ਕਰਨ ਲਈ ਤਿਆਰ ਹੈ।