ਟੋਕੀਓ, 19 ਅਕਤੂਬਰ (ਪੋਸਟ ਬਿਊਰੋ)- ਜਾਪਾਨ ਵਿੱਚ ਰਿਟਾਇਰਮੈਂਟ ਪਿੱਛੋਂ ਵੀ ਬਜ਼ੁਰਗ ਆਪਣੇ ਆਪ ਨੂੰ ਚੁਸਤ-ਦਰੁਸਤ ਰੱਖਣ ਲਈ ਕੰਮ ਵਿੱਚ ਲੱਗੇ ਰਹਿੰਦੇ ਹਨ। ਇਸ ਨਾਲ ਬਿਮਾਰੀਆਂ ਦਾ ਖਤਰਾ ਘੱਟ ਹੁੰਦਾ ਅਤੇ ਹੋਰ ਕਮਾਈ ਵੀ ਹੋ ਜਾਂਦੀ ਹੈ। ਜਾਪਾਨ ਦੀ ਵਰਕਿੰਗ ਫੋਰਸ ਉਮਰ-ਦਰਾਜ ਹੋ ਰਹੀ ਹੈ। ਇਸ ਦੇਸ਼ ਵਿੱਚ ਜਨਮ ਦਰ ਕਾਫੀ ਘੱਟ ਹੋਣ ਕਰ ਕੇ ਨੌਜਵਾਨਾਂ ਦੀ ਕਮੀ ਹੈ, ਜਿਸ ਨਾਲ ਉਲਝਣਾਂ ਪੈਦਾ ਹੋ ਰਹੀਆਂ ਹਨ।
ਅਤਸੁਕੋ ਕਾਸਾ65 ਸਾਲ ਦੀ ਉਮਰ ਵਿੱਚ ਜਦੋਂ ਰਿਟਾਇਰ ਹੋਈ ਤਾਂ ਉਸ ਨੂੰ ਘਰ ਬੈਠ ਕੇ ਪੋਤੇ-ਪੋਤੀਆਂ ਦੇ ਨਾਲ ਖੇਡਣਾ ਚੰਗਾ ਨਾ ਲੱਗਾ। ਉਸ ਨੇ ਖੁਦ ਨੂੰ ਜਾਪਾਨ ਦੇ ਸੱਤ ਲੱਖ ਹੋਰਨਾਂ ਸੀਨੀਅਰ ਸਿਟੀਜ਼ਨ ਦੇ ਬਰਾਬਰ ਸਿਲਵਰ ਜਿਨਜਾਈ ਸੰਗਠਨ ਵਿੱਚ ਰਜਿਸਟਰ ਕਰਵਾਇਆ। ਕਾਸਾ ਦਾ ਕਹਿਣਾ ਹੈ ਕਿ ਅਜੇ ਉਹ 68 ਸਾਲ ਦੀ ਹੈ ਤੇ ਇਹ ਉਮਰ ਰਿਟਾਇਰਮੈਂਟ ਜਾਂ ਘਰ ਵਿੱਚ ਰਹਿ ਕੇ ਬਾਗਬਾਨੀ ਤੇ ਖਾਣਾ ਬਣਾਉਣ ਦੀ ਨਹੀਂ। ਉਹ ਹੋਰਨਾਂ ਦੀ ਮਦਦ ਕਰਨਾ ਚਾਹੁੰਦੀ ਹੈ। ਸਮਾਜ ਨੂੰ ਕੁਝ ਦੇਣਾ ਚਾਹੁੰਦੀ ਹੈ। ਉਹ ਅਪਾਹਜ ਲੋਕਾਂ ਦੇ ਸੰਗਠਨ ਨਾਲ ਜੁੜੀ ਅਤੇ ਉਥੇ ਖਾਣਾ ਬਣਾਉਣ ਦਾ ਕੰਮ ਕਰਦੀ ਹੈ। ਹਰ ਚਾਰ ਵਿੱਚੋਂ ਇੱਕ ਜਾਪਾਨੀ 65 ਸਾਲ ਤੋਂ ਵੱਧ ਉਮਰ ਦਾ ਹੈ। ਅਗਲੇ 15 ਸਾਲ ਵਿੱਚ ਹਰ ਤਿੰਨ ਵਿੱਚੋਂ ਇੱਕ ਜਾਪਾਨੀ 65 ਸਾਲ ਤੋਂ ਵੱਧ ਉਮਰ ਦਾ ਹੋਵੇਗਾ। ਜਾਪਾਨ ਦੀ ਆਬਾਦੀ ਦੇ ਬੁੱਢੇ ਹੋਣ ਦੀ ਦਰ ਜਰਮਨੀ ਨਾਲੋਂ ਦੁੱਗਣੀ ਤੇ ਫਰਾਂਸ ਤੋਂ ਚਾਰ ਗੁਣਾ ਹੈ। ਅਜਿਹੇ ਵਿੱਚ ਜਾਪਾਨ ਦੀ ਸਰਕਾਰ ਨੇ ਰਿਟਾਇਰਮੈਂਟ ਉਮਰ 65 ਸਾਲ ਤੋਂ ਵਧਾ ਕੇ ਸੱਤਰ ਸਾਲ ਕਰ ਦਿੱਤੀ ਹੈ, ਜਿਸ ਤੋਂ ਜਾਪਾਨ ਨੂੰ ਵਰਕਿੰਗ ਫੋਰਸ ਦੀ ਕਮੀ ਨਹੀਂ ਹੋਵੇਗੀ।
ਜਾਪਾਨ ਦੇ ਸੀਨੀਅਰ ਸਿਟੀਜ਼ਨ ਵੀ ਦੇਸ਼ ਦੇ ਲਈ ਆਪਣੇ ਵੱਲੋਂ ਸਹਿਯੋਗ ਦੇਣ ਵਿੱਚ ਪਿੱਛੇ ਨਹੀਂ ਹਨ। ਟੋਕੀਓ ਯੂਨੀਵਰਸਿਟੀ ਦੇ ਪ੍ਰੋਫੈਸਰ ਹਿਰੋਸ਼ੀ ਯੋਸ਼ਿਡਾ ਦਾ ਕਹਿਣਾ ਹੈ ਕਿ ਜਾਪਾਨ ਵਿੱਚ ਬਜ਼ੁਰਗਾਂ ਵਿੱਚ ਕੰਮ ਕਰਨ ਪ੍ਰਤੀ ਰੁਝਾਨ ਲਗਾਤਾਰ ਵਧ ਰਿਹਾ ਹੈ।ਸਿਵਲਰ ਜਿਨਜਾਈ ਸੰਗਠਨ ਦੇ ਚੇਅਰਮੈਨ ਤਕਾਓ ਓਕਾਡਾ ਦਾ ਕਹਿਣਾ ਹੈ ਕਿ ਹਰ ਸਾਲ ਵੱਧ ਤੋਂ ਵੱਧ ਬਜ਼ੁਰਗ ਆਪਣੀ ਰਜਿਸਟਰੇਸ਼ਨ ਕਰਵਾ ਰਹੇ ਹਨ। ਉਥੇ ਰਜਿਸਟਰਡ ਸਭ ਤੋਂ ਵੱਡੀ ਉਮਰ 100 ਸਾਲ ਦੇ ਹਨ। ਬਜ਼ੁਰਗ ਹਰ ਹਫਤੇ 20 ਘੰਟੇ ਕੰਮ ਕਰਦੇ ਹਨ। ਹਰ ਹਫਤੇ ਉਨ੍ਹਾਂ ਨੂੰ ਦੋ ਜਾਂ ਤਿੰਨ ਦਿਨ ਕੰਮ ਕਰਨਾ ਹੁੰਦਾ ਹੈ।