ਲੀਗ ਆਨ ਸੀ, 18 ਅਕਤੂਬਰ (ਪੋਸਟ ਬਿਊਰੋ)- ਬਰਤਾਨੀਆ ਵਿੱਚ ਸੱਤਾਧਾਰੀ ਕੰਜ਼ਰਵੇਟਿਵ ਪਾਰਟੀ ਦੇ ਪਾਰਲੀਮੈਂਟਮੈਂਬਰ ਡੇਵਿਡ ਏਮਸ ਦੀ ਚਾਕੂ ਮਾਰ ਕੇ ਹੱਤਿਆ ਕਰਨ ਵਾਲੇ 25 ਸਾਲਾ ਨੌਜਵਾਨ ਦਾ ਨਾਂਅ ਅਲੀ ਹਰਬੀ ਅਲੀ ਹੈ ਤੇ ਉਹ ਸੋਮਾਲੀਆਈ ਮੂਲ ਦਾ ਹੈ। ਉਸ ਦੇ ਪਿਤਾ ਹਰਬੀ ਅਲੀ ਕੁਲੇਨ ਸੋਮਾਲੀਆ ਦੇ ਪ੍ਰਧਾਨ ਮੰਤਰੀ ਦੇ ਸਲਾਹਕਾਰ ਰਹੇ ਹਨ। ਉਹ ਆਪਣੇ ਪੁੱਤਰ ਦੀ ਕਰਤੂਤ ਤੋਂ ਸ਼ਰਮਿੰਦਾ ਹਨ। ਉਨ੍ਹਾਂ ਨੂੰ ਸਮਝ ਨਹੀਂ ਆ ਰਿਹਾ ਕਿ ਪੁੱਤਰ ਦੇ ਦਿਮਾਗ ਵਿੱਚ ਅੱਤਵਾਦੀ ਵਿਚਾਰਧਾਰਾ ਕਦੋਂ ਘਰ ਕਰ ਗਈ।
ਅਲੀ ਕੁਲੇਨ ਨੇ ਕਿਹਾ ਕਿ ਉਹ ਕਾਫੀ ਦੁਖੀ ਹਨ। ਇਹ ਐਸੀ ਘਟਨਾ ਹੈ ਜਿਸ ਦੀ ਉਨ੍ਹਾਂ ਕਦੇ ਕਲਪਨਾ ਵੀ ਨਹੀਂ ਕੀਤੀ ਸੀ। ਬ੍ਰਿਟਿਸ ਮੀਡੀਆ ਦੇ ਮੁਤਾਬਕ ਪਾਰਲੀਮੈਂਟਮੈਂਬਰ ਦੀ ਹੱਤਿਆ ਦੇ ਮਾਮਲੇ ਵਿੱਚ ਗ੍ਰਿਫਤਾਰ ਹੋਇਆ ਅਲੀ ਹਰਬੀ ਬ੍ਰਿਟਿਸ਼ ਨਾਗਰਿਕ ਵੀ ਹੋ ਸਕਦਾ ਹੈ। ਏਮਸ ਦੀ ਹੱਤਿਆ ਸ਼ੁੱਕਰਵਾਰ ਉਨ੍ਹਾਂ ਦੇ ਆਪਣੇ ਚੋਣ ਖੇਤਰ ਵਿੱਚ ਚਰਚ ਵਿੱਚ ਉਸ ਸਮੇਂ ਹੋਈ ਸੀ ਜਦੋਂ ਉਹ ਲੋਕਾਂ ਦੀਆਂ ਸਮੱਸਿਆਵਾਂ ਜਾਨਣ ਲਈ ਉਨ੍ਹਾਂ ਵਿਚਮੌਜੂਦ ਸਨ। ਜਿਸ ਜਗ੍ਹਾ ਉੱਤੇ ਘਟਨਾ ਹੋਈ, ਉਹ ਲੰਡਨ ਤੋਂ 62 ਕਿਲੋਮੀਟਰ ਦੂਰ ਸਮੁੰਦਰੀ ਇਲਾਕਾ ਹੈ। ਪੁਲਸ ਨੇ ਪਾਰਲੀਮੈਂਟਮੈਂਬਰ ਦੀ ਹੱਤਿਆ ਨੂੰ ਅੱਤਵਾਦੀ ਵਾਰਦਾਤ ਕਰਾਰ ਦਿੱਤਾ ਹੈ। ਇਸ ਘਟਨਾ ਪਿੱਛੋਂ ਬ੍ਰਿਟਿਸ਼ ਸਰਕਾਰ ਪਾਰਲੀਮੈਂਟ ਦੇ ਮੈਂਬਰਾਂ ਦੀ ਸੁਰੱਖਿਆ ਹੋਰ ਵਧਾਉਣ ਉੱਤੇ ਵਿਚਾਰ ਕਰ ਰਹੀ ਹੈ। ਗ੍ਰਹਿ ਮੰਤਰੀ ਪ੍ਰੀਤੀ ਪਟੇਲ ਨੇ ਐਵਤਾਰ ਨੂੰ ਇਸ ਬਾਰੇ ਦੱਸਿਆ ਕਿ ਜਲਦੀ ਹੀ ਇਸ ਸਬੰਧੀ ਫੈਸਲੇ ਦਾ ਐਲਾਨ ਹੋ ਸਕਦਾ ਹੈ। ਪੰਜ ਸਾਲ ਪਹਿਲਾਂ ਲੇਬਰ ਪਾਰਟੀ ਦੇ ਪਾਰਲੀਮੈਂਟ ਮੈਂਬਰ ਜੋਅ ਕਾਕਸ ਦੀ ਵੀ ਉਨ੍ਹਾਂ ਦੇ ਆਪਣੇ ਚੋਣ ਖੇਤਰ ਵਿੱਚ ਗੋਲੀ ਮਾਰ ਕੇ ਹੱਤਿਆ ਕਰ ਦਿੱਤੀ ਗਈ ਸੀ।