ਕੋਲਕਾਤਾ, 17 ਅਕਤੂਬਰ (ਪੋਸਟ ਬਿਊਰੋ)- ਪ੍ਰਸਿੱਧ ਸ਼ਾਸਤਰੀ ਸੰਗੀਤ ਗਾਇਕ ਉਸਤਾਦ ਰਾਸ਼ਿਦ ਖਾਨ ਨੂੰ ਧਮਕੀ ਦੇ ਕੇ ਉਨ੍ਹਾਂ ਤੋਂ ਪੰਜਾਹ ਲੱਖ ਰੁਪਏ ਦੀ ਫਿਰੌਤੀ ਵੀ ਮੰਗੀ ਗਈ ਹੈ। ਇਸ ਦੋਸ਼ ਵਿੱਚ ਕੋਲਕਾਤਾ ਦੀ ਖੁਫੀਆ ਪੁਲਸ ਨੇ ਦੋ ਜਣਿਆਂ ਨੂੰ ਗ੍ਰਿਫਤਾਰ ਕੀਤਾ ਹੈ, ਜਿਨ੍ਹਾਂ ਦੀ ਪਛਾਣ ਦੀਪਕ ਔਲਖ ਅਤੇ ਅਵਿਨਾਸ਼ ਕੁਮਾਰ ਭਾਰਤੀ ਵਜੋਂ ਹੋਈ ਹੈ। ਦੀਪਕ ਨੂੰ ਲਖਨਊ ਤੋਂ ਅਤੇ ਅਵਿਨਾਸ਼ ਨੂੰ ਕੋਲਕਾਤਾ ਵਿੱਚੋਂਗ੍ਰਿਫਤਾਰ ਕੀਤਾ ਗਿਆ ਹੈ।
ਇਸ ਬਾਰੇ ਕੋਲਕਾਤਾ ਪੁਲਸ ਦੇ ਜੁਆਇੰਟ ਕਮਿਸ਼ਨਰ (ਅਪਰਾਧ) ਮੁਰਲੀਧਰ ਸ਼ਰਮਾ ਨੇ ਦੱਸਿਆ ਕਿ ਫੜੇ ਗਏ ਦੋਵੇਂ ਦੋਸ਼ੀ ਰਾਸ਼ਿਦ ਖਾਨ ਦੇ ਘਰ ਕੰਮ ਕਰਦੇ ਸਨ। ਅਵਿਨਾਸ਼ ਉਨ੍ਹਾਂ ਦਾ ਕਾਰ ਡਰਾਈਵਰ ਤੇ ਦੀਪਕ ਦਫਤਰ ਸਹਾਇਕ ਵਜੋਂ ਕੰਮ ਕਰਦਾ ਸੀ। ਕੁਝ ਮਹੀਨੇ ਪਹਿਲਾਂ ਦੋਵਾਂ ਨੂੰ ਕੰਮ ਤੋਂ ਹਟਾ ਦਿੱਤਾ ਗਿਆ ਸੀ। ਇਸ ਗੁੱਸੇ ਵਿੱਚ ਦੀਪਕ ਲਖਨਊ ਤੋਂ ਇੰਟਰਨੈਟ ਦੀ ਵਰਤੋਂ ਕਰ ਕੇ ਰਾਸ਼ਿਦ ਖਾਨ ਨੂੰ ਫੋਨ ਕਰ ਕੇ ਰਾਸ਼ਿਦ ਖਾਨ ਤੋਂ ਫਿਰੌਤੀ ਮੰਗਣ ਲੱਗ ਪਿਆ। ਪਹਿਲਾਂ ਉਸ ਨੇ ਪੰਜਾਹ ਲੱਖ ਰੁਪਏ ਮੰਗੇ ਤੇ ਫਿਰ ਵਿੱਚ ਵੀਹ ਲੱਖ ਰੁਪਏ ਉੱਤੇ ਸਹਿਮਤੀ ਦੀ ਗੱਲ ਕਹੀ। ਉਸ ਨੇ ਧਮਕੀ ਦਿੱਤੀ ਸੀ ਕਿ ਜੇ ਉਸ ਨੂੰ ਰੁਪਏ ਨਾ ਦਿੱਤੇ ਗਏ ਤਾਂ ਜਾਨੋਂ ਮਾਰ ਦੇਵੇਗਾ। ਅਵਿਨਾਸ਼ ਉਸ ਨੂੰ ਰਸ਼ਿਦ ਖਾਨ ਦੀ ਮੂਵਮੈਂਟ ਦੀ ਸਾਰੀ ਡਿਟੇਲ ਦੇ ਰਿਹਾ ਸੀ। ਰਾਸ਼ਿਦ ਨੇ ਕੋਲਕਾਤਾ ਦੇ ਨੇਤਾਜੀ ਨਗਰ ਥਾਣੇ ਦੀ ਪੁਲਸ ਨੂੰ ਇਸ ਬਾਰੇ ਨੌਂ ਅਕਤੂਬਰ ਨੂੰ ਸੂਚਨਾ ਦਿੱਤੀ ਤਾਂ ਪੁਲਸ ਜਾਂਚ ਵਿੱਚ ਲੱਗ ਗਈ ਅਤੇ ਅਵਿਨਾਸ਼ ਨੂੰ 13 ਤੇ ਦੀਪਕ ਨੂੰ 14 ਅਕਤੂਬਰ ਨੂੰ ਗ੍ਰਿਫਤਾਰ ਕਰ ਲਿਆ। ਉਸ ਨੂੰ ਟਰਾਂਜ਼ਿਟ ਰਿਮਾਂਡ ਉੱਤੇ ਕੋਲਕਾਤਾ ਲਿਆਂਦਾ ਗਿਆ। ਅਵਿਨਾਸ਼ ਮੂਲ ਰੂਪ ਨਾਲ ਬਿਹਾਰ ਦੇ ਬੇਗੂਸਰਾਏ ਜ਼ਿਲੇ੍ਹ ਦੇ ਸਲੌਨਾ ਪਿੰਡ ਦਾ ਵਾਸੀ ਹੈ। ਉਹ ਕੋਲਕਾਤਾ ਦੇ ਨੇਤਾਜੀ ਨਗਰ ਥਾਣਾ ਖੇਤਰ ਦੇ ਦੁਰਗਾ ਪ੍ਰਸੰਨ ਪਰਮਹੰਸ ਰੋਡ ਦੇ ਸਰਵੈਂਟ ਕੁਆਰਟਰ ਵਿੱਚ ਰਹਿੰਦਾਾ ਸੀ। ਦੀਪਕ ਉਤਰ ਪ੍ਰਦੇਸ਼ ਦੇ ਅਮਰੋਹਾ ਦਾ ਵਾਸੀ ਹੈ। ਉਸਤਾਦ ਰਾਸ਼ਿਦ ਖਾਨ ਦੇਸ਼ ਦੇ ਮੰਨੇ ਪ੍ਰਮੰਨੇ ਸ਼ਾਸਤਰੀ ਸੰਗੀਤ ਗਾਇਕ ਹਨ। ਉਹ ਮਸ਼ਹੂਰ ਹਸਤੀ ਸੰਗੀਤਕਾਰ ਇਨਾਇਤ ਹੁਸੈਨ ਖਾਨ ਦੇ ਪੋਤੇ ਹਨ।