ਮੋਗਾ, 16 ਅਕਤਬੂਰ (ਪੋਸਟ ਬਿਊਰੋ)- ਕੱਲ੍ਹ ਸਵੇਰੇ ਜ਼ਿਲ੍ਹਾ ਮੋਗਾ ਦੇ ਪਿੰਡ ਡਰੋਲੀ ਭਾਈ ਵਿਖੇ ਇੱਕ ਘਰ ਵਿੱਚ ਬਣੀ ਟਾਇਲੇਟ ਦੀ ਕੱਚੀ ਖੂਹੀ ਵਿੱਚ ਡਿੱਗਣ ਨਾਲ ਮਾਂ-ਧੀ ਦੀ ਮੌਤ ਹੋ ਗਈ।
ਮਿਲੀ ਜਾਣਕਾਰੀ ਅਨੁਸਾਰ ਕੱਲ੍ਹ ਸਵੇਰੇ ਬੱਗਾ ਸਿੰਘ ਪੁੱਤਰ ਸੁਰਜੀਤ ਸਿੰਘ ਦੀ ਸਾਢੇ ਤਿੰਨ ਸਾਲਾ ਬੇਟੀ ਗੁਰਨੂਰ ਕੌਰ ਉਰਫ਼ ਨੂਰ ਨੂੰ ਉਸ ਦੀ ਮਾਤਾ ਸਿਮਰਜੀਤ ਕੌਰ ਉਰਫ਼ ਸ਼ਿਮਲਾ (26) ਟਾਇਲੇਟ ਵਿੱਚ ਬਿਠਾ ਕੇ ਆਈ ਤਾਂ ਕੁਝ ਪਲਾਂ ਬਾਅਦ ਉਸ ਨੇ ਖੜਾਕ ਸੁਣਿਆ। ਉਸ ਨੇ ਜਾ ਕੇ ਦੇਖਿਆ ਕਿ ਟਾਇਲੇਟ ਖੂਹੀ ਉੱਤੇ ਪਾਇਆ ਲੈਂਟਰ ਟੁੱਟਾ ਹੋਇਆ ਤੇ ਉਸ ਦੀ ਬੇਟੀ ਉਸ ਵਿੱਚ ਡਿੱਗ ਗਈ ਹੈ। ਅਚਾਨਕ ਉਸਦੀ ਮਾਤਾ ਸ਼ਿਮਲਾ ਵੀ ਉਸ ਵਿੱਚ ਜਾ ਡਿੱਗੀ। ਜਦੋਂ ਇਸ ਦਾ ਬੱਗਾ ਸਿੰਘ ਨੂੰ ਪਤਾ ਲੱਗਾ ਤਾਂ ਮਾਵਾਂ-ਧੀਆਂ ਨੂੰ ਬਚਾਉਂਦਾ ਉਹ ਵੀ ਵਿੱਚ ਜਾ ਡਿੱਗਾ। ਪਿੰਡ ਵਾਸੀਆਂ ਨੇ ਬੜੀ ਮੁਸ਼ੱਕਤ ਨਾਲ ਤਿੰਨਾਂ ਨੂੰ ਬਾਹਰ ਕੱਢਿਆ, ਪਰ ਸਿਮਰਜੀਤ ਕੌਰ ਉਰਫ ਸ਼ਿਮਲਾ ਤੇ ਉਸ ਦੀ ਬੇਟੀ ਗੁਰਨੂਰ ਕੌਰ ਉਰਫ਼ ਨੂਰ ਦੀ ਮੌਤ ਹੋ ਗਈ, ਜਦਕਿ ਬੱਗਾ ਸਿੰਘ ਗੰਭੀਰ ਜ਼ਖ਼ਮੀ ਹੋ ਗਿਆ। ਵਰਨਣ ਯੋਗ ਹੈ ਕਿ ਟਾਇਲੇਟ ਦੀ ਖੂਹੀ 35 ਫੁੱਟ ਡੂੰਘੀ ਸੀ ਅਤੇ ਉਸੇ ਉੱਤੇ ਲੈਂਟਰ ਪਾਇਆ ਹੋਇਆ ਸੀ, ਜੋ ਟੁੱਟ ਗਿਆ ਤੇ ਵੱਡੇ ਹਾਦਸੇ ਦਾ ਕਾਰਨ ਬਣਿਆ।