ਕੈਲੇਫੋਰਨੀਆ, 14 ਅਕਤੂਬਰ (ਪੋਸਟ ਬਿਊਰੋ) : ਅਮਰੀਕਾ ਦੇ ਸਾਬਕਾ ਰਾਸ਼ਟਰਪਤੀ ਬਿੱਲ ਕਲਿੰਟਨ ਨੂੰ ਗੈਰ ਕੋਵਿਡ ਸਬੰਧੀ ਇਨਫੈਕਸ਼ਨ ਦੇ ਚੱਲਦਿਆਂ ਯੂਨੀਵਰਸਿਟੀ ਆਫ ਕੈਲੇਫੋਰਨੀਆ ਦੇ ਇਰਵੀਨ ਮੈਡੀਕਲ ਸੈਂਟਰ ਦੀ ਇ਼ੰਟੈਂਸਿਵ ਕੇਅਰ ਯੂਨਿਟ ਵਿੱਚ ਦਾਖਲ ਕਰਵਾਇਆ ਗਿਆ ਹੈ।
ਯੂਨੀਵਰਸਿਟੀ ਆਫ ਕੈਲੇਫੋਰਨੀਆ ਦੇ ਇਰਵੀਨ ਮੈਡੀਕਲ ਸੈਂਟਰ ਦੇ ਚੇਅਰ ਡਾ· ਅਲਪੇਸ਼ ਆਮਿਨ ਤੇ ਕਲਿੰਟਨ ਦੀ ਨਿਜੀ ਪ੍ਰਾਇਮਰੀ ਡਾਕਟਰ ਲੀਜ਼ਾ ਬਾਰਡੈਕ ਵੱਲੋਂ ਜਾਰੀ ਕੀਤੇ ਗਏ ਸਾਂਝੇ ਬਿਆਨ ਵਿੱਚ ਆਖਿਆ ਗਿਆ ਕਿ ਉਨ੍ਹਾਂ ਨੂੰ ਆਈਸੀਯੂ ਵਿੱਚ ਨਿਗਰਾਨੀ ਲਈ ਤੇ ਐਂਟੀਬਾਇਓਟਿਕਸ ਤੇ ਫਲੂਡਜ਼ ਲਈ ਭਰਤੀ ਕਰਵਾਇਆ ਗਿਆ ਹੈ।ਉਨ੍ਹਾਂ ਨੂੰ ਅਜੇ ਲਗਾਤਾਰ ਨਿਗਰਾਨੀ ਲਈ ਹਸਪਤਾਲ ਹੀ ਰੱਖਿਆ ਜਾਵੇਗਾ।
ਡਾਕਟਰਾਂ ਨੇ ਇਹ ਵੀ ਆਖਿਆ ਕਿ ਦੋ ਦਿਨ ਦੇ ਇਲਾਜ ਤੋਂ ਬਾਅਦ ਉਨ੍ਹਾਂ ਦੇ ਵ੍ਹਾਈਟ ਬਲੱਡ ਸੈੱਲਜ਼ ਦੀ ਗਿਣਤੀ ਘੱਟ ਰਹੀ ਹੈ ਤੇ ਐਂਟੀਬਾਇਓਟਿਕਸ ਵੀ ਆਪਣਾ ਅਸਰ ਵਿਖਾ ਰਹੇ ਹਨ। ਡਾਕਟਰਾਂ ਨੇ ਆਖਿਆ ਕਿ ਅਸੀਂ ਆਸ ਕਰਦੇ ਹਾਂ ਕਿ ਉਹ ਜਲਦ ਹੀ ਘਰ ਜਾ ਸਕਣਗੇ।ਕਲਿੰਟਨ ਦੇ ਬੁਲਾਰੇ ਏਂਜਲ ਯੁਰੇਨਾ ਨੇ ਆਖਿਆ ਕਿ ਸਾਬਕਾ ਰਾਸ਼ਟਰਪਤੀ ਸਿਹਤਯਾਬ ਹੋ ਰਹੇ ਹਨ ਤੇ ਚੜ੍ਹਦੀਕਲਾ ਵਿੱਚ ਹਨ।