ਫਿਲਮ ‘ਸੀਰੀਅਸ ਮੈਨ’ ਲਈ ਇੰਟਰਨੈਸ਼ਨਲ ਐਮੀ ਐਵਾਰਡਜ਼ ਵਿੱਚ ਸਰਵੋਤਮ ਅਦਾਕਾਰ ਸ਼੍ਰੇਣੀ ਵਿੱਚ ਚੁਣੇ ਗਏ ਅਭਿਨੇਤਾ ਨਵਾਜ਼ੂਦੀਨ ਸਿੱਦੀਕੀ ਨੇ ਆਪਣੀ ਜ਼ਿੰਦਗੀ ਵਿੱਚ ਐਵਾਰਡਾਂ ਦੀ ਅਹਿਮੀਅਤ ਬਾਰੇ ਦੱਸਿਆ ਹੈ। ਗੱਲਬਾਤ ਦੌਰਾਨ ਨਵਾਜ਼ੂਦੀਨ ਨੇ ਕਿਹਾ, ‘‘ਕਿਹੜੀ ਥਾਂ ਤੋਂ ਐਵਾਰਡ ਮਿਲਦਾ ਹੈ, ਇਹ ਜ਼ਿਆਦਾ ਮਹੱਤਤਾ ਰੱਖਦਾ ਹੈ। ਇਹ ਤੁਹਾਨੂੰ ਚੰਗਾ ਕੰਮ ਕਰਨ ਲਈ ਪ੍ਰੇਰਨਾ ਦਿੰਦਾ ਹੈ ਤੇ ਉਹ ਵੀ ਤਦੇ, ਜੇ ਐਵਾਰਡ ਸਮਾਗਮ ਦੀ ਚੰਗੀ ਸਾਖ਼ ਵੀ ਹੋਵੇ। ਜਿਵੇਂ ਇਹ ਐਵਾਰਡ ਐਮੀ ਨਾਲ ਸੰਬੰਧਤ ਹੈ ਤਾਂ ਇਹ ਗੱਲ ਸਾਫ ਹੈ ਕਿ ਉਨ੍ਹਾਂ ਆਪਣੀ ਸਾਖ਼ ਬਣਾਉਣ ਲਈ ਕਾਫੀ ਮਿਹਨਤ ਕੀਤੀ ਹੈ। ਉਨ੍ਹਾਂ ਚੰਗੇ ਸਿਨੇਮਾ ਨੂੰ ਹੱਲਾਸ਼ੇਰੀ ਦਿੱਤੀ ਹੈ।”
ਵਰਨਣ ਯੋਗ ਹੈ ਕਿ ਇਸ ਫਿਲਮ ‘ਸੀਰੀਅਸ ਮੈਨ’ ਦੀ ਕਹਾਣੀ ਮਨੂ ਜੋਸਫ ਵੱਲੋਂ ਲਿਖੀ ਇਸੇ ਟਾਈਟਲ ਵਾਲੀ ਇੱਕ ਕਿਤਾਬ ਉੱਤੇ ਆਧਾਰਤ ਹੈ। ਸੁਧੀਰ ਮਿਸ਼ਰਾ ਦੀ ਨਿਰਦੇਸ਼ਤ ਇਹ ਫਿਲਮ ਭਾਰਤੀ ਸੰਦਰਭ ਵਿੱਚ ਜੀਵਨ ਦੇ ਟੀਚੇ ਅਤੇ ਜਾਤ ਆਧਾਰਤ ਰਾਜਨੀਤੀ ਉੱਤੇ ਤਿੱਖੀ ਚੋਟ ਕਰਦੀ ਹੈ।