ਚੰਡੀਗੜ੍ਹ, 13 ਅਕਤੂਬਰ (ਪੋਸਟ ਬਿਊਰੋ)- ਹੋਟਲ ਦੇ ਕਮਰੇ ਵਿੱਚ ਬਰਤਨ ਵਿੱਚ ਅੱਗ ਬਾਲ ਕੇ ਵਿਆਹ ਕਰਨ ਦਾ ਦਾਅਵਾ ਕਰਨ ਪਿੱਛੋਂ ਪੰਜਾਬ ਤੇ ਹਰਿਆਣਾ ਹਾਈ ਕੋਰਟ ਤੋਂ ਸੁਰੱਖਿਆ ਮੰਗਣਾ ਜੋੜੇ ਨੂੰ ਮਹਿੰਗਾ ਪੈ ਗਿਆ। ਵਿਆਹ ਦਾ ਕੋਈ ਸਬੂਤ ਨਾ ਦੇ ਸਕਣ ਉੱਤੇ ਕੋਰਟ ਨੂੰ ਗੁੰਮਰਾਹ ਕਰਨ ਉੱਤੇ ਜਸਟਿਸ ਗੁਰਵਿੰਦਰ ਸਿੰਘ ਗਿੱਲ ਨੇ ਜੋੜੇ ਉੱਤੇ 25 ਹਜ਼ਾਰ ਰੁਪਏ ਜੁਰਮਾਨਾ ਲਾਇਆ ਹੈ ਅਤੇ ਫੈਸਲੇ ਵਿੱਚ ਕਿਹਾ ਕਿ ਉਹ ਆਪਣੀ ਡਿਊਟੀ ਤੋਂ ਪਿੱਛੇ ਨਹੀਂ ਹਟ ਸਕਦੇ, ਇਸ ਲਈ ਜੋੜੇ ਦੀ ਸੁਰੱਖਿਆ ਦੇਣ ਦੀ ਮੰਗ ਬਾਰੇ ਅਰਜ਼ੀ ਉੱਤੇ ਪੰਚਕੂਲਾ ਦੇ ਐਸ ਪੀ ਫੈਸਲਾ ਲੈਣ। ਜੇ ਜਾਨ ਨੂੰ ਖਤਰਾ ਹੋਵੇ ਤਾਂ ਉਸ ਉੱਤੇ ਕਾਨੂੰਨ ਮੁਤਾਬਕ ਕਾਰਵਾਈ ਕੀਤੀ ਜਾਏ।
ਪੰਚਕੂਲਾ ਦੀ ਲੜਕੀ ਅਤੇ ਲੜਕੇ ਨੇ ਪਟੀਸ਼ਨ ਦਾਇਰ ਕਰ ਕੇ ਕਿਹਾ ਸੀ ਕਿ ਉਨ੍ਹਾਂ ਦੋਵਾਂ ਨੇ ਆਪਣੇ ਘਰੋਂ ਭੱਜ ਕੇ ਨਾਰਾਇਣਗੜ੍ਹ ਦੇ ਇੱਕ ਹੋਟਲ ਵਿੱਚ ਵਿਆਹ ਕੀਤਾ ਹੈ। ਹੋਟਲ ਵਿੱਚ ਹੀ ਦੋਵਾਂ ਨੇ ਇੱਕ ਦੂਸਰੇ ਨੂੰ ਜੈਮਾਲਾ ਪਾਈ, ਮਾਂਗ ਵਿੱਚ ਸੰਧੂਰ ਭਰਿਆ ਅਤੇ ਬਰਤਨ ਵਿੱਚ ਅੱਗ ਬਾਲ ਕੇ ਫੇਰੇ ਲੈ ਲਏ। ਹਾਈ ਕੋਰਟ ਨੇ ਸੁਣਵਾਈ ਦੌਰਾਨ ਵਿਆਹ ਦਾ ਸਬੂਤ ਦਿੱਤੇ ਜਾਣ ਦੇ ਹੁਕਮ ਦਿੱਤੇ ਅਤੇ ਕਿਹਾ ਕਿ ਵਿਆਹ ਦੀ ਨਾ ਕੋਈ ਫੋਟੋ ਅਤੇ ਨਾ ਕੋਈ ਸਰਟੀਫਿਕੇਟ ਹੈ। ਜੋੜੇ ਦੇ ਇਲਾਵਾ ਕਮਰੇ ਵਿੱਚ ਮੰਤਰ ਪੜ੍ਹਨ ਵਾਲਾ ਵੀ ਕੋਈ ਨਹੀਂ ਸੀ। ਇਸ ਲਈ ਦਾਅਵਾ ਸਹੀ ਨਹੀਂ ਮੰਨਿਆ ਜਾ ਸਕਦਾ।