ਧਾਰੀਵਾਲ, 13 ਅਕਤੂਬਰ (ਪੋਸਟ ਬਿਊਰੋ)- ਪਿੰਡ ਕਲਿਆਣਪੁਰ ਵਿੱਚ ਨਾਜਾਇਜ਼ ਤੌਰ ਉੱਤੇ ਚੱਲ ਰਹੇ ਬੁੱਚੜਖਾਨੇ ਦਾ ਪੁਲਸ ਨੇ ਪਰਦਫਾਸ਼ ਕਰਕੇ ਦਰਜਨ ਦੇ ਕਰੀਬ ਲੋਕਾਂ ਨੂੰ ਗ਼੍ਰਿਫ਼ਤਾਰ ਕੀਤਾ ਹੈ। ਇਸ ਬੁੱਚੜਖਾਨੇ ਤੋਂ ਪੁਲਸ ਨੇ ਮੌਕੇ ਤੋਂ ਤਿੰਨ ਜਿਊਂਦੀਆਂ ਗਊਆਂ, ਇੱਕ ਵੱਛਾ, ਤਿੰਨ ਗਊਆਂ ਦੀਆਂ ਲਾਸ਼ਾਂ, ਵੱਡੀ ਮਾਤਰਾ ਵਿੱਚ ਪਿੰਜਰ ਅਤੇ ਹੋਰ ਸਾਮਾਨ ਬਰਾਮਦ ਕੀਤਾ ਹੈ, ਜਿਹੜਾ ਪਸ਼ੂਆਂ ਦੀ ਹੱਤਿਆ ਕਰਨ ਦੇ ਕੰਮ ਆਉਂਦਾ ਸੀ।
ਡੀ ਐਸ ਪੀ ਰਾਜੇਸ਼ ਕੱਕੜ ਨੇ ਦੱਸਿਆ ਹੈ ਕਿ ਪਿੰਡ ਕਲਿਆਣਪੁਰ ਵਿੱਚ ਕੁਝ ਲੋਕ ਬੁੱਚੜਖਾਨੇ ਦੇਪਰਦੇ ਵਿੱਚ ਗਊਆਂ ਨੂੰ ਕਤਲ ਕਰ ਕੇ ਉਨ੍ਹਾਂ ਦਾ ਮਾਸ ਅਤੇ ਚਮੜੀ ਵੇਚਦੇ ਸਨ,ਜਿਸ ਉਤੇ ਛਾਪੇਮਾਰੀ ਕਰਦਿਆਂ ਮੌਕੇ ਤੋਂ 11 ਲੋਕਾਂ ਨੂੰ ਗ਼੍ਰਿਫ਼ਤਾਰ ਕੀਤਾ ਹੈ, ਜਿਨ੍ਹਾਂ ਵਿੱਚ ਨਿਆਮਤ ਮਸੀਹ ਪੁੱਤਰ ਕੁੰਨਣ ਮਸੀਹ, ਵਿੱਕੀ ਪੁੱਤਰ ਜੇਮਸ ਮਸੀਹ, ਰਵੀ ਪੁੱਤਰ ਨਿਆਮਤ ਮਸੀਹ, ਥੋਮਸ ਪੁੱਤਰ ਜੇਮਸ ਮਸੀਹ, ਜੇਮਸ ਪੁੱਤਰ ਕੁੰਨਣ ਮਸੀਹ, ਜੋਨੀ ਉਰਫ਼ ਜੋਨ ਪੁੱਤਰ ਹੈਪੀ, ਬਲਕਾਰ ਮਸੀਹ ਪੁੱਤਰ ਸਰਦਾਰ ਮਸੀਹ ਸਾਰੇ ਵਾਸੀ ਤਰੀਜਾਨਗਰ ਅਤੇ ਰਵੀ ਪੁੱਤਰ ਸਿਦੀਕ ਮਸੀਹ ਪਿੰਡ ਚੱਕ ਦੀਪੇਵਾਲ, ਵਸਨੀਕ ਪੁੱਤਰ ਸੁਗੀਰ, ਤਨਵੀਰ ਪੁੱਤਰ ਰਫੀਕ, ਨਾਸਕ ਪੁੱਤਰ ਆਰਫ ਵਾਸੀ ਨੋਨਸਤਾ (ਉਤਰ ਪ੍ਰਦੇਸ਼) ਸ਼ਾਮਲ ਹਨ।