ਬਠਿੰਡਾ, 13 ਅਕਤੂਬਰ (ਪੋਸਟ ਬਿਊਰੋ)- ਆਸਾਮ ਦਾ ਇੱਕ ਬੋਡੋ ਅੱਤਵਾਦੀ ਬਠਿੰਡਾਤੋਂ ਗ਼੍ਰਿਫ਼ਤਾਰ ਕੀਤਾ ਗਿਆ ਹੈ, ਜਿਸ ਨੂੰ ਚਲਦੀ ਫਿਰਦੀ ‘ਅਸਲਾ ਫ਼ੈਕਟਰੀ’ ਕਿਹਾ ਜਾ ਸਕਦਾ ਹੈ। ਉਸ ਕੋਲੋਂ ਦੋ ਦੇਸੀ ਪਿਸਤੌਲ ਵੀ ਬਰਾਮਦ ਹੋਏ ਹਨ। ਗ਼੍ਰਿਫ਼ਤਾਰ ਅਤਿਵਾਦੀ ਦੇ ਹੋਰ ਸਾਥੀਆਂ ਦੇ ਵੀ ਇਲਾਕੇ ਵਿੱਚ ਹੋਣ ਦੀ ਸੰਭਾਵਨਾ ਹੈ।
ਥਾਣਾ ਸਿਵਲ ਲਾਈਨ ਪੁਲਸ ਨੂੰ ਸੂਚਨਾ ਮਿਲੀ ਸੀ ਕਿ ਆਸਾਮ ਦੇ ਬੋਡੋ ਲਿਬਰੇਸ਼ਨ ਟਾਈਗਰ ਫ਼ੋਰਸ ਦਾ ਮੈਂਬਰ ਸੰਜੇ ਬਰਾਓ ਬਠਿੰਡਾ ਵਿੱਚ ਇੱਕ ਪਲੰਬਰ ਨਾਲ ਆਇਆ ਸੀ ਤੇ ਪਲੰਬਰ ਵਜੋਂ ਇੱਥੇ ਕੰਮ ਕਰ ਰਿਹਾ ਹੈ। ਪੁਲਸ ਨੇ ਇੱਕ ਯੋਜਨਾ ਤਹਿਤ ਪਾਵਰ ਹਾਊਸ ਰੋਡ ਤੋਂ ਸੰਜੇ ਬਰਾਓ ਨੂੰ ਗ਼੍ਰਿਫ਼ਤਾਰ ਕਰ ਲਿਆ। ਪੁੱਛਗਿੱਛ ਦੌਰਾਨ ਉਸ ਕੋਲੋਂ ਦੋ ਦੇਸੀ ਪਿਸਤੌਲ ਮਿਲੇ ਹਨ।ਡੀ ਐਸ ਪੀ ਆਸ਼ਵੰਤ ਸਿੰਘ ਨੇ ਦੱਸਿਆ ਕਿ ਇਸ ਅੱਤਵਾਦੀ ਤੋਂ ਡੂੰਘਾਈ ਨਾਲ ਪੁੱਛਗਿੱਛ ਕੀਤੀ ਜਾ ਰਹੀ ਹੈ। ਪਤਾ ਲੱਗਾ ਹੈ ਕਿ ਇਹ ਅਸਲਾ ਬਣਾਉਣ ਦਾ ਮਾਹਰ ਹੈ, ਜੋ ਆਪਣੀ ਜਥੇਬੰਦੀਦਾ ਇਹੀ ਕੰਮ ਕਰਦਾ ਸੀ। ਇਹ ਵੀ ਦੱਸਣਯੋਗ ਹੈ ਕਿ ਬਠਿੰਡਾ ਵਿੱਚ ਦੁਸਹਿਰਾ ਸਮਾਗਮ ਦੇ ਮੁੱਖ ਮਹਿਮਾਨ ਵਜੋਂ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਏਥੇ ਆਰਹੇ ਹਨ। ਉਸ ਵਿਅਕਤੀ ਦਾ ਸ਼ਹਿਰ ਵਿੱਚੋਂ ਗ਼੍ਰਿਫ਼ਤਾਰ ਹੋਣਾ ਜਾਂ ਇਸ ਦੇ ਹੋਰ ਸਾਥੀਆਂ ਦੇ ਸ਼ਹਿਰ ਵਿੱਚ ਹੋਣ ਦੀ ਸੰਭਾਵਨਾ ਚਿੰਤਾ ਦਾ ਵਿਸ਼ਾ ਹੈ। ਪ੍ਰੰਤੂ ਪੁਲਸ ਨੇ ਸੁਰੱਖਿਆ ਪਹਿਰਾ ਸਖ਼ਤ ਕਰ ਦਿੱਤਾ ਹੈ।