ਤੇਲ ਅਵੀਵ, 13 ਅਕਤੂਬਰ (ਪੋਸਟ ਬਿਊਰੋ)- ਇਸਰਾਈਲ ਦੇ ਤੇਲ ਅਵੀਵਸ਼ਹਿਰ ਵਿੱਚ ਕੱਲ੍ਹ ਦਰਜਨਾਂ ਡਰੋਨ ਇੱਕੋ ਵਾਰ ਅਸਮਾਨ ਵਿੱਚ ਉਡਦੇ ਦਿਖਾਈ ਦਿੱਤੇ, ਜਿਨ੍ਹਾਂ ਨੇ ਪੂਰੇ ਦੇਸ਼ ਵਿੱਚ ਆਈਸਕ੍ਰੀਮ ਅਤੇ ਸੁਸ਼ੀ (ਵਿਸ਼ੇਸ਼ ਤਰੀਕੇ ਨਾਲ ਪਕਾਇਆ ਚੌਲ) ਪਹੁੰਚਾਇਆ। ਇਸਰਾਈਲ ਦੇ ਸਰਕਾਰੀ ਪ੍ਰੋਗਰਾਮ ‘ਰਾਸ਼ਟਰੀ ਡਰੋਨ ਪਹਿਲ’ ਵਿੱਚ ਅਜਿਹੀ ਦੁਨੀਆ ਦੀ ਤਿਆਰੀ ਲਈ ਤਜਰਬਾ ਕੀਤਾ ਗਿਆ ਸੀ, ਜਿਸ ਵਿੱਚ ਜ਼ਿਆਦਾਤਰ ਭੀੜ-ਭੜੱਕੇ ਵਾਲੇ ਸ਼ਹਿਰਾਂ ਦੀਆਂ ਸੜਕਾਂ ਉੱਤੇ ਦਬਾਅ ਘੱਟ ਕਰਨ ਲਈ ਡਰੋਨ ਦੀ ਮਦਦ ਨਾਲ ਵੱਡੀ ਮਾਤਰਾ ਵਿੱਚ ਵਪਾਰਕ ਸਪਲਾਈ ਕੀਤੀ ਜਾਏਗੀ।
ਦੋ ਸਾਲ ਦੇ ਇਸ ਪ੍ਰੋਗਰਾਮ ਦਾ ਉਦੇਸ਼ ਇੱਕ ਦੇਸ਼ਵਿਆਪੀ ਨੈਟਵਰਕ ਸਥਾਪਤ ਕਰਨ ਲਈ ਇਸਰਾਈਲ ਡਰੋਨ ਕੰਪਨੀਆਂ ਦੀਆਂ ਸਮਰੱਥਾ ਦੀ ਵਰਤੋਂ ਕਰਨੀ ਹੈ, ਜਿੱਥੇ ਗਾਹਕ ਸਾਮਾਨ ਦਾ ਆਰਡਰ ਕਰ ਸਕਦੇ ਹਨ ਅਤੇ ਮਿਥੇ ਥਾਵਾਂ ਉੱਤੇ ਉਨ੍ਹਾਂ ਨੂੰ ਪੁਚਾਇਆ ਜਾ ਸਕਦਾ ਹੈ। ਅੱਠ ਪੜਾਵਾਂ ਦੇ ਪ੍ਰਾਜੈਕਟ ਦਾ ਇਹ ਤੀਸਰਾ ਪੜਾਅ ਹੈ ਅਤੇ ਇਹ ਵੀ ਆਪਣੀ ਸ਼ੁਰੂ ਦੀ ਅਵਸਥਾ ਵਿੱਚ ਹੈ। ਇਸ ਪ੍ਰਾਜੈਕਟ ਦੇ ਸਾਹਮਣੇ ਅਜੇ ਸੁਰੱਖਿਆ ਤੇ ਰਸਦ ਬਾਰੇ ਕਈ ਸਵਾਲ ਹਨ। ਇਸਰਾਈਲ ਡਰੋਨ ਤਕਨੀਕ ਵਿੱਚ ਦੁਨੀਆ ਵਿੱਚੋਂ ਮੋਹਰੀ ਹੈ ਅਤੇ ਇਸਦੀ ਫ਼ੌਜ ਉਚ ਤਕਨੀਕ ਵਾਲੀ ਹੈ। ਡਰੋਨ ਪਹਿਲ ਵਿੱਚ ਭਾਗ ਲੈਣ ਵਾਲੀਆਂ 16 ਕੰਪਨੀਆਂ ਵਿੱਚੋਂ ਕਈਆਂ ਦੇ ਫ਼ੌਜ ਨਾਲ ਸਬੰਧ ਹਨ।