ਮੁੰਬਈ, 9 ਅਕਤੂਬਰ (ਪੋਸਟ ਬਿਊਰੋ)- ਕਰੂਜ਼ ਡਰੱਗ ਪਾਰਟੀ ਕੇਸ ਵਿੱਚ ਅਭਿਨੇਤਾ ਸ਼ਾਹਰੁਖ ਖ਼ਾਨ ਦੇ ਬੇਟੇ ਆਰੀਅਨ ਨੂੰ ਜਮਾਨਤ ਨਹੀਂ ਮਿਲ ਸਕੀ। ਉਸ ਦੀ ਅਤੇ ਦੋ ਹੋਰ ਦੋਸ਼ੀਆਂ ਦੀ ਅਰਜ਼ੀ ਮੁੰਬਈ ਦੇ ਐਡੀਸ਼ਨਲ ਚੀਫ ਮੈਟਰੋਪੋਲਿਟਨ ਮੈਜਿਸਟ੍ਰੇਟ ਆਰ ਐਮ ਨਿਰਲੇਕਰ ਨੇ ਕੱਲ੍ਹ ਰੱਦ ਕਰ ਦਿੱਤੀ ਸੀ। ਇਸ ਪਿੱਚੋਂ ਉਨ੍ਹਾਂ ਨੂੰ ਆਰਥਕ ਰੋਡ ਜੇਲ੍ਹ ਭੇਜ ਦਿੱਤਾ ਗਿਆ ਹੈ। ਜੱਜ ਨੇ ਆਰੀਅਨ, ਉਸ ਦੇ ਦੋਸਤ ਅਰਬਾਜ ਸਚੇਟ ਅਤੇ ਮਾਡਲ ਮੁਨਮੁਨ ਧਾਮੇਚਾ ਦੀ ਅਰਜ਼ੀ ‘ਸੁੁਣਵਾਈ ਦੇ ਲਾਇਕ ਨਹੀਂ’ ਮੰਨੀ। ਐਡੀਸ਼ਨਲ ਸਾਲਿਸਟਰ ਜਨਰਲ (ਏ ਐਸ ਜੀ) ਅਨਿਲ ਸਿੰਘ ਦਾ ਕਹਿਣਾ ਸੀ ਕਿ ਐਨ ਡੀ ਪੀ ਐਸ ਦੀ ਧਾਰਾਵਾਂ ਹੋਣ ਕਾਰਨਐਡੀਸ਼ਨਲ ਮੈਟਰੋਪਾਲਿਟਨ ਮੈਜਿਸਟਰੇਟ ਨੂੰ ਜਮਾਨਤ ਦੇਣ ਦਾ ਅਧਿਕਾਰ ਨਹੀਂ।
ਸਰਕਾਰੀ ਵਕੀਲ ਨੇ ਕਿਹਾ ਕਿ ਦੋਸ਼ੀ ਨੂੰ ਐਨ ਡੀ ਪੀ ਐਸ ਕੋਰਟ ਤੋਂ ਜਮਾਨਤ ਮੰਗਣੀ ਚਾਹੀਦੀ ਹੈ। ਉਨ੍ਹਾਂ ਕਿਹਾ, ‘ਇਹ ਲੋਕ ਕਿੰਨੇ ਪ੍ਰਭਾਵਸ਼ਾਲੀ ਹਨ, ਇਸਦਾ ਵਿਚਾਰ ਕੀਤਾ ਜਾਣਾ ਚਾਹੀਦਾ ਹੈ। ਸਬੂਤਾਂ ਦੇ ਨਾਲ ਛੇੜਛਾੜ ਦੀ ਸੰਭਾਵਨਾ ਹੈ। ਆਰੀਅਨ ਨੂੰ ਜਮਾਨਤ ਮਿਲਣ ਉੱਤੇ ਜਾਂਚ ਵਿੱਚ ਰੁਕਾਵਟ ਆ ਸਕਦੀ ਹੈ।' ਆਰੀਅਨ ਦੇ ਵਕੀਲ ਸਤੀਸ਼ ਮਾਨਸ਼ਿੰਦੇ ਨੇ ਕਿਹਾ, ਕੋਰਟ ਨੂੰ ਜਮਾਨਤ ਅਰਜ਼ੀ ਉੱਤੇ ਸੁਣਵਾਈ ਦਾ ਅਧਿਕਾਰ ਹੈ। ਉਨ੍ਹਾਂ ਨੇ ਆਰੀਅਨ ਵੱਲੋਂ ਦਲੀਲ ਦਿੱਤੀ, ‘ਮੇਰੇ ਮਾਤਾ-ਪਿਤਾ ਤੇ ਪੂਰਾ ਪਰਵਾਰ ਇਥੇ ਹੈ। ਮੇਰੇ ਪਾਸ ਭਾਰਤੀ ਪਾਸਪੋਰਟ ਹੈ। ਮੈਂ ਭੱਜਣ ਵਾਲਾ ਨਹੀਂ, ਸਬੂਤਾਂ ਨਾਲ ਛੇੜ-ਛਾੜ ਦਾ ਸਵਾਲ ਨਹੀਂ ਉਠਦਾ। ਮੈਨੂੰ ਜਮਾਨਤ ਦਿੱਤੀ ਜਾਵੇ, ਪਰ ਜੱਜ ਨੇ ਅਪੀਲ ਨਹੀਂ ਮੰਨੀ।’