ਵਾਸਿੰ਼ਗਟਨ, 7 ਅਕਤੂਬਰ (ਪੋਸਟ ਬਿਊਰੋ) : ਵੀਰਵਾਰ ਨੂੰ ਫਾਈਜ਼ਰ ਨੇ ਅਮਰੀਕੀ ਸਰਕਾਰ ਨੂੰ ਆਪਣੀ ਕੋਵਿਡ-19 ਵੈਕਸੀਨ 5 ਤੋਂ 11 ਸਾਲ ਦੇ ਬੱਚਿਆਂ ਨੂੰ ਲਗਾਉਣ ਦੀ ਇਜਾਜ਼ਤ ਦੇਣ ਦੀ ਮੰਗ ਕੀਤੀ ਹੈ। ਜੇ ਰੈਗੂਲੇਟਰਜ਼ ਸਹਿਮਤ ਹੁੰਦੇ ਹਨ ਤਾਂ ਇਹ ਸ਼ੌਟਸ ਕੁੱਝ ਹਫਤਿਆਂ ਵਿੱਚ ਹੀ ਸ਼ੁਰੂ ਹੋ ਜਾਣਗੇ।
ਬਹੁਤ ਸਾਰੇ ਮਾਪੇ ਤੇ ਪੈਡੀਟ੍ਰੀਸ਼ੀਅਨ ਲੰਮੇਂ ਸਮੇਂ ਤੋਂ ਇਹ ਰੌਲਾ ਪਾ ਰਹੇ ਹਨ ਕਿ 12 ਸਾਲ ਤੋਂ ਨਿੱਕੀ ਉਮਰ ਦੇ ਬੱਚਿਆਂ ਦੀ ਹਿਫਾਜ਼ਤ ਲਈ ਵੀ ਕੁੱਝ ਕੀਤਾ ਜਾਵੇ। ਇਸ ਸਮੇਂ ਫਾਈਜ਼ਰ ਤੇ ਉਸ ਦੀ ਜਰਮਨ ਪਾਰਟਨਰ ਬਾਇਓਐਨਟੈਕ ਵੱਲੋਂ 12 ਸਾਲ ਤੱਕ ਦੇ ਬੱਚਿਆਂ ਨੂੰ ਫਾਈਜ਼ਰ ਵੈਕਸੀਨ ਲਾਈ ਜਾ ਰਹੀ ਹੈ। ਨਾ ਸਿਰਫ ਨਿੱਕੇ ਬੱਚੇ ਕਈ ਵਾਰੀ ਬਹੁਤ ਬਿਮਾਰ ਪੈ ਜਾਂਦੇ ਹਨ ਸਗੋਂ ਅਜੇ ਵੀ ਜਦੋਂ ਕਰੋਨਾਵਾਇਰਸ ਦਾ ਡਰ ਪੂਰੀ ਤਰ੍ਹਾਂ ਖ਼ਤਮ ਨਹੀਂ ਹੋਇਆ ਅਜਿਹੇ ਵਿੱਚ ਬੱਚਿਆਂ ਨੂੰ ਸਕੂਲਾਂ ਵਿੱਚ ਰੱਖਣਾ ਵੀ ਬਹੁਤ ਮੁਸ਼ਕਲ ਲੱਗਦਾ ਹੈ।
ਫਾਈਜ਼ਰ ਨੇ ਐਲਾਨ ਕੀਤਾ ਹੈ ਕਿ ਉਸ ਨੇ ਫੂਡ ਐਡ ਡਰੱਗ ਐਡਮਨਿਸਟ੍ਰੇਸ਼ਨ ਕੋਲ ਇਸ ਸਬੰਧੀ ਅਰਜ਼ੀ ਰਸਮੀ ਤੌਰ ਉੱਤੇ ਭੇਜ ਦਿੱਤੀ ਹੈ।