ਓਨਟਾਰੀਓ, 6 ਅਕਤੂਬਰ (ਪੋਸਟ ਬਿਊਰੋ) : ਕੁੱਝ ਓਨਟਾਰੀਓ ਹੈਲਥ ਯੂਨਿਟਸ ਯੂਥ ਸਪੋਰਟਸ ਲਈ ਪ੍ਰੋਵਿੰਸ ਨਾਲੋਂ ਵੀ ਸਖ਼ਤ ਕੋਵਿਡ-19 ਨਿਯਮ ਅਪਣਾਅ ਰਹੇ ਹਨ।
ਪ੍ਰੋਵਿੰਸ ਦੀ ਵੈਕਸੀਨੇਸ਼ਨ ਦੇ ਸਬੂਤ ਵਾਲੀ ਪਾਲਿਸੀ, ਜਿਹੜੀ ਜਿੰਮਜ਼ ਤੇ ਹਰ ਇੰਡੋਰ ਫੈਸਿਲਿਟੀਜ਼ ਉੱਤੇ ਵੀ ਲਾਗੂ ਹੈ, ਤੋਂ 18 ਸਾਲ ਤੋਂ ਘੱਟ ਉਮਰ ਦੇ ਉਨ੍ਹਾਂ ਲੋਕਾਂ ਨੂੰ ਛੋਟ ਦਿੱਤੀ ਜਾ ਰਹੀ ਹੈ ਜੋ ਆਰਗੇਨਾਈਜ਼ਡ ਸਪੋਰਟਸ ਵਿੱਚ ਹਿੱਸਾ ਲੈਣ ਲਈ ਇਨ੍ਹਾਂ ਫੈਸਿਲਿਟੀਜ਼ ਵਿੱਚ ਦਾਖਲ ਹਨ।
ਪਰ ਵਿੰਡਸਰ ਐਸੈਕਸ ਕਾਊਂਟੀ ਤੇ ਯੌਰਕ ਰੀਜਨ ਨੂੰ ਕਵਰ ਕਰਨ ਵਾਲੀਆਂ ਹੈਲਥ ਯੂਨਿਟਸ ਵੱਲੋਂ ਇਸ ਛੋਟ ਨੂੰ ਖਤਮ ਕਰ ਦਿੱਤਾ ਗਿਆ ਹੈ। ਇਨ੍ਹਾਂ ਯੂਨਿਟਸ ਦਾ ਕਹਿਣਾ ਹੈ ਕਿ ਜ਼ੋਰ ਨਾਲ ਸਾਹ ਲੈਣ, ਨੇੜੇ ਤੇ ਲੰਮੇਂ ਸਮੇਂ ਤੱਕ ਰਹਿਣ ਵਾਲੇ ਕਾਂਟੈਕਟ ਤੇ ਸਪੋਰਟਸ ਦੌਰਾਨ ਭੀੜ ਭਾੜ ਵਾਲੀਆਂ ਇੰਡੋਰ ਥਾਂਵਾਂ ਦੌਰਾਨ ਕੋਵਿਡ-19 ਹੋਣ ਦਾ ਡਰ ਵੱਧ ਜਾਂਦਾ ਹੈ।
ਉੱਤਰੀ ਓਨਟਾਰੀਓ ਦੀਆਂ ਸੱਤ ਹੈਲਥ ਯੂਨਿਟਸ ਕਵਰ ਕਰਨ ਵਾਲੇ ਮੈਡੀਕਲ ਆਫੀਸਰਜ਼ ਚਾਹੁੰਦੇ ਹਨ ਕਿ ਕੋਚਾਂ, ਅਧਿਕਾਰੀਆਂ ਤੇ ਇੰਡੋਰ ਆਰਗੇਨਾਈਜ਼ਡ ਸਪੋਰਟਸ ਨਾਲ ਸਬੰਧਤ 12 ਸਾਲ ਤੱਕ ਦੀ ਉਮਰ ਵਾਲੇ ਵਾਲੰਟੀਅਰਜ਼ ਦਾ ਲਾਜ਼ਮੀ ਟੀਕਾਕਰਣ ਹੋਵੇ। ਇਹ ਇਮਿਊਨਾਈਜ਼ੇਸ਼ਨ ਨਿਯਮ ਯੂਥ ਪਾਰਟੀਸਿਪੈਂਟਸ ਉੱਤੇ ਲਾਗੂ ਨਹੀਂ ਹੁੰਦਾ ਪਰ ਉੱਘੇ ਆਗੂਆਂ ਦਾ ਕਹਿਣਾ ਹੈ ਕਿ ਲੋੜ ਪੈਣ ਉੱਤੇ ਉਹ ਇਨ੍ਹਾਂ ਨਿਯਮਾਂ ਨੂੰ ਵੀ ਬਦਲ ਦੇਣਗੇ।