ਟੋਕੀਓ, 8 ਅਗਸਤ, (ਪੋਸਟ ਬਿਊਰੋ)- ਅੱਜ ਐਤਵਾਰ ਨੂੰਉਲੰਪਿਕ ਦੇ ਸਮਾਪਤੀ ਸਮਾਰੋਹ ਦੇ ਲਈ ਇਕ ਸ਼ਾਨਦਾਰ ਪ੍ਰੋਗਰਾਮ ਦਾ ਆਯੋਜਨ ਕੀਤਾ ਗਿਆ ਅਤੇ ਤਕਨਾਲੋਜੀ ਦੇ ਲਈ ਦੁਨੀਆ ਭਰ ਵਿਚ ਜਾਣੇ ਜਾਂਦੇ ਜਾਪਾਨ ਨੇ ਸਮਾਰੋਹ ਨੂੰ ਸ਼ਾਨਦਾਰ ਬਣਾਉਣ ਵਿਚ ਕੋਈ ਕਸਰ ਨਹੀਂ ਛੱਡੀ। ਐੱਲ ਈ ਡੀ ਲਾਈਟਾਂ ਅਤੇ ਲੇਜ਼ਰ ਦੀ ਮਦਦ ਨਾਲ ਕਈ ਤਸਵੀਰਾਂ ਬਣਾਈਆਂ ਅਤੇ ਇਸ ਰੰਗਾ-ਰੰਗ ਮਾਹੌਲ ਵਿੱਚ ਅੰਤਰਰਾਸ਼ਟਰੀ ਉਲੰਪਿਕ ਕਮੇਟੀ ਨੇ ਅਗਲਾ ਉਲੰਪਿਕ ਕਰਾਉਣ ਵਾਲੀ ਪੈਰਿਸ ਉਲੰਪਿਕ ਕਮੇਟੀ ਦੇ ਮੈਂਬਰਾਂ ਨੂੰ ਅਗਲੇ ਉਲੰਪਿਕ ਦੇ ਲਈ ਰਸਮੀ ਮਸ਼ਾਲ ਸੌਂਪ ਦਿੱਤੀ।
ਟੋਕੀਓ ਉਲੰਪਿਕ ਦੇ ਸਮਾਪਤੀ ਸਮਾਰੋਹ ਦੇ ਅੰਤ ਵਿਚ ਟੋਕੀਓ ਦੇ ਲੋਕਲ ਭਾਸ਼ਾ ਦੇ ਸ਼ਬਦ ਐਰੀਗਾਤੋ (ਧੰਨਵਾਦ) ਦੇ ਨਾਲ ਸਭ ਨੂੰ ਵਿਦਾ ਕੀਤਾ ਗਿਆ। ਇਸ ਮੌਕੇ ਉਲੰਪਿਕ ਦੇ ਸਮਾਪਤੀ ਸਮਾਰੋਹ ਦੌਰਾਨ ਹੀ ਦੂਰ ਫਰਾਂਸ ਦੀ ਰਾਜਧਾਨੀ ਪੈਰਿਸ ਦੇ ਆਈਫਲ ਟਾਵਰ ਉੱਤੇ 2024 ਵਿੱਚ ਹੋਣ ਵਾਲੇ ਪੈਰਿਸ ਉਲੰਪਿਕ ਦਾ ਸ਼ਾਨਦਾਰ ਝੰਡਾ ਲਹਿਰਾਇਆ ਗਿਆ।ਪੈਰਿਸ ਪ੍ਰਸ਼ਾਸਨ ਨੇ ਪਹਿਲਾਂ ਹੀ ਐਲਾਨ ਕਰ ਦਿੱਤਾ ਸੀ ਕਿ ਉਹ ਇਸ ਮੌਕੇ ਵੱਡਾ ਝੰਡਾ ਲਹਿਰਾਉਣਗੇ।
ਜਪਾਨ ਦੇ ਸ਼ਹਿਰ ਟੋਕੀਓਵਿੱਚ ਹੋਏ ਇਨ੍ਹਾਂ ਉਲੰਪਿਕ ਵਿਚ ਅਮਰੀਕਾ ਦੀ ਇੱਕਮਹਿਲਾ ਟਰੈਕ ਐਥਲੀਟ ਨੇ 11 ਤਮਗੇ ਜਿੱਤ ਕੇ ਧੁੰਮ ਮਚਾ ਦਿੱਤੀ ਹੈ। ਐਲਿਸਨ ਫੇਲਿਕਸ ਨਾਮ ਦੀ ਇਹ ਐਥਲੀਟ ਸਭ ਤੋਂ ਵੱਧ ਤਮਗੇ ਜਿੱਤਣ ਵਾਲੀ ਅਮਰੀਕੀ ਐਥਲੀਟ ਬਣ ਗਈ ਹੈ। ਉਸਨੇ ਸ਼ਨੀਵਾਰ ਨੂੰ ਆਪਣਾ 11 ਵਾਂ ਤਮਗਾ ਜਿੱਤਿਆ। ਇਸ ਤੋਂ ਪਹਿਲਾਂ ਅਮਰੀਕਾ ਦੇ ਕਾਰਲ ਲੇਵਿਸ ਦਾ ਸਭ ਤੋਂ ਵੱਧ ਤਮਗੇ ਜਿੱਤਣ ਦਾ ਰਿਕਾਰਡ ਸੀ।ਐਲਿਸਨ ਫੇਲਿਕਸ ਦੇ 11 ਤਮਗਿਆਂ ਵਿੱਚੋਂ ਸੱਤ ਸੋਨੇ ਦੇ, ਤਿੰਨ ਚਾਂਦੀ ਅਤੇ ਇੱਕ ਕਾਂਸੀ ਦਾ ਤਮਗਾ ਹੈ। 35 ਸਾਲ ਦੀ ਉਮਰਵਿੱਚਉਹ ਟਰੈਕ ਐਂਡ ਫੀਲਡ ਸੋਨ ਤਮਗਾ ਜਿੱਤਣ ਵਾਲੀ ਸਭ ਤੋਂ ਵੱਧ ਉਮਰ ਦੀ ਅਮਰੀਕੀ ਮਹਿਲਾ ਵੀ ਹੈ।ਟੋਕੀਓ ਖੇਡਾਂ ਨੇ ਫੇਲਿਕਸ ਨੂੰ ਇਕ ਮਾਂ ਵਜੋਂ ਵੀ ਪੇਸ਼ ਕੀਤਾ ਹੈ। ਉਸ ਨੇ ਜੂਨਵਿੱਚ ਯੂ ਐੱਸ ਟਰੈਕ ਤੇ ਫੀਲਡ ਉਲੰਪਿਕ ਟਰਾਇਲਜ਼ਵਿੱਚ ਪ੍ਰਦਰਸ਼ਨ ਦੇ ਬਾਅਦ ਆਪਣੀ ਧੀ ਕੈਮਰੀ ਗ੍ਰੇਸ ਅਤੇ ਸਾਥੀ ਓਲੰਪੀਅਨ ਕਵੇਨੇਰਾ ਹੇਅਸ ਅਤੇ ਉਸਦੇ ਬੇਟੇ ਡੇਮੇਟ੍ਰੀਅਸ ਦੇ ਨਾਲ ਆਪਣੇ ਖੁਸ਼ੀ ਦੇ ਪਲ ਸਾਂਝੇ ਕੀਤੇ। ਇਹ ਮਹਿਲਾ ਐਥਲੀਟ ਉਨ੍ਹਾਂ ਲੋਕਾਂ ਲਈ ਜਵਾਬ ਹੈ, ਜੋ ਔਰਤਾਂ ਨੂੰ ਕਮਜ਼ੋਰ ਸਮਝਦੇ ਹਨ।