ਨਵੀਂ ਦਿੱਲੀ, 4 ਅਗਸਤ (ਪੋਸਟ ਬਿਊਰੋ)- ਅਮਰੀਕਾ ਨੇ ਭਾਰਤ ਨੂੰ 8.2 ਕਰੋੜ ਡਾਲਰ ਦੀ ਅਨੁਮਾਨਤ ਲਾਗਤ ਵਾਲੇ ਐਂਟੀ-ਸ਼ਿਪ ਮਿਜ਼ਾਈਲ ਹਾਰਪੂਨ ਜੁਆਇੰਟ ਕਾਮਨ ਟੈਸਟ ਸੈਟ (ਜੇ ਸੀ ਟੀ ਐਸ) ਤੇ ਸਬੰਧਤ ਸਾਮਾਨ ਦੀ ਵਿਕਰੀ ਨੂੰ ਮਨਜ਼ੂਰੀ ਦੇ ਦਿੱਤੀ ਹੈ। ਇਸ ਸੌਦੇ ਨਾਲ ਭਾਰਤ ਦੀ ਆਪਣੀ ਸੁਰੱਖਿਆ ਅਤੇ ਵਿਦੇਸ਼ ਨੀਤੀ ਨੂੰ ਮਦਦ ਮਿਲੇਗੀ ਅਤੇ ਇਹ ਦੋਵਾਂ ਦੇਸ਼ਾਂ ਦੀ ਰਣਨੀਤਕ ਭਾਈਵਾਲੀ ਨੂੰ ਹੋਰ ਮਜ਼ਬੂਤ ਕਰਨ ਵਿੱਚ ਸਹਾਇਤਾ ਕਰੇਗੀ।
ਇਸ ਸੰਬੰਧ ਵਿੱਚ ਅਮਰੀਕੀ ਰੱਖਿਆ ਵਿਭਾਗ ਦੀ ਸੁਰੱਖਿਆ ਸਹਿਯੋਗ ਏਜੰਸੀ (ਡੀ ਐਸ ਸੀ ਏ) ਨੇ ਸੋਮਵਾਰ ਨੂੰ ਅਮਰੀਕੀ ਕਾਂਗਰਸ (ਪਾਰਲੀਮੈਂਟ) ਨੂੰ ਇਸ ਵਿਕਰੀ ਬਾਰੇ ਸੂਚਿਤ ਕਰਦਿਆਂ ਲੋੜੀਂਦਾ ਸਰਟੀਫਿਕੇਸ਼ਨ ਦੇ ਦਿੱਤਾ, ਜਿਸ ਲਈ ਵਿਦੇਸ਼ ਵਿਭਾਗ ਵੱਲੋਂ ਭਾਰਤ ਸਰਕਾਰ ਨੂੰ ਵਿਦੇਸ਼ੀ ਫੌਜੀ ਸਾਜੋ-ਸਾਮਾਨ ਦੀ ਵਿਕਰੀ ਨੂੰ ਮਨਜ਼ੂਰੀ ਦਿੱਤੀ ਗਈ ਹੈ। ਡੀ ਐਸ ਸੀ ਏ ਨੇਦੱਸਿਆ ਹੈ ਕਿ ਭਾਰਤ ਸਰਕਾਰ ਨੇ ਇੱਕ ਜੇ ਸੀ ਟੀ ਐਸ ਅਤੇ ਇੱਕ ਹਾਰਪੂਨ ਇੰਟਰਮੀਡੀਏਟ ਲੈਵਲ ਮੇਨਟੇਨੈਂਸ ਸਟੇਸ਼ਨ ਦੀ ਵਿਕਰੀ ਦੇ ਨਾਲ ਸਪੇਅਰ ਤੇ ਰਿਪੇਅਰ ਪਾਰਟਸ, ਸਪੋਰਟ ਤੇ ਟੈਸਟ ਸਾਮਾਨ, ਪ੍ਰਕਾਸ਼ਨ ਤੇ ਤਕਨੀਕੀ ਦਸਤਾਵੇਜ਼, ਮੁਲਾਜ਼ਮਾਂ ਦੀ ਸਿਖਲਾਈ ਲਈ ਅਮਰੀਕੀ ਸਰਕਾਰ ਤੋਂ ਕਾਂਟਰੈਕਟ ਤਕਨੀਕ, ਇੰਜੀਨੀਅਰਿੰਗ ਤੇ ਲਾਜਿਸਟਿਕਸ ਮਦਦ ਦੇ ਪ੍ਰੋਗਰਾਮ ਲਈ ਕੀਤੀ ਜਾਣ ਵਾਲੀ ਮਦਦ ਦੀ ਅੰਦਾਜ਼ਨ ਲਾਗਤ 8.2 ਕਰੋੜ ਡਾਲਰ ਹੈ। ਇਹ ਪ੍ਰਸਤਾਵਿਤ ਵਿਕਰੀ ਭਾਰਤ ਨੂੰ ਮੌਜੂਦਾ ਤੇ ਭਵਿੱਖ ਦੇ ਖਤਰਿਆਂ ਨਾਲ ਨਜਿੱਠਣ ਦੀ ਸਮਰੱਥਾ ਵਿੱਚ ਸੁਧਾਰ ਕਰੇਗੀ।