ਪਠਾਨਕੋਟ, 3 ਅਗਸਤ, (ਪੋਸਟ ਬਿਊਰੋ)- ਅੱਜ ਸਵੇਰੇ ਭਾਰਤੀ ਫੌਜ ਦਾ ਹੈਲੀਕਾਪਟਰ ਪਠਾਨਕੋਟ ਨੇੜਲੇ ਰਣਜੀਤ ਸਾਗਰ ਡੈਮ ਦੀ ਝੀਲ ਵਿਚ ਜਾ ਡਿੱਗਾ। ਇਸ ਹੈਲੀਕਾਪਟਰ ਨੇ ਮਾਮੂਨ ਛਾਉਣੀ ਤੋਂ ਸਵੇਰੇ 10:20 ਵਜੇ ਉਡਾਣ ਭਰੀ ਸੀ ਤੇ ਸਾਢੇ ਦਸ ਵਜੇ ਦੇ ਕਰੀਬ ਰਣਜੀਤ ਸਾਗਰ ਡੈਮ ਦੀ ਝੀਲ ਉਤੋਂ ਲੰਘਦੇ ਵਕਤ ਝੀਲ ਵਿੱਚ ਜਾ ਡਿੱਗਾ। ਇਸ ਵਿਚ ਪਾਇਲਟ ਏਐੱਸ ਬਾਠ ਅਤੇ ਕੈਪਟਨ ਜੈਯੰਤ ਜੋਸ਼ੀ ਸਵਾਰ ਸਨ ਅਤੇ ਇਹ ਦੋਵੇਂ ਲਾਪਤਾ ਹਨ।
ਜਾਣਕਾਰ ਸੂਤਰਾਂ ਅਨੁਸਾਰ ਫੌਜ ਦਾ ਇਹ ਹੈਲੀਕਾਪਟਰ ਨਿਗਰਾਨੀ ਮਿਸ਼ਨ ਉੱਤੇ ਸੀ। ਇਸ ਦੇ ਡਿੱਗਦੇ ਸਾਰ ਹੀ ਫੌਜ ਦੇ ਅਧਿਕਾਰੀ ਅਤੇ ਜ਼ਿਲ੍ਹਾ ਪੁਲੀਸ ਮੁੱਖੀ ਸੁਰਿੰਦਰ ਲਾਂਬਾ ਓਥੇ ਜਾ ਪਹੰੁਚੇ। ਹੈਲੀਕਾਪਟਰ 254 ਆਰਮੀ ਏਵੀਏਸ਼ਨ ਸਕੁਐਡਰਨ ਦਾ ਸੀ ਅਤੇ ਇਸ ਦੇ ਕ੍ਰੈਸ਼ ਹੋਣ ਤੋਂ 10 ਮਿੰਟ ਪਹਿਲਾਂ ਮਾਮੂਨ ਛਾਉਣੀ ਤੋਂ ਉਡਾਣ ਭਰੀ ਸੀ। ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਇਹ ਕੰਟਰੋਲ ਗੁਆ ਲੈਣ ਪਿੱਛੋਂ ਡੈਮ ਵਿੱਚ ਡਿੱਗ ਗਿਆ। ਇਸ ਮੌਕੇ ਰਣਜੀਤ ਸਾਗਰ ਡੈਮ ਦੇ ਚੀਫ ਇੰਜੀਨੀਅਰ ਰਾਮ ਦਰਸ਼ਨ ਤੇ ਨਿਗਰਾਨ ਇੰਜਨੀਅਰ ਨਰੇਸ਼ ਮਹਾਜਨ ਡੈਮ ਦਾ ਸਟੀਮਰ ਲੈ ਕੇ ਓਥੇ ਪੁੱਜੇ ਅਤੇ ਡੈਮ ਦੀ ਰਾਹਤ ਟੀਮ ਨੂੰ ਹੈਲੀਕਾਪਟਰ ਦਾ ਕੁਝ ਮਲਬਾ ਝੀਲ ਤੋਂ ਮਿਲਿਆ, ਜਿਹੜਾਫੌਜ ਦੇ ਅਧਿਕਾਰੀਆਂ ਦੇ ਹਵਾਲੇ ਕਰ ਦਿੱਤਾ ਗਿਆ।ਨਰੇਸ਼ ਮਹਾਜਨ ਨੇ ਦੱਸਿਆ ਕਿ ਫੌਜ ਦੇ ਗੋਤਾਖੋਰਾਂ ਦੀ ਟੀਮ ਰਾਹਤ ਕਾਰਜ ਲਈ ਝੀਲ ਵਿੱਚ ਖੋਜ ਕਰ ਰਹੀ ਹੈ। ਇਹ ਹੈਲੀਕਾਪਟਰ ਜੰਮੂ-ਕਸ਼ਮੀਰ ਦੇ ਖ਼ੇਤਰ ਬਸੋਹਲੀ ਕੋਲ ਝੀਲ ਵਿਚ ਡਿੱਗਣ ਕਾਰਨ ਜ਼ਿਲ੍ਹਾ ਕਠੂਆ ਦੇ ਅਧਿਕਾਰੀ ਵੀ ਮੌਕੇ ’ਤੇ ਪੁੱਜੇ ਹੋਏ ਸਨ। ਇਹ ਝੀਲ ਪੰਜਾਬ ਤੇ ਜੰਮੂ-ਕਸ਼ਮੀਰ ਦੋਵਾਂ ਦੇ ਖੇਤਰ ਵਿਚ ਪੈਂਦੀ ਹੈ।