ਪਟਿਆਲਾ, 3 ਅਗਸਤ (ਪੋਸਟ ਬਿਊਰੋ)- ਪੰਜਾਬੀ ਯੂਨੀਵਰਸਿਟੀ ਵਿੱਚ ਫੇਕ ਬਿਲਿੰਗ ਘੋਟਾਲਾ ਕੇਸ ਵਿੱਚ ਕਰੀਬ 15 ਦਿਨ ਜਾਂਚ ਕਰ ਕੇ ਪੁਲਸ ਨੇ ਸੱਤ ਜਣਿਆਂ ਨੂੰ ਨਾਮਜ਼ਦ ਕੀਤਾ ਹੈ। ਪੁਲਸ ਕੋਲ ਇਨ੍ਹਾਂ ਸੱਤ ਜਣਿਆਂ ਦੇ ਨਾਂਅ ਹਨ, ਪ੍ਰੰਤੂ ਇਸ ਲਈ ਜਾਰੀ ਨਹੀਂ ਕੀਤੇ ਗਏ ਕਿ ਕਿਤੇ ਦੋਸ਼ੀ ਪੁਲਸ ਦੀ ਪਕੜ ਤੋਂ ਪਹਿਲਾਂ ਭੱਜ ਨਾ ਜਾਣ।
ਮਿਲੀ ਜਾਣਕਾਰੀ ਅਨੁਸਾਰ ਪੰਜਾਬੀ ਯੂਨੀਵਰਸਿਟੀ ਵਿੱਚ ਪਿਛਲੇ ਦਿਨੀਂ ਫੇਕ ਬਿੱਲ ਸਕਾਲਰਸ਼ਿਪ ਘੋਟਾਲਾ ਪਤਾ ਲੱਗਾ ਸੀ, ਜਿਸ ਉੱਤੇ ਵਾਈਸ ਚਾਂਸਲਰ ਨੇ ਐਕਸ਼ਨ ਲੈ ਕੇ ਦੋ ਮੁਲਾਜ਼ਮਾਂ ਨੂੰ ਸਸਪੈਂਡ ਕਰ ਦਿੱਤਾ ਅਤੇ ਦਰਜਾ ਚਾਰ ਦੇ ਇੱਕ ਮੁਲਾਜ਼ਮ ਨੂੰ ਨੌਕਰੀ ਤੋਂ ਕੱਢ ਦਿੱਤਾ ਸੀ। ਇਸ ਮਾਮਲੇ ਵਿੱਚ ਜਲਦੀ ਕੁਝ ਹੋਰ ਨਾਂਅ ਸ਼ਾਮਲ ਹੋਣਗੇ ਕਿਉਂਕਿ ਅਜੇ ਇਨ੍ਹਾਂ ਵਿੱਚੋਂ ਇੱਕ ਦੋਸ਼ੀ ਦਾ ਨਾਂਅ ਸਿ਼ਕਾਇਤ ਵਿੱਚ ਦਰਜ ਨਹੀਂ ਹੈ। ਐਸ ਐਚ ਓ ਰੌਨੀ ਸਿੰਘ ਨੇ ਦੱਸਿਆ ਉਕਤ ਦੋਸ਼ੀ ਦਾ ਨਾਂਅ ਸ਼ੁਰੂਆਤੀ ਜਾਂਚ ਵਿੱਚ ਨਹੀਂ ਆਇਆ, ਪਰ ਜਾਂਚ ਵਿੱਚ ਦੇਖਾਂਗੇ ਕਿ ਕਿੰਨਾ ਦੋਸ਼ੀ ਹੈ, ਫਿਰ ਕਾਰਵਾਈ ਹੋਵੇਗੀ। ਉਨ੍ਹਾਂ ਨੇ ਕਿਹਾ ਕਿ ਇਸ ਕੇਸ ਦੀ ਜਾਂਚ ਕੀਤੀ ਜਾ ਰਹੀ ਹੈ ਅਤੇ ਦੋਸ਼ੀਆਂ ਦੀ ਤਲਾਸ਼ ਕੀਤੀ ਜਾ ਰਹੀ ਹੈ।ਉਨ੍ਹਾਂ ਦੱਸਿਆ ਕਿ ਯੂਨੀਵਰਸਿਟੀ ਨੇ ਸ਼ਿਕਾਇਤ ਕੀਤੀ ਸੀ, ਜਿਸ ਵਿੱਚ ਕੁਝ ਮੁਲਾਜ਼ਮਾਂ ਵੱਲੋਂ ਸੱਤ ਲੱਖ ਰੁਪਏ ਦੀ ਹੇਰਾਫੇਰੀ ਦਾ ਕੇਸ ਸੀ, ਜਿਸ ਵਿੱਚ ਕੇਸ ਦਰਜ ਕਰ ਕੇ ਇਸ ਦੀ ਜਾਂਚ ਕੀਤੀ ਜਾ ਰਹੀ ਹੈ, ਜੋ ਵੀ ਦੋਸ਼ੀ ਹੋਵੇਗਾ ਕਾਰਵਾਈ ਕੀਤੀ ਜਾਏਗੀ।