ਮੁੱਲਾਂਪੁਰ ਦਾਖਾ, 2 ਅਗਸਤ (ਪੋਸਟ ਬਿਊਰੋ)- ਪਿੰਡ ਜਾਂਗਪੁਰ ਵਿਖੇ ਇੱਕ ਕਿਸਾਨ ਨੇ ਜ਼ਮੀਨ ਦੇ ਝਗੜੇ ਵਿੱਚ ਆਪਣੇ ਸਕੇ ਭਰਾ ਅਤੇ ਚਾਚੇ ਦੇ ਲੜਕੇ ਉਪਰ ਗੋਲੀਆਂ ਚਲਾ ਕੇ ਉਨ੍ਹਾਂ ਨੂੰ ਗੰਭੀਰ ਜ਼ਖ਼ਮੀ ਕਰ ਦਿੱਤਾ ਹੈ।
ਮਿਲੀ ਜਾਣਕਾਰੀ ਅਨੁਸਾਰ ਸ਼ੇਰ ਸਿੰਘ ਪੁੱਤਰ ਕਰਤਾਰ ਸਿੰਘ ਪਿੰਡ ਜਾਂਗਪੁਰ ਆਪਣੇ ਸਕੇ ਭਰਾ ਅਮਰੀਕ ਸਿੰਘ ਪੰਚ ਨਾਲ ਇੱਕੋ ਘਰ ਵਿੱਚ ਰਹਿ ਰਿਹਾ ਸੀ ਤੇ ਆਪਣੀ ਜ਼ਮੀਨ 7-8 ਬਿਸਵੇ ਦਾ ਤਬਾਦਲਾ ਆਪਣੇ ਚਚੇਰੇ ਭਰਾ ਹਾਕਮ ਸਿੰਘ ਪੁੱਤਰ ਸਰਦਾਰ ਸਿੰਘ ਪਿੰਡ ਜਾਂਗਪੁਰ ਨਾਲ ਕਰਨਾ ਚਾਹੰੁਦਾ ਸੀ। ਇਸੇ ਜ਼ਮੀਨ ਬਾਰੇ ਪਿਛਲੇ ਕੁਝ ਸਾਲਾਂ ਤੋਂ ਆਪਸ ਵਿੱਚ ਵਿਵਾਦ ਚੱਲ ਰਿਹਾ ਸੀ। ਕੱਲ੍ਹ ਸਵੇਰੇ ਕਰੀਬ ਸੱਤ ਵਜੇ ਸਾਰਾ ਵਿਵਾਦ ਖ਼ਤਮ ਕਰਨ ਲਈ ਸ਼ੇਰ ਸਿੰਘ ਨੇ ਚਚੇਰੇ ਭਰਾ ਹਾਕਮ ਸਿੰਘ ਨੂੰ ਸਬਕ ਸਿਖਾਉਣ ਲਈ ਰਿਵਾਲਵਰ ਕੱਢ ਲਿਆ।ਇਸ ਦਾ ਪਤਾ ਉਸਦੇ ਸਕੇ ਭਰਾ ਅਮਰੀਕ ਸਿੰਘ ਪੰਚ ਨੂੰ ਲੱਗਾ ਤਾਂ ਉਸ ਨੇ ਏਦਾਂ ਕਰਨ ਤੋਂ ਰੋਕਣ ਦੀ ਕੋਸ਼ਿਸ਼ ਕੀਤੀ ਤਾਂ ਗੁੱਸੇ ਵਿੱਚ ਸ਼ੇਰ ਸਿੰਘ ਨੇ ਅਮਰੀਕ ਸਿੰਘ (ਸਕੇ ਭਰਾ) ਉੱਤੇ ਪੰਜ ਗੋਲੀਆਂ ਆਪਣੇ 32 ਬੋਰ ਦੇ ਰਿਵਾਲਵਰ ਤੋਂ ਦਾਗ ਦਿੱਤੀਆਂ। ਦੋ ਉਸ ਦੇ ਮੋਢੇ ਅਤੇ ਇੱਕ ਧੌਣ ਵਿੱਚ ਲੱਗੀ ਅਤੇ ਉਹ ਗੰਭੀਰ ਜ਼ਖ਼ਮੀ ਹੋ ਗਿਆ। ਫਿਰ ਉਹ ਖੇਤਾਂ ਵਿੱਚ ਕੰਮ ਕਰਦੇ ਚਚੇਰੇ ਭਰਾ ਨੂੰ ਮਾਰਨ ਲਈ ਉਸ ਦੇ ਖੇਤ ਵਿੱਚ ਗਿਆ ਅਤੇ ਉਸ ਉਪਰ ਪੰਜ ਗੋਲੀਆਂ ਦਾਗ ਦਿੱਤੀਆਂ। ਹਾਕਮ ਸਿੰਘ ਨੇ ਦਲੇਰੀ ਦਿਖਾ ਕੇ ਦੋ ਗੋਲੀਆਂ ਕਹੀ ਨਾਲ ਰੋਕ ਲਈਆਂ ਅਤੇ ਦੋ ਫਾਇਰ ਕੋਲੋਂ ਲੰਘ ਕੇ ਇਕ ਗੋਲੀ ਉਸ ਦੇ ਜਬਾੜੇ ਵਿੱਚ ਲੱਗੀ ਤਾਂ ਹਾਕਮ ਸਿੰਘ ਨੇ ਆਪਣੀ ਕਹੀ ਵਗਾ ਕੇ ਸ਼ੇਰ ਸਿੰਘ ਦੇ ਮਾਰੀ, ਜਿਸ ਕਰ ਕੇ ਉਸਦਾ ਰਿਵਾਲਵਰ ਥੱਲੇ ਡਿੱਗ ਪਿਆ। ਹਾਕਮ ਸਿੰਘ ਨੇ ਸ਼ੇਰ ਸਿੰਘ ਨੂੰ ਖੇਤਾਂ ਵਿੱਚ ਢਾਹ ਲਿਆ ਅਤੇ ਉਦੋਂ ਤੱਕ ਨਹੀਂ ਛੱਡਿਆ, ਜਦੋਂ ਤੱਕ ਲੋਕ ਇਕੱਠੇ ਨਾ ਹੋ ਗਏ। ਇਸ ਦੀ ਜਾਣਕਾਰੀ ਥਾਣਾ ਦਾਖਾ ਨੂੰ ਦਿੱਤੀ ਗਈ। ਜ਼ਖ਼ਮੀ ਅਮਰੀਕਾ ਸਿੰਘ ਤੇ ਹਾਕਮ ਸਿੰਘ ਲੁਧਿਆਣਾ ਹਸਪਤਾਲਦਾਖਲ ਹਨ। ਥਾਣਾ ਮੁਖੀ ਇੰਸਪੈਕਟਰ ਜਗਜੀਤ ਸਿੰਘ ਨੇ ਦੱਸਿਆ ਕਿ ਘਟਨਾ ਵਾਲੀਆਂ ਥਾਵਾਂ ਤੋਂ ਕਰੀਬ 10 ਚੱਲੇ ਕਾਰਤੂਸ ਮਿਲੇ ਹਨ। ਉਨ੍ਹਾਂ ਦੱਸਿਆ ਕਿ ਹਾਕਮ ਸਿੰਘ ਦੇ ਬਿਆਨਾਂ ਉੱਤੇ ਸ਼ੇਰ ਸਿੰਘ ਵਿਰੁੱਧ ਕੇਸ ਦਰਜ ਕਰ ਕੇ ਉਸ ਨੂੰ ਗ਼੍ਰਿਫ਼ਤਾਰ ਕਰ ਲਿਆ ਹੈ।