ਨਵੀਂ ਦਿੱਲੀ, 2 ਅਗਸਤ (ਪੋਸਟ ਬਿਊਰੋ)- ਸੱਤ ਲੱਖ ਰੁਪਏ ਦੇ ਇਨਾਮੀ ਬਦਮਾਸ਼ ਸੰਦੀਪ ਉਰਫ ਕਾਲਾ ਜਠੇੜੀ ਨਾਲ ਪੁਲਸ ਨੇ ਉਸ ਦੀ ਗਰਲਫ੍ਰੈਂਡ ਤੇ ਗੈਂਗਸਟਰ ਅਨੁਰਾਧਾ ਚੌਧਰੀ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ। ਜਠੇੜੀ ਦੀ ਗ੍ਰਿਫਤਾਰੀ ਦੇ ਸਮੇਂ ਅਨੁਰਾਧਾ ਸਹਾਰਨਪੁਰ ਵਿੱਚ ਉਸ ਦੇ ਨਾਲ ਸੀ। ਨੌਂ ਮਹੀਨੇ ਤੋਂ ਉਹ ਜਠੇੜੀ ਦੇ ਨਾਲ ਲਿਵ ਇਨ ਵਿੱਚ ਰਹਿ ਰਹੀ ਸੀ। ਉਸ ਦੇ ਕਈ ਗੈਂਗਸਟਰਾਂ ਨਾਲ ਵੀ ਸੰਬੰਧ ਰਹੇ ਹਨ।
ਪੁਲਸ ਮੁਤਾਬਕ ਪਤੀ ਨੂੰ ਛੱਡਣ ਪਿੱਛੋਂ ਅਨੁਰਾਧਾ ਰਾਜਸਥਾਨ ਦੇ ਗੈਂਗਸਟਰ ਆਨੰਦਪਾਲ ਸਿੰਘ ਦੀ ਗਰਲਫ੍ਰੈਂਡ ਬਣੀ ਸੀ। ਪੰਜ ਸਾਲ ਪਹਿਲਾਂ ਰਾਜਸਥਾਨ ਪੁਲਸ ਨੇ ਆਨੰਦਪਾਲ ਨੂੰ ਮੁਕਾਬਲੇ ਵਿੱਚ ਮਾਰ ਕੇ ਅਨੁਰਾਧਾ ਨੂੰ ਗ੍ਰਿਫਤਾਰ ਕਰ ਲਿਆ ਸੀ। ਉਹ ਪੁਲਸ ਹਿਰਾਸਤ ਵਿੱਚੋਂ ਭੱਜ ਗਈ ਅਤੇ ਗਿਰੋਹ ਦੀ ਅਗਵਾਈ ਕਰਨ ਲੱਗੀ। ਆਨੰਦਪਾਲ ਦੇ ਬਾਅਦ ਅਨੁਰਾਧਾ ਵਿਰੋਧੀ ਗਿਰੋਹ ਰਾਜੂ ਬਸੌਦੀ ਦੇ ਨਿਸ਼ਾਨੇ ਉੱਤੇ ਆ ਗਈ ਤਾਂਖੁਦ ਨੂੰ ਮਜ਼ਬੂਤ ਬਣਾਉਣ ਦੇ ਲਈ ਉਸ ਨੇ ਬਲਬੀਰ ਬਨੂੜਾ ਦਾ ਸਾਥ ਫੜਿਆ। ਬਲਬੀਰ ਦੇ ਫੜੇ ਜਾਣ ਉੱਤੇ ਉਹ ਲਾਰੈਂਸ ਬਿਸ਼ਨੋਈ ਦੇ ਸੰਪਰਕ ਵਿੱਚ ਆ ਗਈ, ਜਿੱਥੇ ਉਸ ਨੂੰ ਕਾਲਾ ਜਠੇੜੀ ਦਾ ਸਾਥ ਮਿਲਿਆ। ਅਨੁਰਾਧਾ ਦੇ ਇਸ਼ਾਰੇ ਉੱਤੇ ਜਠੇੜੀ ਰਾਜਸਥਾਨ ਵਿੱਚ ਰੰਗਦਾਰੀ ਅਤੇ ਕਤਲ ਵਰਗੀਆਂ ਸੰਗੀਨ ਵਾਰਦਾਤਾਂ ਕਰਦਾ ਸੀ। ਜਠੇੜੀ ਦੇ ਨਿਸ਼ਾਨੇ ਉੱਤੇ ਸਾਗਰ ਧਨਖੜ ਹੱਤਿਆਕਾਂਡ ਵਿੱਚ ਸ਼ਾਮਲ ਸੁਸ਼ੀਲ ਪਹਿਲਵਾਨ ਤੇ ਨੀਰਜ ਬਵਾਨੀਆ ਗੈਂਗ ਦੇ ਸ਼ੂਟਰ ਸਨ, ਕਾਲਾ ਜਠੇੜੀ ਨੂੰ ਐਸ ਟੀ ਐਫ ਸੋਨੀਪਤ ਵੀ ਪ੍ਰੋਡਕਸ਼ਨ ਵਾਰੰਟ ਉੱਤੇ ਲਿਆ ਕੇ ਪੁੱਛਗਿੱਛ ਕਰੇਗੀ।