ਸ਼ੇਰਬਰੁੱਕ, 29 ਜੁਲਾਈ (ਪੋਸਟ ਬਿਊਰੋ) : ਸ਼ੇਰਬਰੁੱਕ ਪੁਲਿਸ ਵੱਲੋਂ ਇੱਕ ਵਿਲੱਖਣ ਘਟਨਾ ਦੀ ਜਾਂਚ ਕੀਤੀ ਜਾ ਰਹੀ ਹੈ ਜਿਸ ਵਿੱਚ ਫਰਸਟ ਰਿਸਪਾਂਡਰਜ਼ ਨੇ ਇੱਕ ਮਹਿਲਾ ਦੀ ਸੜੀ ਹੋਈ ਲਾਸ਼ ਨੂੰ ਮੈਨੀਕੁਇਨ ਸਮਝ ਕੇ ਕੂੜੇਦਾਨ ਵਿੱਚ ਸੁੱਟ ਦਿੱਤਾ।
ਸ਼ੇਰਬਰੁੱਕ ਪੁਲਿਸ ਚੀਫ ਡੈਨੀ ਮੈਕਕੌਨਲ ਅਨੁਸਾਰ 23 ਜੁਲਾਈ ਦੀ ਸਵੇਰ ਨੂੰ ਕਬਾਨਾ ਸਟਰੀਟ ਫੈਕਟਰੀ ਨੇੜੇ ਲੱਗੀ ਅੱਗ ਤੋਂ ਬਾਅਦ ਇੱਕ ਮਹਿਲਾ ਦੀ ਸੜੀ ਹੋਈ ਲਾਸ਼ ਨੂੰ ਸਿਲੀਕੌਨ ਡਮੀ ਸਮਝ ਲਿਆ ਗਿਆ। ਪੁਲਿਸ ਤੇ ਫਾਇਰਫਾਈਟਰਜ਼ ਦਰਮਿਆਨ ਹੋਈ ਗੱਲਬਾਤ ਤੋਂ ਬਾਅਦ ਇਹ ਤੈਅ ਕੀਤਾ ਗਿਆ ਕਿ ਮੈਨੀਕੁਇਨ ਨੂੰ ਪੁਲਿਸ ਸਟੇਸ਼ਨ ਦੇ ਪਿੱਛੇ ਬਣੇ ਕੂੜੇਦਾਨ ਵਿੱਚ ਸੁੱਟ ਦੇਣਾ ਚਾਹੀਦਾ ਹੈ ਕਿਉਂਕਿ ਉੱਥੇ ਆਮ ਜਨਤਾ ਦਾ ਆਉਣ ਜਾਣ ਨਹੀਂ ਹੈ।
ਚਾਰ ਘੰਟੇ ਬਾਅਦ ਇੱਕ ਵਿਅਕਤੀ ਨੇ ਆਪਣੀ ਪਾਰਟਨਰ ਦੇ ਲਾਪਤਾ ਹੋਣ ਦੀ ਰਿਪੋਰਟ ਲਿਖਵਾਈ। ਪੁਲਿਸ ਨੇ ਉਸ ਦਾ ਸੈੱਲਫੋਨ ਟਰੈਕ ਕੀਤਾ ਤੇ ਉਸ ਦੀ ਗੱਡੀ ਅੱਗ ਲੱਗਣ ਵਾਲੀ ਥਾਂ ਦੇ ਨੇੜੇ ਹੀ ਪਾਰਕ ਕੀਤੀ ਪਾਈ ਗਈ। ਉਸ ਮਹਿਲਾ ਦਾ ਵੇਰਵਾ ਉਸ ਕਥਿਤ ਮੈਨੀਕੁਇਨ ਨਾਲ ਕਾਫੀ ਮੇਲ ਖਾਂਦਾ ਸੀ ਜਿਸ ਨੂੰ ਕੂੜੇਦਾਨ ਵਿੱਚ ਸੁੱਟ ਦਿੱਤਾ ਗਿਆ। ਪੁਲਿਸ ਨੇ ਸ਼ਾਮੀਂ 6:30 ਵਜੇ ਕੂੜੇਦਾਨ ਨੂੰ ਚੈੱਕ ਕਰਨ ਦਾ ਫੈਸਲਾ ਕੀਤਾ ਤੇ ਪਾਇਆ ਕਿ ਮੈਨੀਕੁਇਨ ਅਸਲ ਵਿੱਚ ਕਿਸੇ ਮਹਿਲਾ ਦੀ ਲਾਸ਼ ਹੈ।
ਹੁਣ ਕੌਰੋਨਰ ਆਫਿਸ, ਕ੍ਰਾਊਨ ਤੇ ਇੰਡੀਪੈਂਡੈਂਟ ਬਿਊਰੋ ਆਫ ਇਨਵੈਸਟੀਗੇਸ਼ਨ (ਬੀ ਈ ਆਈ) ਸਾਰੇ ਇਸ ਮਾਮਲੇ ਦੀ ਜਾਂਚ ਕਰ ਰਹੇ ਹਨ। ਪੁਲਿਸ ਇਸ ਨੂੰ ਸ਼ੱਕੀ ਮੌਤ ਮੰਨ ਕੇ ਇਸ ਦੀ ਜਾਂਚ ਕਰ ਰਹੀ ਹੈ। ਵੀਰਵਾਰ ਨੂੰ ਕੀਤੀ ਗਈ ਨਿਊਜ਼ ਕਾਨਫਰੰਸ ਵਿੱਚ ਮੈਕਕੌਨਲ ਨੇ ਮਹਿਲਾ ਦੇ ਪਰਿਵਾਰ ਲਈ ਦੁੱਖ ਪ੍ਰਗਟਾਇਆ।