ਬੀ ਸੀ ਵਿੱਚ ਨਹੀਂ ਸੁਨਾਮੀ ਦਾ ਕੋਈ ਖਤਰਾ
ਬ੍ਰਿਟਿਸ਼ ਕੋਲੰਬੀਆ, 29 ਜੁਲਾਈ (ਪੋਸਟ ਬਿਊਰੋ) : ਬੁੱਧਵਾਰ ਰਾਤ ਨੂੰ ਅਲਾਸਕਾ ਦੇ ਕੁੱਝ ਹਿੱਸਿਆਂ ਵਿੱਚ ਜ਼ਬਰਦਸਤ ਭੂਚਾਲ ਦੇ ਝਟਕੇ ਮਹਿਸੂਸ ਕੀਤੇ ਗਏ।
ਯੂਐਸ ਜਿਓਲਾਜੀਕਲ ਸਰਵੇ ਅਨੁਸਾਰ ਭੂਚਾਲ ਦੀ ਗਤੀ 8·2 ਮਾਪੀ ਗਈ। ਭੂਚਾਲ ਪੈਰੀਵਿੱਲ ਦੇ ਦੱਖਣ ਪੂੁੁਰਬ ਤੇ ਕੋਡੀਐਕ ਦੇ ਦੱਖਣ ਪੱਛਮ ਵਿੱਚ ਜ਼ਮੀਨ ਤੋਂ ਹੇਠਾਂ 32 ਕਿਲੋਮੀਟਰ ਦੀ ਡੂੰਘਾਈ ਉੱਤੇ ਰਾਤੀਂ 11:00 ਵਜੇ ਤੋਂ ਬਾਅਦ ਆਇਆ।ਅਲਾਸਕਾ ਦੇ ਬਹੁਤੇ ਤਟੀ ਇਲਾਕਿਆਂ ਵਿੱਚ ਸੁਨਾਮੀ ਦੀ ਚੇਤਾਵਨੀ ਜ਼ਰੂਰ ਜਾਰੀ ਕੀਤੀ ਗਈ ਪਰ ਬਾਅਦ ਵਿੱਚ ਉਸ ਨੂੰ ਰੱਦ ਕਰ ਦਿੱਤਾ ਗਿਆ। ਦੱਖਣੀ ਅਲਾਸਕਾ, ਅਲਾਸਕਾ ਪੈਨਿਨਸੁਲਾ, ਐਲਿਊਸ਼ੀਅਨ ਆਈਲੈਂਡਜ਼ ਲਈ ਐਡਵਾਈਜ਼ਰੀਜ਼ ਵੀ ਜਾਰੀ ਕੀਤੀਆਂ ਗਈਆਂ।
ਐਮਰਜੰਸੀ ਇਨਫੋ ਬੀਸੀ ਵੱਲੋਂ ਇਸ ਗੱਲ ਦੀ ਪੁਸ਼ਟੀ ਕੀਤੀ ਗਈ ਕਿ ਬ੍ਰਿਟਿਸ਼ ਕੋਲੰਬੀਆ ਵਿੱਚ ਸੁਨਾਮੀ ਦਾ ਕੋਈ ਖਤਰਾ ਨਹੀਂ ਹੈ।ਅਲਾਸਕਾ ਅਰਥਕੁਏਕ ਸੈਂਟਰ ਅਨੁਸਾਰ ਭੂਚਾਲ ਦੇ ਝਟਕੇ ਪੂਰੇ ਅਲਾਸਕਾ ਪੈਨਿਨਸੁਲਾ ਤੇ ਕੋਡੀਐਕ ਵਿੱਚ ਮਹਿਸੂਸ ਕੀਤੇ ਗਏ।ਅਜੇ ਤੱਕ ਕਿਸੇ ਤਰ੍ਹਾਂ ਦੇ ਜਾਨੀ ਮਾਲੀ ਨੁਕਸਾਨ ਦੀ ਕੋਈ ਖਬਰ ਨਹੀਂ ਮਿਲੀ ਹੈ।