ਟੋਕੀਓ, 27 ਜੁਲਾਈ (ਪੋਸਟ ਬਿਊਰੋ) : ਟੋਕੀਓ ਵਿੱਚ ਚੱਲ ਰਹੀ 2020 ਓਲੰਪਿਕ ਖੇਡਾਂ ਵਿੱਚ ਵੇਟਲਿਫਟਿੰਗ ਮੁਕਾਬਲੇ ਵਿੱਚ ਕੈਨੇਡਾ ਦੀ ਮੌਡ ਸ਼ੈਰਨ ਨੇ ਸੋਨ ਤਮਗਾ ਜਿੱਤ ਕੇ ਆਪਣੀ ਵਿਲੱਖਣ ਛਾਪ ਛੱਡੀ।
ਰਿਮੁਸਕੀ, ਕਿਊਬਿਕ ਤੋਂ ਸ਼ੈਰਨ ਨੇ ਮਹਿਲਾਵਾਂ ਦੇ 64 ਕਿੱਲੋ ਭਾਰ ਵਰਗ ਵਿੱਚ ਪਹਿਲਾ ਸਥਾਨ ਹਾਸਲ ਕੀਤਾ। ਉਸ ਨੇ 131 ਕਿੱਲੋਗ੍ਰਾਮ ਕਲੀਨ ਤੇ ਜਰਕ ਮੁਕਾਬਲਾ ਬੜੀ ਸਹਿਜਤਾ ਨਾਲ ਜਿੱਤ ਲਿਆ। ਸਨੈਚ ਫੇਜ਼ ਵਿੱਚ 105 ਕਿੱਲੋਗ੍ਰਾਮ ਭਾਰ ਚੁੱਕ ਕੇ ਸ਼ੈਰਨ ਨੇ ਸੱਭ ਤੋਂ ਵੱਧ ਸਕੋਰ ਪਹਿਲਾਂ ਹੀ ਆਪਣੇ ਨਾਂ ਕਰ ਲਏ ਸਨ।ਦੋ ਫੇਜ਼ ਵਿੱਚ ਉਸ ਦਾ ਕੁੱਲ 236 ਪੁਆਇੰਟ ਦਾ ਅੰਕੜਾ ਚਾਂਦੀ ਦਾ ਤਮਗਾ ਜਿੱਤਣ ਵਾਲੀ ਇਟਲੀ ਦੀ ਜਾਰਜੀਆ ਬਰਡਾਇਨਨ ਨਾਲੋਂ ਕਿਤੇ ਵਧੀਆ ਸੀ।
ਤਾਇਵਾਨ ਦੀ ਵੈਨ ਹੁਈ ਚੈਨ ਇਸ ਮੁਕਾਬਲੇ ਵਿੱਚ ਤੀਜੇ ਸਥਾਨ ਉੱਤੇ ਰਹੀ।ਸ਼ੈਰਨ ਵੱਲੋਂ ਕੈਨੇਡਾ ਲਈ ਇਹ ਦੂਜਾ ਸੋਨ ਤਮਗਾ ਜਿੱਤਿਆ ਗਿਆ ਹੈ। ਇਸ ਤੋਂ ਪਹਿਲਾਂ ਸੋਮਵਾਰ ਨੂੰ ਮਹਿਲਾਵਾਂ ਦੇ 100 ਮੀਟਰ ਬਟਰਫਲਾਈ ਮੁਕਾਬਲੇ ਵਿੱਚ ਕੈਨੇਡਾ ਦੀ ਮੈਗੀ ਮੈਕਨੀਲ ਨੇ ਕੈਨੇਡਾ ਲਈ ਪਹਿਲਾ ਸੋਨ ਤਮਗਾ ਜਿੱਤਿਆ ਸੀ।