ਟੋਰਾਂਟੋ, 11 ਮਈ (ਪੋਸਟ ਬਿਊਰੋ): ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਵੱਲੋਂ ਗ੍ਰੇਟਰ ਟੋਰਾਂਟੋ ਤੇ ਹੈਮਿਲਟਨ ਏਰੀਆ ਵਿੱਚ ਪੰਜ ਰੈਪਿਡ ਟਰਾਂਜਿ਼ਟ ਪ੍ਰੋਜੈਕਟਸ ਲਈ ਕਈ ਬਿਲੀਅਨ ਡਾਲਰ ਦੇ ਫੰਡ ਦੇਣ ਦਾ ਐਲਾਨ ਕੀਤਾ ਗਿਆ। ਇਨ੍ਹਾਂ ਪ੍ਰੋਜੈਕਟਾਂ ਵਿੱਚ ਓਨਟਾਰੀਓ ਲਾਈਨ ਸਬਵੇਅ ਵੀ ਸ਼ਾਮਲ ਹੈ।
12 ਬਿਲੀਅਨ ਡਾਲਰ ਦੀ ਰਕਮ ਤਿੰਨ ਸਟੌਪ ਵਾਲੇ ਸਕਾਰਬੌਰੋ ਸਬਵੇਅ ਐਕਸਟੈਂਸ਼ਨ, 15 ਕਿਲੋਮੀਟਰ ਦੀ ਓਨਟਾਰੀਓ ਲਾਈਨ, ਰਿਚਮੰਡ ਹਿੱਲ ਵਿੱਚ ਯੰਗ ਸਬਵੇਅ ਐਕਸਟੈਂਸ਼ਨ ਦੇ ਨਾਲ ਨਾਲ ਮਾਊਂਟ ਡੈਨਿਸ ਤੋਂ ਰੈਨਫੋਰਥ ਡਰਾਈਵ ਤੱਕ ਐਗਲਿੰਟਨ ਕਰੌਸਟਾਊਨ ਦੀ ਐਕਸਟੈਂਸ਼ਨ ਦੇ ਨਿਰਮਾਣ ਉੱਤੇ ਖਰਚ ਕੀਤੀ ਜਾਵੇਗੀ। ਇਸ ਨਾਲ ਹੈਮਿਲਟਨ ਵਿੱਚ ਨਵੀਂ ਰੈਪਿਡ ਟਰਾਂਜਿ਼ਟ ਲਾਈਨ ਵੀ ਤਿਆਰ ਕੀਤੀ ਜਾਵੇਗੀ ਤੇ ਇਹ ਮੈਕਮਾਸਟਰ ਯੂਨੀਵਰਸਿਟੀ ਤੋਂ ਸਟੋਨੀ ਕ੍ਰੀਕ ਵਿੱਚ ਈਸਟਗੇਟ ਸੈਨਟੇਨੀਅਲ ਪਾਰਕ ਤੱਕ ਜਾਵੇਗੀ।
ਜੀਟੀਏ ਦੇ ਚਾਰ ਪ੍ਰੋਜੈਕਟ ਉਨ੍ਹਾਂ 28·5 ਬਿਲੀਅਨ ਡਾਲਰਜ਼ ਦੀ ਟਰਾਂਜਿ਼ਟ ਯੋਜਨਾ ਦਾ ਹਿੱਸਾ ਹਨ ਜਿਨ੍ਹਾਂ ਦਾ ਐਲਾਨ 2019 ਵਿੱਚ ਫੋਰਡ ਸਰਕਾਰ ਵੱਲੋਂ ਕੀਤਾ ਗਿਆ ਸੀ ਤੇ ਇਨ੍ਹਾਂ ਨੂੰ ਅੰਸ਼ਕ ਤੌਰ ਉੱਤੇ ਫੰਡ ਕੀਤਾ ਜਾ ਰਿਹਾ ਹੈ।