ਲੰਡਨ, 21 ਅਪ੍ਰੈਲ (ਪੋਸਟ ਬਿਊਰੋ)- ਬ੍ਰਿਟੇਨ ਅਤੇ ਦੁਨੀਆਂ ਵਿੱਚ ਬੇਰੋਜ਼ਗਾਰੀ ਇੱਕ ਵੱਡਾ ਮੁੱਦਾ ਬਣ ਗਿਆ ਹੈ ਅਤੇ ਹਰ ਦੇਸ਼ ਵਿੱਚ ਨੌਜਵਾਨ ਵਰਗ ਬੇਰੋਜ਼ਗਾਰੀ ਨਾਲ ਆਰਥਿਕ ਤੰਗੀ ਭੁਗਤ ਰਿਹਾ ਹੈ। ਜਦੋਂ ਇਨਸਾਨਾਂ ਨੂੰ ਨੌਕਰੀ ਨਹੀਂ ਮਿਲ ਰਹੀ, ਓਦੋਂ ਇੱਕ ਕੰਪਨੀ ਨੇ ਕੁੱਤਿਆਂ ਲਈ ਸ਼ਾਨਦਾਰ ਵੈਂਕੇਸੀ ਕੱਢੀ ਹੈ। ਹੈਰਾਨੀ ਵਾਲੀ ਗੱਲ ਤਾਂ ਹੈ, ਪਰ ਇਸ ਤੋਂ ਵੀ ਜ਼ਿਆਦਾ ਹੈਰਾਨ ਕਰ ਦੇਣ ਵਾਲੀ ਗੱਲ ਕੁੱਤਿਆਂ ਦੀ ਪ੍ਰਸਤਾਵਤ ਤਨਖਾਹ ਬਾਰੇ ਹੈ।
ਬੁਸ਼ ਬੀਅਰ ਕੰਪਨੀ ਨੇ ਯੋਗ ਤੇ ਟਰੇਂਡ ਕੁੱਤਿਆਂ ਲਈ ਵੈਕੇਂਸੀ ਕੱਢੀ ਹੈ। ਇਸ ਦੇ ਲਈ ਬਾਕਾਇਦਾ ਟਵਿੱਟਰ ਉਤੇ ਹਾਇਰਿੰਗ ਦੀ ਸੂਚਨਾ ਪੋਸਟ ਕੀਤੀ ਗਈ ਹੈ। ਕੰਪਨੀ ਨੂੰ ਚੀਫ ਟੈਸਟਿੰਗ ਅਫਸਰ ਦੇ ਲਈ ਯੋਗ ਕੁੱਤੇ ਦੀ ਤਲਾਸ਼ ਹੈ। ਇਹ ਨੌਕਰੀ ਲੈਣ ਵਾਲੇ ਕੁੱਤੇ ਨੂੰ ਸ਼ਾਨਦਾਰ ਤਨਖਾਹ ਕਰੀਬ 15 ਲੱੱਖ ਰੁਪਏ ਸਾਲਾਨਾ ਮਿਲਣਗੇ। ਤਨਖਾਹ ਦੀ ਗੱਲ ਸੁਣ ਕੇ ਲੋਕਾਂ ਦੇ ਮੁੰਹ ਖੁੱਲ੍ਹੇ ਰਹਿ ਗਏ। ਜਦੋਂ ਲੋਕਾਂ ਨੂੰ ਪੰਜ ਦਸ ਹਜ਼ਾਰ ਦੀ ਨੌਕਰੀ ਨਹੀਂ ਮਿਲ ਰਹੀ, ਕੁੱਤੇ ਨੂੰ ਹਰ ਮਹੀਨੇ ਇੱਕ ਲੱਖ ਰੁਪਏ ਤੋਂ ਵੱਧ ਮਿਲਣਗੇ। ਇਹੀ ਨਹੀਂ ਟਰੇਂਡ ਕੁੱਤੇ ਦੀ ਤਨਖਾਹ ਦੇ ਨਾਲ ਉਸ ਦਾ ਇੰਸ਼ੋਰੈਂਸ ਵੀ ਹੋਵੇਗਾ। ਉਸ ਨੂੰ ਬੁਸ਼ ਦਾ ਕਵਾਲਿਟੀ ਕੰਟਰੋਲ ਅਧਿਕਾਰੀ ਵਜੋਂ ਬ੍ਰਾਂਡ ਅੰਬੈਸਡਰ ਦੀ ਭੂਮਿਕਾ ਨਿਭਾਉਣੀ ਹੋਵੇਗੀ।
ਕੰਪਨੀ ਦਾ ਕਹਿਣਾ ਹੈ ਕਿ ਬੁਸ਼ ਦਾ ਬਿਹਰਤਰੀਨ ਸਵਾਦ ਹੋਰ ਕਿਵੇਂ ਬਿਹਤਰ ਕੀਤਾ ਜਾਵੇ, ਨਵੇਂ ਫਲੇਵਰ ਕਿਹੋ ਜਿਹੇ ਹੋਣ ਅਤੇ ਪੈਟਸ ਦੇ ਲਈ ਪ੍ਰੋਜੈਕਟ ਉਤੇ ਕੰਮ ਕਰਨ ਦੇ ਲਈ ਅਜਿਹੇ ਕੁੱਤਿਆਂ ਦੀ ਜ਼ਰੂਰਤ ਹੈ, ਜੋ ਯੋਗ ਹੋਣ ਅਤੇ ਸਵਾਦ ਪਰਖਣ ਦੇ ਕਾਬਲ ਹੋਣ, ਯਾਨੀ ਜਲਦੀ ਹੀ ਬੁਸ਼ ਦੇ ਪੈਟਸ ਉਤਪਾਦਾਂ ਦੀ ਜ਼ਿੰਮੇਵਾਰੀ ਇੱਕ ਯੋਗ ਕੁੱਤੇ ਦੇ ਹੱਥ ਹੋਵੇਗੀ, ਜੋ ਆਪਣੇ ਵਰਗੇ ਜਾਨਵਰਾਂ ਲਈ ਬਿਹਤਰ ਸਵਾਦ ਵਾਸਤੇ ਅਹਿਮ ਭੂਮਿਕਾ ਨਿਭਾਏਗਾ।