ਨਾਲਾਗੜ੍ਹ, 20 ਅਪ੍ਰੈਲ (ਪੋਸਟ ਬਿਊਰੋ)- ਏਸ਼ੀਆ ਦੇ ਸਭ ਤੋਂ ਵੱਡੇ ਫਾਰਮਾ ਹੱਬ ਵਿੱਚੋਂ ਰੈਮਡੇਸਿਵਿਰ ਦਵਾਈ ਦੀ ਕਾਲਾਬਾਜ਼ਾਰੀ ਦੇ ਕਈ ਤਾਰ ਜੁੜਦੇ ਨਜ਼ਰ ਆ ਰਹੇ ਹਨ। ਕਾਂਗੜਾ ਦੇ ਸੂਰਜਪੁਰ ਵਾਲੇ ਟਿਊਲਿਪ ਫਾਰਮੂਲੇਸ਼ਨ ਦੇ ਬਾਅਦ ਬੱਦੀ ਦੀ ਹੈਲਥ ਬਾਇਓਟੈਕ ਫਾਰਮਾ ਦਾ ਕੇਸ ਖੁੱਲ੍ਹ ਗਿਆ ਹੈ। ਇਹ ਕੰਪਨੀ ਰੈਮਡੇਸਿਵਿਰ ਇੰਜੈਕਸ਼ਨ ਨੂੰ ਬਿਨਾਂ ਮਨਜ਼ੂਰੀ ਦੇ ਤਿਆਰ ਕਰ ਕੇ ਮਾਰਕੀਟ ਵਿੱਚ ਪਹਿਲਾਂ ਵੀ ਵੇਚ ਚੁੱਕੀ ਹੈ ਤੇ ਇਨ੍ਹਾਂ ਦੀ ਸਪਲਾਈ ਚੰਡੀਗੜ੍ਹ ਅਤੇ ਦੇਸ਼ ਦੇ ਕਈ ਰਾਜਾਂ ਦੇ ਮੁੱਖ ਕੈਮਿਸਟ ਸ਼ਾਪਾਂ ਦੇ ਮਾਲਕਾਂ ਅਤੇ ਐਮ ਆਰ ਨੂੰ ਕੀਤੀ ਜਾ ਚੁੱਕੀ ਹੈ। ਇਸ ਬਾਰੇ ਸਪੈਸ਼ਲ ਇਨਵੈਸਟੀਗੇਸ਼ਨ ਟੀਮ ਨੇ ਉਨ੍ਹਾਂ ਸਭ ਕੈਮਿਸਟਾਂ ਅਤੇ ਐਮ ਆਰ ਦਾ ਵੇਰਵਾ ਇਕੱਠਾ ਕਰ ਕੇ ਉਨ੍ਹਾਂ ਨੂੰ ਪੁੱਛਗਿੱਛ ਦੇ ਲਈ ਦਫਤਰ ਬੁਲਾਇਆ, ਜਿਨ੍ਹਾਂ ਨੇ ਇਸ ਕੰਪਨੀ ਤੋਂ ਸਿੱਧਾ ਇਸ ਇੰਜੈਕਸ਼ਨ ਨੂੰ ਖਰੀਦਿਆ ਸੀ।
ਕੱਲ੍ਹ ਚੰਡੀਗੜ੍ਹ ਪੁਲਸ ਆਪਰੇਸ਼ਨ ਸੈਲ ਦੀ ਟੀਮ ਰਾਜ ਡਰੱਗ ਕੰਟਰੋਲਰ ਦਫਤਰ ਬੱਦੀ ਆਈ ਤੇ ਬੱਦੀ ਡਰੱਗ ਵਿਭਾਗ ਅਤੇ ਹੈਲਥ ਬਾਇਓਟੈਕ ਮੈਨੇਜਮੈਂਟ ਨੂੰ ਨੋਟਿਸ ਜਾਰੀ ਕਰ ਕੇ ਕਈ ਸਖਤ ਸਵਾਲ ਪੁੱਛੇ, ਜਿਨ੍ਹਾਂ ਦੇ ਜਲਦੀ ਤੋਂ ਜਲਦੀ ਜਵਾਬ ਮੰਗੇ ਹਨ। ਦੋਸ਼ੀ ਕੇਰਲ, ਮੱਧ ਪ੍ਰਦੇਸ਼ ਅਤੇ ਦਿੱਲੀ ਵਿੱਚ ਹੋਰਨਾਂ ਕੰਪਨੀਆਂ ਨਾਲ ਜੁੜੇ ਹੋਏ ਹਨ ਅਤੇ ਉਹ ਇੰਜੈਕਸ਼ਨ ਖਰੀਦਣ ਲਈ ਚੰਡੀਗੜ੍ਹ ਪਹੁੰਚੇ ਸਨ, ਜੋ ਬੱਦੀ ਫਾਰਮਾ ਕੰਪਨੀ ਵਿੱਚ ਤਿਆਰ ਇਸ ਰੈਮਡੇਸਿਵਿਰ ਇੰਜੈਕਸ਼ਨ ਦੀ ਖਰੀਦ ਫਰੋਖਤ ਦੇ ਲਈ ਆਏ ਹੋਏ ਸਨ।