ਟੋਰਾਂਟੋ, 20 ਅਪਰੈਲ (ਪੋਸਟ ਬਿਊਰੋ): ਯੌਰਕ ਰੀਜਨ ਦੇ ਪੰਜ ਹੌਟ ਸਪੌਟਸ ਵਾਲੇ ਇਲਾਕਿਆਂ ਵਿੱਚ 35 ਸਾਲ ਤੇ ਇਸ ਤੋਂ ਵੱਧ ਉਮਰ ਦੇ ਲੋਕਾਂ ਨੂੰ ਸਿਟੀ ਵੱਲੋਂ ਚਲਾਈਆਂ ਜਾਣ ਵਾਲੀਆਂ ਮਾਸ ਵੈਕਸੀਨੇਸ਼ਨ ਸਾਈਟਸ ਉੱਤੇ ਕੋਵਿਡ-19 ਵੈਕਸੀਨੇਸ਼ਨ ਦੀ ਪਹਿਲੀ ਡੋਜ਼ ਦੇਣ ਦਾ ਫੈਸਲਾ ਕੀਤਾ ਗਿਆ ਹੈ। ਭਾਵ ਇਹ ਕਿ ਹੁਣ ਇਨ੍ਹਾਂ ਹੌਟ ਸਪੌਟਸ ਉੱਤੇ ਰਹਿਣ ਵਾਲੇ 35 ਸਾਲ ਤੇ ਇਸ ਤੋਂ ਵੱਧ ਉਮਰ ਦੇ ਲੋਕ ਵੀ ਵੈਕਸੀਨੇਸ਼ਨ ਲਈ ਯੋਗ ਹੋਣਗੇ। ਇਸ ਦੀ ਪੁਸ਼ਟੀ ਸੋਮਵਾਰ ਨੂੰ ਅਧਿਕਾਰੀਆਂ ਵੱਲੋਂ ਦਿੱਤੀ ਗਈ।
ਇਹ ਤਰਜੀਹੀ ਪੋਸਟਲ ਕੋਡ ਐਲ 4 ਐਲ, ਐਲ 6 ਏ, ਐਲ 4 ਕੇ, ਐਲ 4 ਜੇ, ਵਾਅਨ ਵਿੱਚ ਸਥਿਤ ਹਨ ਤੇ ਐਲ 3 ਐਸ ਮਾਰਖਮ ਦਾ ਪੋਸਟਲ ਕੋਡ ਹੈ। ਯੌਰਕ ਰੀਜਨ ਦੇ ਸਾਰੇ ਵਾਸੀ ਜੋ ਕਿ 60 ਸਾਲ ਤੇ ਇਸ ਤੋਂ ਉੱਪਰ ਉਮਰ ਵਰਗ ਦੇ ਹਨ ਇਹ ਸ਼ੌਟ ਹਾਸਲ ਕਰ ਸਕਦੇ ਹਨ। ਯੌਰਕ ਰੀਜਨ ਦੇ ਡਾਇਰੈਕਟਰ ਆਫ ਕਾਰਪੋਰੇਟ ਕਮਿਊਨਿਕੇਸ਼ਨਜ਼ ਪੈਟ੍ਰਿਕ ਕੇਸੀ ਨੇ ਆਖਿਆ ਕਿ ਅੰਦਾਜ਼ਨ 20,000 ਨਵੀਂਆਂ ਵੈਕਸੀਨ ਅਪੁਆਇੰਟਮੈਂਟਸ ਸਵੇਰੇ 8:30 ਵਜੇ ਤੋਂ ਖੁੱਲ੍ਹਣਗੀਆਂ।
ਕੇਸੀ ਨੇ ਆਖਿਆ ਕਿ ਯੌਰਕ ਰੀਜਨ ਵਿੱਚ ਵੈਕਸੀਨ ਦੀ ਸਪਲਾਈ ਵਿੱਚ ਭਾਰੀ ਕਿੱਲਤ ਪਾਈ ਜਾ ਰਹੀ ਹੈ ਤੇ ਜਦੋਂ ਵੈਕਸੀਨ ਉਪਲਬਧ ਹੋਵੇਗੀ ਹੋਰ ਅਪੁਆਇੰਟਮੈਂਟਸ ਬੁੱਕ ਕੀਤੀਆਂ ਜਾਣਗੀਆਂ।ਪ੍ਰੋਵਿੰਸ਼ੀਅਲ ਸਰਕਾਰ ਵੱਲੋਂ ਵੀ ਇਸ ਗੱਲ ਦੀ ਪੁਸ਼ਟੀ ਕੀਤੀ ਗਈ ਹੈ ਕਿ ਉਹ ਐਸਟ੍ਰਾਜ਼ੈਨੇਕਾ ਲਈ ਉਮਰ ਦੀ ਯੋਗਤਾ ਘਟਾ ਰਹੇ ਹਨ। ਹੁਣ ਪ੍ਰੋਵਿੰਸ ਵਿੱਚ 40 ਸਾਲ ਤੇ ਇਸ ਤੋਂ ਵੱਧ ਉਮਰ ਦਾ ਹਰ ਵਿਅਕਤੀ ਇਹ ਵੈਕਸੀਨ ਲੈ ਸਕੇਗਾ।