ਟੋਰਾਂਟੋ, 19 ਅਪਰੈਲ (ਪੋਸਟ ਬਿਊਰੋ) : ਵਾਅਨ, ਓਨਟਾਰੀਓ ਵਿੱਚ ਕੋਵਿਡ-19 ਵੈਕਸੀਨ ਲਵਾਉਣ ਲਈ ਗਏ ਛੇ ਵਿਅਕਤੀਆਂ ਨੂੰ ਸੇਲੀਨ ਦਾ ਹੀ ਟੀਕਾ ਲਾ ਦਿੱਤਾ ਗਿਆ। ਇਹ ਜਾਣਕਾਰੀ ਸਿਹਤ ਅਧਿਕਾਰੀਆਂ ਨੇ ਦਿੱਤੀ।
ਮੈਕੈਂਜ਼ੀ ਹੈਲਥ ਨੇ ਆਖਿਆ ਕਿ 28 ਮਾਰਚ ਨੂੰ ਛੇ ਵਿਅਕਤੀਆਂ ਨੂੰ ਉਸ ਸੇਲੀਨ ਦਾ ਹੀ ਟੀਕਾ ਲਾ ਦਿੱਤਾ ਗਿਆ ਜਿਸ ਦੀ ਵਰਤੋਂ ਕੋਵਿਡ-19 ਵੈਕਸੀਨ ਨੂੰ ਡਾਇਲਿਊਟ ਕਰਨ ਲਈ ਕੀਤੀ ਜਾਂਦੀ ਹੈ। ਸੋਮਵਾਰ ਨੂੰ ਜਾਰੀ ਕੀਤੇ ਬਿਆਨ ਵਿੱਚ ਮੈਕੈਂਜ਼ੀ ਹੈਲਥ ਨੇ ਦੱਸਿਆ ਕਿ ਸੇਲੀਨ ਇੰਜੈਕਸ਼ਨ ਨਾਲ ਕੋਈ ਨੁਕਸਾਨ ਨਹੀਂ ਹੁੰਦਾ ਪਰ ਅਜਿਹਾ ਨਹੀਂ ਸੀ ਹੋਣਾ ਚਾਹੀਦਾ।
ਮੈਕੈਂਜ਼ੀ ਹੈਲਥ ਨੇ ਆਖਿਆ ਕਿ ਉਹ ਇਸ ਗਲਤੀ ਲਈ ਮੁਆਫੀ ਮੰਗਦੇ ਹਨ ਤੇ ਉਨ੍ਹਾਂ ਵੱਲੋਂ ਪੂਰੀ ਪ੍ਰਕਿਰਿਆ ਦਾ ਮੁਲਾਂਕਣ ਕਰਕੇ ਇਹ ਪਤਾ ਲਾਉਣ ਦੀ ਕੋਸਿ਼ਸ਼ ਕੀਤੀ ਜਾ ਰਹੀ ਹੈ ਕਿ ਅਜਿਹਾ ਕਿਉਂ ਹੋਇਆ। ਇਹ ਵੀ ਆਖਿਆ ਗਿਆ ਕਿ ਭਵਿੱਖ ਵਿੱਚ ਅਜਿਹਾ ਨਹੀਂ ਹੋਵੇਗਾ। ਅਧਿਕਾਰੀਆਂ ਨੇ ਇਹ ਨਹੀਂ ਦੱਸਿਆ ਕਿ ਇਨ੍ਹਾਂ ਛੇ ਵਿਅਕਤੀਆਂ ਵੱਲੋਂ ਕਿਸ ਕਲੀਨਿਕ ਵਿੱਚ ਇਹ ਟੀਕੇ ਲਵਾਏ ਗਏ ਸਨ।