ਇੰਡੀਆਨਾਪੋਲਿਸ, 19 ਅਪਰੈਲ (ਪੋਸਟ ਬਿਊਰੋ) : ਇੰਡੀਆਨਾਪੋਲਿਸ ਵਿੱਚ ਫੈਡੈਕਸ ਵਿਖੇ ਮਾਰੇ ਗਏ ਅੱਠ ਮਾਸੂਮ ਤੇ ਮਿਹਨਤੀ ਵਿਅਕਤੀਆਂ ਦੀ ਮੌਤ ਉੱਤੇ ਅਮੈਰੀਕਨ ਸਿੱਖ ਕਾਊਂਸਲ (ਏ ਐਸ ਸੀ) ਵੱਲੋਂ ਦੁੱਖ ਦਾ ਪ੍ਰਗਟਾਵਾ ਕੀਤਾ ਗਿਆ ਹੈ। 19 ਸਾਲਾ ਗੋਰੇ ਲੜਕੇ ਵੱਲੋਂ ਵੀਰਵਾਰ ਦੀ ਰਾਤ ਨੂੰ ਕੀਤੇ ਗਏ ਕਤਲੇਆਮ ਵਿੱਚ ਮਾਰੇ ਗਏ ਅੱਠ ਵਿਅਕਤੀਆਂ ਵਿੱਚ ਚਾਰ ਸਿੱਖ ਅਮਰੀਕੀ ਹਨ। ਇਨ੍ਹਾਂ ਵਿੱਚ ਵੀ ਤਿੰਨ ਮਹਿਲਾਵਾਂ ਤੇ ਇੱਕ ਪੁਰਸ਼ ਹੈ।
ਨਿਊਜ਼ ਰਿਪੋਰਟਾਂ ਅਨੁਸਾਰ ਫੈਡੈਕਸ ਵਿੱਚ ਕੰਮ ਕਰਨ ਵਾਲੇ ਸਾਬਕਾ ਨਾਰਾਜ਼ ਕਰਮਚਾਰੀ ਨੇ ਅੱਠ ਲੋਕਾਂ ਨੂੰ ਮੌਤ ਦੇ ਘਾਟ ਉਤਾਰ ਦਿੱਤਾ ਤੇ ਕਈ ਹੋਰਨਾਂ ਨੂੰ ਜ਼ਖ਼ਮੀ ਕਰ ਦਿੱਤਾ। ਫਿਰ ਉਸ ਨੇ ਆਪਣੀ ਜਾਨ ਲੈ ਲਈ। ਇੰਡੀਆਨਾਪੋਲਿਸ ਵਿੱਚ ਫੈਡੈਕਸ ਫੈਸਿਲਿਟੀ ਵਿੱਚ ਕੰਮ ਕਰਨ ਵਾਲੇ ਕਈ ਮੁਲਾਜ਼ਮ ਸਿੱਖ ਅਮੈਰੀਕਨਜ਼ ਹਨ। ਲੋਕਲ ਗੁਰਦੁਆਰਾ ਮੈਂਬਰਾਂ ਵੱਲੋਂ ਜਾਰੀ ਕੀਤੀ ਰਿਪੋਰਟ ਵਿੱਚ ਇਸ ਗੱਲ ਦੀ ਪੁਸ਼ਟੀ ਕੀਤੀ ਗਈ ਕਿ ਇਸ ਘਟਨਾ ਵਿੱਚ ਚਾਰ ਸਿੱਖ ਮਾਰੇ ਗਏ ਜਿਨ੍ਹਾਂ ਦੀ ਪਛਾਣ ਅਮਰਜੀਤ ਕੌਰ ਜੌਹਲ ( 66 ਸਾਲ), ਜਸਵਿੰਦਰ ਕੌਰ (50 ਸਾਲ), ਂਅਮਰਜੀਤ ਕੌਰ ਸੇਖੋਂ (48 ਸਾਲ) ਤੇ ਜਸਵਿੰਦਰ ਸਿੰਘ (68 ਸਾਲ) ਸ਼ਾਮਲ ਹਨ। ਇਨ੍ਹਾਂ ਤੋ ਇਲਾਵਾ ਇਸ ਘਟਨਾ ਵਿੱਚ ਮਾਰੇ ਗਏ ਹੋਰਨਾਂ ਲੋਕਾਂ ਵਿੱਚ ਮੈਥਿਊ ਆਰ ਅਲੈਗਜੈਂ਼ਡਰ (32 ਸਾਲ), ਸਮਾਰੀਆ ਬਲੈਕਵੈੱਲ (19 ਸਾਲ), ਕਾਰਲੀ ਸਮਿੱਥ (19 ਸਾਲ) ਤੇ ਜੌਹਨ ਵੈਸਟ (74 ਸਾਲ) ਸ਼ਾਮਲ ਹਨ।
ਇਹ ਸੱਭ ਉਦੋਂ ਵਾਪਰਿਆ ਜਦੋਂ 19 ਸਾਲਾ ਗੋਰੇ ਵਿਅਕਤੀ ਨੇ ਕੰਪਨੀ ਦੇ ਪਾਰਕਿੰਗ ਲੌਟ ਵਿੱਚ ਗੋਲੀਆਂ ਚਲਾਉਣੀਆਂ ਸ਼ੁਰੂ ਕੀਤੀਆਂ ਤੇ ਫਿਰ ਇਮਾਰਤ ਦੇ ਅੰਦਰ ਦਾਖਲ ਹੋ ਕੇ ਵੀ ਗੋਲੀਆਂ ਚਲਾਉਣੀਆਂ ਜਾਰੀ ਰੱਖੀਆਂ। ਇਸ ਐਂਗਲ ਤੋਂ ਵੀ ਇਸ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ ਕਿ ਕਿਤੇ ਇਹ ਹੇਟ ਕ੍ਰਾਈਮ ਤਾਂ ਨਹੀਂ।ਅਮੈਰੀਕਨ ਸਿੱਖ ਕਾਊਂਸਲ ( ਏ ਐਸ ਸੀ) ਦੇ ਪ੍ਰੈਜ਼ੀਡੈਂਟ ਡਾ· ਗੁਰਦਾਸ ਸਿੰਘ ਨੇ ਆਖਿਆ ਕਿ ਇਸ ਤਰ੍ਹਾਂ ਦੇ ਮਾਸ ਮਰਡਰਜ਼ ਦੀਆਂ ਕਈ ਘਟਨਾਵਾਂ ਵਾਪਰ ਚੁੱਕੀਆਂ ਹਨ ਤੇ ਇਹ ਤੁਰੰਤ ਬੰਦ ਹੋਣੀਆਂ ਚਾਹੀਦੀਆਂ ਹਨ। ਉਨ੍ਹਾਂ ਆਖਿਆ ਕਿ 2021 ਵਿੱਚ ਹੀ 147 ਮਾਸ ਸ਼ੂਟਿੰਗਜ਼ ਹੋ ਚੁੱਕੀਆਂ ਹਨ ਤੇ ਅਜੇ ਵੀ ਸਾਡੇ ਆਗੂਆਂ ਨੂੰ ਨੀਂਦ ਵਿੱਚੋਂ ਜਾਗ ਜਾਣਾ ਚਾਹੀਦਾ ਹੈ ਕਿ ਇਸ ਤੋਂ ਪਹਿਲਾਂ ਦੇਰ ਹੋ ਜਾਵੇ। ਸਾਡੇ ਸਾਰੇ ਮੈਂਬਰ ਗੁਰਦੁਆਰਿਆਂ ਦੇ ਪੱਖ ਤੋਂ ਅਸੀਂ ਇਸ ਘਟਨਾ ਉੱਤੇ ਡੂੰਘੇ ਦੁੱਖ ਦਾ ਪ੍ਰਗਟਾਵਾ ਕਰਦੇ ਹਾਂ।
ਕਾਊਂਸਲ ਦਾ ਕਹਿਣਾ ਹੈ ਕਿ ਰਾਸ਼ਟਰਪਤੀ ਬਾਇਡਨ ਵੱਲੋਂ ਹਰ ਨਸਲ, ਧਰਮ, ਜਾਤੀ ਆਦਿ ਦੇ ਲੋਕਾਂ ਖਿਲਾਫ ਇਸ ਤਰ੍ਹਾਂ ਦੀ ਹਿੰਸਾ ਖਿਲਾਫ ਸਖਤ ਕਾਰਵਾਈ ਹ’ਣੀ ਚਾਹੀਦੀ ਹੈ ਤੇ ਗੰਨ ਕੰਟਰੋਲ ਲਾਅ ਲੈ ਕੇ ਆਉਣਾ ਚਾਹੀਦਾ ਹੈ। ਉਨ੍ਹਾਂ ਆਖਿਆ ਕਿ ਏ ਐਸ ਸੀ ਨਾ ਸਿਰਫ ਆਪਣੇ ਸਿੱਖ ਭੈਣ ਭਰਾਵਾਂ ਨਾਲ ਇੱਕਜੁੱਟ ਹੋ ਕੇ ਖੜ੍ਹੀ ਹੈ ਸਗੋਂ ਐਫਰੀਕਨ ਅਮੈਰੀਕਨ, ਏਸੀਅਨ ਅਮੈਰੀਕਨਜ਼ ਨਾਲ ਵੀ ਖੜ੍ਹੀ ਹੈ।