ਨਵੀਂ ਦਿੱਲੀ, 19 ਅਪ੍ਰੈਲ (ਪੋਸਟ ਬਿਊਰੋ)- ਮਾਈਨਜ਼ ਦੇ ਸੁਰੱਖਿਆ ਡਾਇਰੈਕਟੋਰੇਟ ਜਨਰਲ ਵੱਲੋਂ ਕਰਵਾਈ ਗਈ ਲਿਖਤੀ ਪ੍ਰੀਖਿਆ ਵਿੱਚ ਪਾਸ ਹੋਏ ਉਮੀਦਵਾਰਾਂ ਨੂੰ ਜ਼ਬਾਨੀ ਪ੍ਰੀਖਿਆ ਵਿੱਚ ਪਾਸ ਕਰਾਉਣ ਦੇ ਲਈ 72 ਲੱਖ ਰੁਪਏ ਦੀ ਰਿਸ਼ਵਤ ਦੇ ਦੋਸ਼ ਵਿੱਚ ਸੀ ਬੀ ਆਈ ਨੇ ਚਾਰ ਦੋਸ਼ੀਆਂ ਨੂੰ ਫੜਿਆ ਹੈ। ਇਸ ਵਿੱਚੋਂ ਦੋ ਵਿਅਕਤੀ ਡਾਇਰੈਕਟੋਰੇਟ ਜਨਰਲ ਦੇ ਡਿਪਟੀ ਡਾਇਰੈਕਟਰ ਅਰਵਿੰਦ ਕੁਮਾਰ ਲਈ ਰਿਸ਼ਵਤ ਲੈ ਰਹੇ ਸਨ, ਜਦ ਕਿ ਦੋ ਨੌਜਵਾਨ ਇਹ ਰਕਮ ਦੇਣ ਲਈ ਆਏ ਸਨ। ਅਰਵਿੰਦ ਕੁਮਾਰ ਇਸ ਸਮੇਂ ਧੰਨਬਾਦ ਵਿੱਚ ਤੈਨਾਤ ਹਨ। ਸੀ ਬੀ ਆਈ ਨੇ ਅਰਵਿੰਦ ਸਮੇਤ ਤਿੰਨ ਨੂੰ ਨਾਮਜ਼ਦ ਕਰਦੇ ਹੋਏ ਕੁਝ ਅਣਪਛਾਤੇ ਲੋਕਾਂ ਦੇ ਖਿਲਾਫ ਕੇਸ ਦਰਜ ਕਰ ਲਿਆ ਹੈ।
ਸੀ ਬੀ ਆਈ ਦੇ ਸੂਤਰਾਂ ਮੁਤਾਬਕ ਮਾਈਨਜ਼ ਬਾਰੇ ਸੁਰੱਖਿਆ ਡਾਇਰੈਕਟੋਰੇਟ ਜਨਰਲ ਨੇ ਪ੍ਰਬੰਧਕਾਂ ਦੇ ਲਈ ਪਿੱਛੇ ਜਿਹੇ ਕੰਪਿਊਟਰ ਆਧਾਰਤ ਲਿਖਤੀ ਪ੍ਰੀਖਿਆ ਕਰਵਾਈ ਸੀ। ਇਸ ਵਿੱਚੋਂ ਪਾਸ ਹੋਏ 48 ਪ੍ਰੀਖਿਆਰਥੀਆਂ ਨੂੰ ਜ਼ਬਾਨੀ ਪ੍ਰੀਖਿਆ ਪਾਸ ਕਰਾਉਣ ਲਈ ਪ੍ਰਤੀ ਵਿਅਕਤੀ 1.5 ਲੱਖ ਰੁਪਏ ਦੇ ਹਿਸਾਬ ਨਾਲ 72 ਲੱਖ ਵਿੱਚ ਗੱਲ ਤੈਅ ਹੋਈ ਸੀ ਅਤੇ ਇਹ ਜ਼ਬਾਨੀ ਪ੍ਰੀਖਿਆ ਅੱਠ ਮਾਰਚ ਤੋਂ 20 ਮਾਰਚ ਦਰਮਿਆਨ ਹੋਈ ਸੀ।ਦੋਸ਼ ਲਾਇਆ ਗਿਆ ਹੈ ਕਿ ਅਰਵਿੰਦ ਕੁਮਾਰ ਨੇ 48 ਪ੍ਰੀਖਿਆਰਥੀਆਂ ਨੂੰ ਪਾਸ ਕਰਵਾਇਆ ਸੀ।
ਮੀਡੀਆ ਅਨੁਸਾਰ ਧਨਬਾਦ ਤੋਂ ਰੰਗ ਬਹਾਦਰ ਸਿੰਘ ਤੇ ਤਿ੍ਰਲੋਕੀ ਸਿੰਘ ਇੱਕ ਕਾਰ ਵਿੱਚ ਰਿਸ਼ਵਤ ਦੀ ਰਕਮ ਲੈ ਕੇ ਪਹੁੰਚੇ। ਇਥੇ ਅਰਵਿੰਦ ਦਾ ਅਧਿਆਪਕ ਭਰਾ ਕੈਲਾਸ਼ ਮਹਿਤੋ ਆਪਣੇ ਸਾਥੀ ਪਰਵੀਨ ਕੁਮਾਰ ਦੇ ਨਾਲ ਧਨਬਾਦ ਤੋਂ ਆਏ ਦੋਵਾਂ ਲੋਕਾਂ ਤੋਂ ਰਕਮ ਲੈਣ ਲੱਗਾ ਤਾਂ ਉਥੇ ਮੌਜੂਦ ਸੀ ਬੀ ਆਈ ਟੀਮ ਨੇ ਕੈਲਾਸ਼ ਮਹਿਤੋ, ਪ੍ਰਵੀਨ ਕੁਮਾਰ ਅਤੇ ਝਾਰਖੰਡ ਦੇ ਦੋਵਾਂ ਨੌਜਵਾਨਾਂ ਨੂੰ ਦਬੋਚ ਲਿਆ। ਜਾਂਚ ਦੌਰਾਨ ਕਾਰ ਵਿੱਚੋਂ ਕੁੱਲ 35 ਲੱਖ ਰੁਪਏ ਮਿਲੇ।